Property:GyatsaBioWylie
Jump to navigation
Jump to search
This is a property of type Text.
B
grub pa'i dbang phyug chen po bo dong rtogs ldan sangs rgyas mgon po de nyid kyis ring brgyud bla ma rdo rje gdan pa nas ba ri lo tsA ba las byung ba'i seng gdong ma'i skor gsan nas thugs nyams su bzhes pa la brten/_shangs rta rnar ye shes kyi mkha' 'gro sing ha mas dngos su rjes su bzung zhing dpal o rgyan chen pos sprul pa'i dkyil 'khor du smin grol rdzogs par bstsal pa las/_rjes gnang gi bka' bcu dang bskyed rdzogs las tshogs dang bcas pa'i gzhung glegs bam gcig gi rgyun ma nyams par bzhugs pa rjes gnang rnams kho bos kyang nos shing gter mdzod du bzhugs/_grub brnyes karma chags med kyi seng gdong ma'i skor yang gtso bor gzhung 'di la brten pa yin no/ +
spa gro gnam thang dkar po sog dmag 'joms:_las su dme 'khrugs byed cing lcags cha gyon:_bum thang rtsis lung sbas pa'i gter kha 'di:_mi bzhag 'don pa'i rtags de bstan nas 'byung:_gter ston bon po brag tshal ces bya 'byung:_zhes gter ston 'di gtsang rong zar gyi phyogs su 'khrungs/_rus bon po yin pas der grags/_bai ro dpal seng zung du 'jug pa'i rnam 'phrul/_rten sngags 'chang /_sku gzugs che stobs ldan pa la bla dwags mtshan brag tshal dang /_gsang mtshan rdo rje 'bar du grags/_bum thang rtsis lung ni/_dus gsum sangs rgyas kyi sku li ma bzhugs pa'i lha khang la/_mon pa rnams kyis dkon mchog gsum gyi lha khang zer ba de yin/_gter gnas de nas rdzogs chen gu ru bzhi pa/_gu ru bzhi'i lo rgyus kyis mtshon shrI sing ha'i rdzogs rim bla ma dmar khrid zer ba'i pusti gdan drangs/_'di yi nang na/_sgom ma myong dang bral ma myong/_/mi sgom don dang mi 'bral ba/_zer ba'i man ngag de yod gsungs/_'di byang gter ka dag gi skabs su yang 'byung /_gzhan yang phur pa la sogs pa'i chos skor dang /_shangs kyi skye ka thang shing brag nas bton pa'i rA hu la shi sa bstan pa ru sbal nag po'i ser srung bcas chog ma zab pa'i bka' rgya srog gi rgya can ma'i skor sogs chos mang du yod pa las rA hu la shi sa bstan pa tsam gyi lung da lta'ang snang /_phyis pad+ma 'od gsal mdo sngags gling pa la byin rlabs nye brgyud zab mo'i bka' babs pa'i tshe gur sbrags ma'i gdams zab gter rnying dang mthun pa'i ngo mtshar can bzhugs so +
brang ti rgyal nye mkhar bu'i lo rgyus rgyas pa zhig ma mthong yang /_brang ti rgyal nye mkhar bu zhes pa bod sman mkhas pa mi dgu'i gras brang ti'i rgyud du 'khrungs/_'dis slob dpon rin po che dang khri srong lde'u btsan gyis sbas pa'i rtsa sgrub dang gso dpyad skor 'ga' zhig bsam yas gnam stegs bcu gsum gyi ka zhu'i nang nas gter bton cing bsgrubs pas grub rtags thon par grags shing /_de nas brang ti 'jam dpal bzang po sogs las rim par brgyud par bshad kyang deng sang g.yu thog snying thig gi chos sder bram ze ser skya spun gsum gyi bka' gtad tsam zhig bzhugs so +
chos rgyal khri lde'i yang sprul sgom sde ja pa gter ston bya btang sku mchog gam ngag gi rdo rjer grags pa ni/_sgom sde nang chen phyogs su 'khrungs/_rten sngags pa dkyus mar bzhugs/_lho rin po che sogs yongs 'dzin dam pa rnams las zab chos mang du gsan cing sku chung ngu nas sgrub pa nyams len rtse gcig tu mdzad/_khyad par rig 'dzin mi 'gyur rdo rjes rang gter rdo rje gro lod kyi bka' babs dang gter kha la dbang bar lung bstan/_rdo rje phag mo'i bsnyen sgrub mdzad pa'i skabs gter srung gi lung bstan dang bskul ma yang yang byung na'ang rtsis gdab ma mdzad/_slar dag snang du mkha' 'gros lam sna byas te gu ru rin po che dmod pa drag sngags kyi bkod pa can gyi spyan sngar phyin cing byin rlabs dang gdams pa bstsal cing /_mi 'gyur rdo rje dang bla ma lho pas kyang gter 'don par 'os pa'i gsung bskul gnang ba ltar/_thugs rje chen po'i pho brang sangs rgyas ma chags pad+ma'i spyan gyi sku brnyan brgya rtsa rang byon du gsal ba'i gnas mchog ja pa brag dkar nas zla ba gsum du rgya rim pa bcu gsum bsal te/_sku rten phyag cha/_sa'i sgrom bu rnams thon cing /_sgrom nas gsang bdag dmod pa drag sngags ches zab pa'i chos skor byon/_gter sgrub mdzad skabs gsang ba'i bdag po'i zhal gzigs shing phyi rtags kun gyis mthong ba'i cho 'phrul chen po'ang byung /_gter kha gzhan bton pa'i lo rgyus mi 'dug cing skye bdun gyi sku sha spyan drangs pa la gzhan gyis sgro skur gyi bar chad byung bar bshad/_chos bdag bla ma blo gros rgya mtsho sogs la spel ba'i rgyun ma nyams par bzhugs pa bdag gis kyang nos shing /_sprul brgyud rim par byon pa deng sang yang nang chen ja pa dgon du yod do +
chos rgyal khri srong gi yon tan rnam 'phrul du lung gis zin pa karma gu ru'am chos rgyal dbang po'i sde ni/_g.yas ru'i stod du mi nyag gi rgyal rgyud byang ba rigs ldan chen po nam mkha' rin chen dang /_yum chos skyong 'dzom chen gnyis kyi sras su lcags pho khyi'i lor mtshan rtags khyad par can du ma dang bcas te 'khrungs/_rje btsun kun dga' grol mchog gis/_dpal bkra shis stobs rgyal dbang po'i sde zhes pa'i mtshan dang tshe dbang sogs gnang /_rje de nyid dang /_lo chen rat+na b+ha dra/_gnubs dgon pa byams pa chos kyi rgyal mtshan/_rig 'dzin legs ldan pa/_'bri gung pa chos rgyal rin chen phun tshogs sogs ris med kyi mkhas grub du ma las mdo sngags gsar rnying gi gsan pa rgya cher mdzad cing mkhyen rab phyogs med du rgyas/_khyad par sngon byon gter chos rnams kyi bka' babs pas mtshan sdom gsol 'debs mdzad pa'i nang gsal gyi gter chos rnams kyi rgyun gsan cing dam rdzas kyi rigs thams cad phyag tu son/_nus mthu la mnga' brnyes pas sku dgra rnams rmeg med du bcom pa sogs phrin las bzhi la mnga' dbang 'byor/_bsam yas ar+Ya pa lo'i gling nas gter kha spyi la gces pa'i zhal byang dang myang grol pad+ma rA ga'i za ma tog gcig thog mar thon/_de nas rim par gtsang rong gi brag lhang lhang ma'i ngos su khrom tshogs mang pos mthong bar bya 'phur ba ltar gshegs te sgrub phug nas sku gsum rigs 'dus dang karma gu ru'i chos skor spyan drangs/_de rjes lho brag 'jod pa gser gyi mchod rten nas ma rgyud snying po don gsum dang dam rdzas phur pa sogs bzhes/_gzhan yang gter kha thor bu mang du bzhes par snang zhing /_dbus gtsang lho brag khams kong rnams su chos kyi phrin las skyong ba dang grub pa'i rtags bstan pa sogs bsam gyis mi khyab/_mdo khams ha ka ling tse yan chad du pheb nas 'gro ba mchog dman mang po thar pa'i lam la bkod/_dgung lo lnga bcu nga gsum sa stag lo dpyid zla 'bring po'i tshes nyer gcig gi srod 'khor la byams gling mchod rten chen mo'i mdun du dgongs pa chos kyi dbyings su snyoms par zhugs so/_/gong smos gter chos gsum po'i dbang lung gi rgyun ma chad par bzhugs shing bdag gis kyang nos so
mang po ba dpal rgyal mtshan ni/_dge slong nam mkha'i snying po'i sprul par lung gis zin/_mnga' ris stod du klung ston 'jam dbyangs mgon po zhes pa'i sras su 'khrungs/_rab tu byung ba'i mtshan dpal gyi rgyal mtshan/_bzhugs gnas las byang chub gling par grags/_dbus gtsang rnams su phebs shing thos bsam gyi sgro 'dogs chod par mdzad/_gu ru tshe brtan rgyal mtshan gyi gter ma'i kha byang phyag tu 'byor pa la brten/_dpal mo dpal thang gi nub lha mtsho srin mtsho'i brag nas gu ru'i phyag mtshan gnam lcags rdo rje dang /_dam chos kun bzang thugs gter spyan drangs/_'di'i shog ser rnams rdo rje'i gnas so sor bzhugs pas/_spyi tshom nang gter/_rwa skor/_lte skor/_lte skor chings/_rwa sbrag gi skor lnga ru grags/_sku rten bsod nams dpal 'bar du grags pa bod khams spyi'i phan bde spel ba'i ched du bzhengs dgos pa'i lung bstan nang gzhug 'bul rgyu'i gter rdzas dang bcas ji ltar 'byung ba bzhin legs par bsgrubs shing rab tu gnas par mdzad pas dge mtshan dang ngo mtshar ba'i ltas bsam gyis mi khyab pa byung /_'di'i dbang skal ril bu mthong ba don ldan dkar chag dang bcas pa/_kong yul bya rgod gshong gi brag ri rta mgo ljon pa'i rtse nas sangs rgyas gling pas gdan drangs/_la stod du gter ston byang chub gling pa 'byung ba'i lung bstan gzigs nas/_dkon mchog dbang po zhes pa blta bar btang bas/_gter ston byang chub gling pa dang gnya' nam dben gnas su mjal bas thugs yid ches pa'i lo rgyus ngo mtshar ba'ang snang /_sngar zab chos kyi phrin las che rung phyis su rgyun mi bzhugs pa la/_rje bla ma mdo sngags gling pa nyid sku sras bsam 'grub rdo rje'i bag chags sad cing nye brgyud kyi byin rlabs thob pas chos bka' yongs rdzogs kyi smin grol bka' drin du bstsal pa dang yig cha'i zhabs 'degs 'ga' zhig kyang zhus pa'o +
bla ma ba ri lo tsA dang rje btsun mi la sogs kyi skabs su byon pa'i spyan ras gzigs dngos byang chub sems dpa' zla ba rgyal mtshan zhes yongs su grags par o rgyan gyi slob dpon rin po ches dngos su gnang ba'i rta mgrin zla rgyal lugs kA la me phung du grags pa'i sgrub thabs rjes gnang las tshogs dang bcas pa byin rlabs chen po dang ldan pa'i rgyun da lta'i bar bzhugs shing kho bos kyang nos shing rin chen gter mdzod du bzhugs so +
lha sras mu khri btsad po'i rnam 'phrul sprul sku bzang po grags pa ni la stod lho ru 'khrungs/_rten dge slong /_bka' brgyud kyi chos sgor zhugs/_rgyal gyi shrI/_mang lam ri khrod/_gangs bu le sogs su sgrub pa rtse gcig mdzad pas rtogs pa klong du gyur/_gangs bu les khye'u dar thod can zhig tu sprul nas gter 'don par bskul yang nyams snang du dgongs nas rtsis gdab ma mdzad/_o rgyan chen pos snyi nam la sgom zer ba'i rnal 'byor pa khyad par can zhig tu sprul nas gter gyi kha byang bstsal cing bslab bya mdzad pa ltar/_ru lag gram pa rgyang gi lha khang nas rta mgrin/_byams pa'i sgrub thabs/_gung thang rgyal po la gdams pa'i skor/_yon po lung nas phyag rdor sogs sgrub thabs 'ga' zhig dang /_snying byang rgyas 'bring bsdus gsum/_gnas yig dang kha byang /_gsol 'debs le'u bdun ma/_phyir zlog 'khor lo 'bar ba sogs gdan drangs/_kha byang dang snying byang sogs rig 'dzin rgod ldem can la bskur bas zang zang lha brag gi gter chen 'don par mdzad pa dang /_gsol 'debs kyang de nyid kyis shog ser las phabs te dbus gtsang khams gsum du 'phel bas mchog dman kun gyis mgrin par brgyan te phrin las nam mkha' dang mnyam pa'o +
C
lha sras mu khri btsad po'i rnam 'phrul rig 'dzin chos rgyal rdo rje ni/_mdo stod dge rgyal gyi 'brog sder sku 'khrungs/_dpal ldan 'brug pa'i bstan sgor zhugs/_'brug chen rin po che sogs yongs 'dzin 'ga' zhig las bka' chos mang du gsan/_khyad par rtogs ldan rnal 'byor gyi dbang phyug lhun grub rab brtan las thabs lam thun mong ma yin pa'i gdams zab nos te nyams bzhes mthar phyin par mdzad/_gnyan rdzong rdo rje khyung phug tu lo grangs mang por dka' spyad kyi sgo nas yongs dge'i pad+ma badz+ra la thugs dam rtse gcig tu dril nas snying po dung phyur bdun ljags bzlas mdzad pas grub pa'i rtags du ma mngon du gyur/_khong mi bzhugs pa'i skabs su'ang shul gyi brag phug tu snying po'i sgra di ri ri grags pa phyis kyi bar kun gyis thos par snang /_zab gter la dbang ba'i lung bstan mang du byung zhing skabs shig dag pa'i snang bar bde chen rgyal mos brag de ka nas/_gter sgrom gyi bum par shog ser bcas phyung nas gsal bar bstan cing brda' dkrol gnang ba ltar thugs la nges pa'i thog bum pa slar sbas/_phyis dus la babs pa'i bskul byang byung ba'i tshe gtan la phabs pa gu ru drag mthing lha lnga'i chos skor zab khyad can bzhugs shing /_'di'i rtsa ba tsam bsam yas mchod rten nag po nas dngos gter bzhes pa yin 'dug_/gzhan yang dzam dkar lha lnga'i g.yang sgrub skor dgongs gter las phyungs shing lang gro lo tsA ba'i ring bsrel dang dam rdzas a rgya ma sogs gter drangs nas 'gro don rgya cher mdzad pa las/_gter chen mchog gyur gling pa dang /_mkhan chen zla bzang rin po che sogs kyis kyang bla mar bkur zhing /_gtso bo grub pa'i dbang phyug tshogs gnyis la gter chos sogs kyi bka' babs shing nyams bzhes mdzad/_kho bos kyang chos bka' rnams gter ston nyid las nos shing rgyud 'dzin gong 'phel du bzhugs so +
mdza' bo nang 'jug tsher mas mtha' mi 'bod:_sa steng g.yo ba'i bdud kyi sprul pa 'byung:_yum bu bla sgang sbas pa'i gter kha 'di:_mi bzhag 'don pa'i rtags de bstan nas 'byung:_o rgyan rog rje gling pa zhes bya 'byung:_zhes pa'i gter ston rog rje gling pa ni/_thang yig 'ga' zhig nas chos rje gling pa dang dbon rje gling pa zhes pa'ang 'byung bar ma zad rje rang nyid kyis kyang zhal gyis bzhes pa'i dwags po chos rje gling pa ni/_rgyal sras lha rje'i gter ston skye ba bcu gnyis pa ste/_rje zla 'od gzhon nu'i gcung lha rje snyi chung nas gdung rabs bar ma chad par byon pa'i rabs bco lnga pa yab rdo rje grags pa'i sras su dwags po klu mkhar gdong du 'khrungs/_mtshan yongs grags chos rje 'dzam gling rdo rje dang bde ba'i rdo rje zhes grags/_rje bzang po rdo rjes zhabs drung rin chen rdo rje'i skye bar bzhed kyang zhwa dmar ye shes snying pos ras chung phug sprul pa'i sku 'chi med dbang po'i skye bar ngos bzung zhing /_zla ba'i dbang po bstan pa'i gsal byed ces mtshan dang dgung lo drug par gdan sar phebs/_gnas brtan 'jam dbyangs grags pa las dge tshul dang dga' ldan khri chen blo bzang dar rgyas las bsnyen par rdzogs/_mtshan ngag gi dbang po blo bzang chos dbyings dpal bzang por gsol/_mdo sngags rgya bod kyi gzhung mang po thugs la btsud cing sbyangs pa sogs dge ba'i bshes gnyen chen por gyur/_rten gong ma rnams dbu ral can du bzhugs pas dge slong gi chas la ral pa yod pas dge slong ral pa can du grags pa ltar sku tshe'i stod la kun spyod gtsang zhing 'dul ba'i phyag len sogs kyang zhib par gnang /_phyis zab gter bzhes nas ring zhig song ba'i sku tshe'i mjug tu sgrub pa mo o rgyan bu khrid kyi skye ba de ma thag pa bde chen phrin las mtsho mo phyag rgyar bzhes pa la 'brug pa rin po che'i yang srid byon pa sogs ngo mtshar can byung yang yun ring ma bzhugs/_gang ltar yang dgung lo nyer lnga'i bar grub thob gtsang smyon chen po'i gdan sa yar lung ras chung phug tu bzhugs shing byang chub gling pa gong ma yon tan rgya mtsho dang /_dge bshes don ldan zhabs sogs las rang lugs kyi dbang lung man ngag phyag bzhes yongs su rdzogs pa dang mdo rgyud kyi chos bka' rig pa'i gnas sogs gsan bsam rgya cher mdzad pas mtshon thos pa'i pha rol tu son/_snga phyir gnas de nyid du thugs sbyong dang sgrub pa mdzad pas rtogs pa klong du gyur pa'i tshul bstan/_rgyal dbang ye shes rdo rje dngos su ma mjal yang byin rlabs 'pho ba'i stobs kyis phyag rgya chen po'i gnas lugs mngon sum du gzigs pa dang /_rig 'dzin stag sham rdo rje las nyid kyi zab gter ci rigs pa'i dbang dang yongs rdzogs kyi bka' gtad gsan nas rdzogs pa chen po'i rtogs pa klong du gyur pas 'di gnyis la rtsa ba'i bla mar mdzad/_bye brag tu zab mo gter gyi bka' babs tshul ni/_stag mo gter ston dbon gsas khyung thog tu grags pas lung bstan dang kha byang phul bar ma zad/_mon phyogs su phebs skabs rtags mtshan gsal bas bla ma sku bzhi'i sgrub thabs/_yum bu bla sgang dang srong btsan bang so sogs kyi kha byang /_'u shang rdo nas kyang gter gyi kha byang phyag tu son pa bzhin yum bu bla sgang dang srong btsan bang so dmar po nas zab gter ci rigs bzhes kyang gtan la 'bebs pa sogs thugs rtsol cher ma gnang zhing phal cher yang gter du rgyas btab/slar yang zab gter gyi 'gro don dus la babs par dgongs nas dgung lo nyer lnga par gdan sa sprul pa'i skur rtsis 'bul gnang /_rang nyid kun spong gi spyod pas dpal tsa ri tra sogs su phebs shing thugs dam nyams bzhes lhur blangs pa na/_yang bskyar kha byang lung bstan je cher gsal ba ltar zag med 'ja' tshon phug pa nas 'chi med rtsa gsum dril sgrub dang tshe chu ngo mtshar can sogs spyan drangs/_rim par kha rag mgo dgu'i dug mtsho nas yang phur gnyis/_spu bo bya rgod gshong nas bla sgrub zab lam thugs kyi nor bu/_rma kung lung gi mtsho nas bla ma rig 'dzin/_'dong chu lha khang nas thugs rje chen po sa snying dang dzaM dmar skor/_gzhan yang /_gro lod/_gtum po seng sgrog_/khros nag sogs gter du bzhes shing phal cher gtan la phab/_dag snang gi skor dang sgrub thabs pad+ma rA ga'i phreng ba sogs bka' 'bum bcas deng sang gi bar phal cher lung rgyun bzhugs pa kho bos kyang nos/_kong yul me tog slas steng du lo gsum gyis mtshon thugs dam bsnyen sgrub dang 'gro don phrin las kyang rgyas/_chos bdag zhal slob kyi gtso bo rgyal dbang byang chub rdo rje/_zhwa dmar dpal chen chos kyi don grub/_tre'o chos kyi dbang po/_'bri gung dkon mchog phrin las bzang po/_dwags po zhabs drung sprul pa'i sku lhun grub nges don dbang po/_'brug thams cad mkhyen pa dpag bsam dbang po sogs bla chen dang /_rtsub ri grub chen/_lho ba grub chen/_nang thugs kyi sras gcig pu rwa ston stobs ldan rdo rje sogs mang du byon cing /_rig 'dzin pad+ma phrin las dang smin gling rgyal sras pad+ma 'gyur med rgya mtsho sogs la'ang chos 'brel tsam byung bar snang /_mthar jun gar byung skabs sbas yul chen po pad+ma bkod par gnas sgo 'byed pa'i thugs bzhed kyis zhabs bskyod nas gnas mthil tsam du phebs/_ring min dgung grangs bzhi bcu rtsa bzhi'i dbo zla bar pad+ma 'od kyi zhing khams su gshegs/_sprul pa'i sku kong po dga' chags sde par 'khrungs pa'i 'jig rten dbang phyug sogs yongs grags dang /_sbas tshul ci rigs da lta'i bar du byung bar mngon no/_/rje 'di'i rnam thar rgyas pa rje nyid kyis 'char gzhi rgyas par bkod pa dang /_lam yig le'u tshan/_sgam po pa bzang po rdo rje'i 'das byung gi rnam thar sogs las zhib par gsal bas 'dir sa bon tsam bkod pa yin no/
D
chos rgyal khri srong lde'u btsan gyi phrin las kyi sprul pa gter kha gsar rnying mang po nas lung bstan cing gangs can mgon po spyan ras gzigs kyi thugs rje'i rang gzugs su grub pa rgyal mchog lnga pa gsang mtshan rdo rje thogs med rtsal du grags pa ni/_'phyong rgyas stag rtse'i za hor gyi rgyal rgyud las yab mi dbang bdud 'dul rab brtan dang /_yum khri lcam kun dga' lha mdzes gnyis kyi sras su me mo sbrul lor ngo mtshar ba'i ltas dang bcas sku bltams/_rig 'dzin ngag gi dbang pos tshe gur gyi dbang bka' nyen sel du mdzad nas thog ma'i dge mtshan du gyur/_paN chen blo bzang chos kyi rgyal mtshan gyis rgyal ba yon tan rgya mtsho'i sku skyer ngos 'dzin mdzad nas dpal ldan 'bras spungs pa'i chos sde chen por spyan drangs/_gtsug phud bzhes pa'i mtshan ngag dbang blo bzang rgya mtshor gsol nas seng ge'i khrir bkod/_bcu phrag rig pa'i gnas la byang chub par mdzad/_mkhas grub kyi yongs 'dzin khyad par can mang du bsten nas/_sa dge rnying gsum gtso bor gyur pa'i de skabs bod du mdo sngags kyi bshad pa sngags kyi dbang lung man ngag rgyun bzhugs pa phal cher gsan bsam mthar phyin par mdzad pa'i gsan yig glegs bam bzhir bzhugs pa thams cad kyis tshad mar mdzad/_thugs dam nyams bzhes kyi sgo nas spang rtogs kyi rtsal rdzogs/_khyad par zab mo dag snang gi bka' babs tshul ni/_dpal bkra shis stobs rgyal gyi gter lung las/_nyi shu rtsa lnga khyad par thugs gter lnga:_da lta mgo nag mi yi rgyal po khyod:_smon lam dag pa'i skye ba rnam lngas 'don:_zhes 'khrul med rdo rje'i lung gis bstan pa ltar/_dpal bsam yas su phebs skabs dngos gter gyi rten 'brel byung na'ang yul dus gnas skabs kyi dbang gis bdag gir ma mdzad mod/_phyis nas rtsa gsum rgyal ba rab 'byams kyis dngos su zhal bstan te lung bstan/_dbang bskur brnyes pa ltar yi ger bkod de gsang ba rgya can du mtshan gsol ba'i chos sde nyi shu rtsa lnga/_kha skong ljags bsgrig dang bcas glegs bam gnyis bzhugs pa chos rgyal gter bdag gling pa/_rig 'dzin pad+ma phrin las sogs snga 'gyur gyi ring lugs 'dzin pa gtsor gyur pa'i mchog gi 'dus pa rnams la smin grol yongs su rdzogs parab stsal pas dar rgyas shin tu che bar byung zhing da lta'i bar rgyun ma nyams par bzhugs pa kho bos kyang tshang bar nos/_srid kyi ngos nas dgung lo nyer lnga par gu shrI bstan 'dzin chos rgyal gyis mnga' ris dbus gtsang rnams dpung shed kyis blangs nas lha sde mi sde thams cad chab 'bangs su phul/_de rjes shar phyogs gong ma chen pos pi cing du spyan drangs te 'ja' sa gser yig shel bam dang bcas phul nas ti shrir bskur ba nas bzung da lta'i bar bod khams lugs gnyis kyis bde bar skyong ba'i bdag po chen por gyur/_chos kyi ngos nas mdo sngags gsar rnying bka' gter gyi chos 'khor mtha' yas pa bskor bas/_dpal sa skya pa yab sras/_'bri stag 'brug pa paN chen mchog gi sprul pa'i sku dang /_dga' ldan khri gdan zur sogs bla chen rnams nas bzung /_gangs can gyi bstan 'dzin phal mo che zhal slob tu gyur/_bye brag snga 'gyur ring lugs 'dzin pa'i shing rta chen po chos rgyal gter bdag gling pa dang rig 'dzin pad+ma phrin las/_lho brag thugs sras bstan 'dzin 'gyur med rdo rje sogs grub mtha'i rkang slong nus pa'i gang zag mang du byon cing snga 'gyur gyi bstan pa la dngos dang brgyud pa'i sgo nas bka' drin 'gran zla dang bral bar gyur/_de lta bu'i mdzad pa mthar phyin nas dgung grangs drug cu rtsa bzhi par nag zla'i tshes nyer lnga la pho brang chen po po ta lar bde bar gshegs/_de ma thag pa'i rnam 'phrul mon pad gling gi gdung rgyud du 'khrungs pa rin 'dzin tshangs dbyangs rgya mtsho nas da lta'i bar rim par byon pa 'dzam gling na yongs su grags pa ltar ro
lo chen bai ro'i yang sprul la stod stag mo gter ston gu ru dbon gsas khyung thog tu grags pa ni/_gtsang lha rtse dang nye bar rgyal dbang ye shes rdo rje'i dus tsam 'khrungs/_rten sngags btsun gyi tshul du bzhugs/_thog mar sa skya'i phyogs kyi mdo sngags la gsan pa cung zad mdzad/_slar byang gter gyi chos bka' ci rigs pa gsan nas rig 'dzin gdung sgrub kyi nyams bzhes gnang skabs zab gter gyi kha byang babs te ru lag rgyang gi yon po lung brag bya khyung 'dra ba'i mgul nas/_rdzogs chen kun bzang snying thig sogs bla rdzogs thugs gsum gyi skor spyan drangs/_yan lag tshe sgrub kyi lung byang las gsal ba ltar dbus su byon nas/_rig 'dzin chos rje gling pa ras chung phug tu bzhugs skabs mjal/_zab gter gyi bka' babs yod tshul lung byang dang bcas pa yongs grags su phul cing gsang ba'i tshul gyis chos bdag tu rten 'brel bsgrigs pa la brten/_phyis nas rig 'dzin sprul pa'i gter ston chen por gyur pa chos gling rang gi rnam thar du gsal bas rje 'di nyid tshad thub kyi gter ston du nges mod/_sku tshe dang phrin las rgya cher ma byung bas/_zab gter gyi rgyun ji tsam 'phel bar ma 'tshal phyir 'dir mdo tsam bris pa yin la/_'di nyid kyi rdzogs chen kun bzang thugs tig gi cha lag tshe sgrub hrIHgcig ma ye shes srog tig ces zab cing 'dril ba'i chos tshan nyung ngu rje bla mar byin rlabs nye brgyud kyi tshul du babs pa bdag gis nos pa'ang skal bzang du mtshon no +
shod gsum sa la ro 'dren 'jag skya 'phyo:_mi re'i lag na phub re mda' gzhu re:_byang gter gter phran 'ga' zhig sbas pa 'di:_mi bzhag 'don pa'i rtags de bstan nas 'byung:_gter ston dbu ru ston shAka ces bya 'byung:_zhes pa'i gter ston dbu ru ston pa shAkya 'od ni/_dbu ru 'phan yul phyogs su 'khrungs/_drag sngags kyi bka' babs bai ro dang lang gro zung du 'jug pa'i skye mthar gsal/_rten sngags btsun dkyus ma/_mdo sngags kyi gzhung la'ang sbyang pa ci rigs mdzad pas ston par grags/_byang pra dun rtse nas/_rlung 'khor dmar nag dang zlog pa dang /_dregs pa nyi shu sogs gter kha mang po bton cing /_gzhan yang g.yu mdo brag nas bla ma sku gsum rol pa'i las phran dang /_ra sa 'phrul snang nas rlung 'khor gyi gdams skor rnams kyang gdan drangs pa las/_bla ma sku gsum rol pa'i las phran tsam rgyun snang zhing /_gsang bdag rdo rje me 'bar gyi gzhung nyung ngu pad+ma mdo sngags gling pas byin rlabs nye brgyud kyi tshul du gtan la phab pa kho bos kyang bka' drin du thob bo +
sil ma la dkar 'jag ma'i mi chung skye:_smon la la kar shel gyi pha wang brdol:_g.ya' ma spa gong sbas pa'i gter kha 'di:_mi bzhag 'don pa'i rtags de bstan nas 'byung:_gter ston do ban/_mtshan rgya mtsho zhes bya 'byung:_zhes pa'i gter ston do ban rgya mtsho ni/_lha sras mchog grub rgyal po'i skye mtha' gter ston rkyang pa'i skye ba bcu gsum pa'i bzhi pa ste/_yar 'brog mtsho gling yon po dor ljags kyi rus las 'khrungs shing rten sngags ban du bzhugs pas do ban/_mtshan rgya mtsho 'od/_zur pak+shi shAka 'od kyi slob mar gsal/_yar 'brog smad mu tig spa ma gong nas bla sgrub dang rdzogs chen/_sbrags yangs rdzong nas drag sngags kyi skor sogs mang du spyan drangs na'ang /_deng sang dpe lung gnyis ka'i rgyun bzhugs pa ma mthong /_phyis 'dir rje bla ma'i yang gter gyi tshul du bla sgrub snying po'i sko+or tsam bzhugs/_'di'i dus rtags sil ma la khar 'ba' ra ba'i slob rgyud rje mon rtse bas sgrub sde btab cing phrin las byung ba dang /_lho brag smon la khar a ro'i lugs kyi sgrub sde zhig byung bar de la dgongs par snang /_rdo rje gling pa'i sku tshe'i stod tsam la byon par 'dug +
rig 'dzin 'jigs med gling pa'i thugs sras kyi gtso bo grub pa'i dbang phyug chen po 'jigs med phrin las 'od zer ni/_gter chen sangs rgyas gling pa'i dgongs 'dus lung bstan bka' rgya ma las gsal ba ltar/_bod chen po'i bye brag rdo yul zhes pa'i stod du smug po gdong gi rigs rus ma smad pa bod chung gi rgyud las shing mo glang gi lor sku 'khrungs/_chung ngu nas dam pa'i rigs sad cing dag pa'i snang ba ci rigs shar/_phyogs der gdan sa bka' brgyud dang dpal yul ba'i bshes gnyen rnams las phyag rdzogs kyi gdams pa mthil phyin pa gsan/_zhe chen rab 'byams gnyis pa 'gyur med kun bzang rnam rgyal la gtsug phud phul bas mtshan kun bzang gzhan phan btags/_rten tshangs spyod dge bsnyen gyi tshul du bzhugs/_gangs khrod bde ba chen por lo bdun bar ma chad pas mtshon sgrub pa la rtse gcig tu gzhol bas grub pa'i go 'phang mthon por gshegs/_bod du snga phyir lan bzhir byon pa'i dang po gnyis su rang nyid chos sgor zhugs pa'i 'brel gyis dwags la sgam por grub chen dam chos dbang phyug sogs las zab chos mang du gsan cing nyams rtogs kyi zhun thar bcad/_gzhan yang snga phyir dpal yul karma bkra shis bla slob/_ze chen 'gyur med kun bzang rnam rgyal/_kaHthog pa dri med zhing skyong /_rje dbon pad+ma kun grol rnam rgyal/_nges don bstan 'dzin bzang po sogs rnam 'dren dam pa nyi shu'i zhabs pad las snga 'gyur gtso bor gyur pa'i gsan bsam mtha' yas pa mdzad/_khyad par dgung grangs zhe gcig tu son pa'i dbus byon gsum pa'i skabs don mkhar tshe ring ljongs su rig 'dzin 'jigs med gling pa ched kyis mjal ba na lha sras dam 'dzin gyi rnam 'phrul du ngos bzung zhing phas bu gcig pu la brtse ba ltar bka' drin chen pos bskyangs te chos bdag gi gtso bor dbang bskur/_'jigs med phrin las 'od zer gyi mtshan gyi cod pan dpyangs/_snying thig gsar rnying sogs bka' chos rgya cher bstsal pa ltar phrin las mkha' khyab tu brdal/_slar yang lan bzhi par kun mkhyen gyi drung du 'bul nod dang bcas phebs shing chos 'phro rdzogs par gsan/_de skabs bal bod kyi dus gzing stobs su bdo bas dbus gtsang gi mchog dman thams cad 'jigs skrag chu khol ba lta bu'i skabs dmag zlog gi rim gro dang dbus phyogs su 'jigs pa med pa'i lung bstan bstsal pa mngon du gyur pas gzhung sa chen po nas kyang mthong bkur bdag rgyan tshad med pa gnang /_skabs 'di nas grub chen ces pa'i mtshan yongs su grags pa byung /_tsa ri rong skor la pheb cing /_slar rim gyis mdo smad du phebs nas sa dbang sde dge yum sras kyis dbu blar bkur zhing mthun pa'i rkyen sbyar te zhe rdzogs kaHthog phyogs kyi bla sprul rnams la snga phyir rnying rgyud/_snying thig gsar rnying /_mdzod bdun sogs kun mkhyen nas gsan pa rnams kyi chos 'khor bskor bas mdzad pa don ldan du gyur/_rdza rgyud stod smad rnams su kun mkhyen gyi rang lugs 'dzin pa'i chos sde gnyis tsam btab cing khyad par rong ston bde chen gling pa'i lung bstan las/_lha sras rnam 'phrul byang sems snying stobs can:_rdzogs chen a ti'i ston sgom khyu gcig 'byung:_gser gyi stod smad dgon gnas gsum tsam 'cha':_zhes gsal bar bstan pa ltar/_rang gnas su shugs chen stag mgor lha khang rten gsum sogs legs par bzhengs na'ang mtha' 'khyol ba ma byung /_slar gser stod du yar lung zhes par pad+mo bkod ces pa'i gdan sa btab par sku tshe ril por der bzhugs stan chags/_mdo khams sde dge man dang rgya sog rgya rong yan gyi slob ma dang mi chen sbyin bdag sprin ltar 'dus/_lugs gnyis kyi phrin las gong du 'phel/_bye brag chos kyi 'khor lo rgyun mi 'chad par bskor pa'i grub 'bras gsung las skyes pa'i slob ma'i gtso bo kaHrdzogs zhe chen rgya rong sogs kyi bla chen thams cad dang /_khyad par mkhas mchog 'jigs med skal bzang /_grub dbang dam tshig rdo rje/_kun mkhyen mchog gi sprul sku/_snga 'gyur bstan pa'i shing rta chen po rgyal sras gzhan phan mtha' yas sogs bstan pa 'dzin nus pa'i skyes chen du ma bskrun cing /_de lta bu'i mdzad pa bsam gyis mi khyab pa mthar phyin nas dgung grangs bdun cu don bdun du phebs pa sbrul lo cho 'phrul zla ba'i tshes bcu gsum gyi nam gung tsam du sku la bsnyun zug bltar mngon pa med cing /_rlung gi thim tshul sogs dang zhal chems rigs rgyas par bstsal pa'i mthar rtags dang cho 'phrul mngon par 'du mdzad de chos dbyings zhi ba chen por bshegs pa na dbon dang slob rigs rnams kyis gser gdung bzhengs pa sogs dgongs rdzogs mtha' rgyas su spel/_sku gsung thugs kyi zlos gar da lta'i bar byon pa rnams mkhas grub gnyis ldan gyi bstan pa'i gsal byed chen por byung zhing /_khyad par zab gter gyi bka' babs tshul ni/_lung bstan snga phyi'i babs la brtags na gter gyi bdag por nges kyang phyag bzhes su ma mdzad mod/_mgon po 'od dpag med pa'i zhal yang yang gzigs shing /_o rgyan chen po dang kun mkhyen yab sras kyi byin rlabs la brten dam chos bde chen lam mchog ces snang ba mtha' yas phyi nang gsang gsum gyi sgrub skor/_yang gsang rta mgrin/_sprul pa'i bka' srung ma hA de ba bcas kyi smin grol cha tshang dgongs gter gyi tshul du gtan la phab nas spel bar mdzad pa dang /_gzhan yang dag snang rdzogs chen ston pa bcu gnyis kyi sgrub skor dang /_rje btsun mi la'i bla sgrub/_ma gcig lab sgron gyi sgrub thabs/_dbang chog_/gcod yul chu bo gnyis 'dres kyi skor sogs da lta'i bar rgyun ma nyams par bzhugs shing /_kho bos kyang 'od dpag med kyi skor rnams ci rigs par nos pa yin no/
dran pa nam mkha' ni/_thog mar bon gyi gyer gshen chen po yin yang /_phyis slob dpon gyi drung du chos la sbyangs/_lo tsA yang mkhyen/_rdzu 'phrul gyis byang gi g.yag rgod sdigs mdzub mdzad pa tsam gyis 'gugs/_'dis bon gyi man ngag mang po slob dpon la phul ba slob dpon gyis gter du sbas pa phyis gter kha 'ga' re nas man ngag ci rigs 'byung ba mthong la/_slob dpon las rab byung zhus shing dbu zhwa dmar po zhig bzhes pas/_phung bon mgo dmar du yang grags so/_/de ltar na bris cha 'ga' zhig tu bon zhwa can bri bar snang yang dgos pa med dam snyam/_'di'i skye mtha' gter ston bon po brag tshal sogs mang /_rig 'dzin phrin las lhun grub kyang gnubs chen dang /_dran pa zung gi rnam 'phrul yin par gsungs shing bon phyogs su gyer mi nyi 'od sogs mang du byung bar mngon +
gter ston dri med gling pa ni/_lo tsA ba rgyal ba mchog dbyangs kyi rnam 'phrul rong gter bdud 'dul gling pa'i skye ba de ma thag pa ste/_zung mkhar theg chen gling du gter ston bde chen gling pa'i gdung rigs su 'khrungs/_sku chung ngu'i dus rgyal dbang byang chub rdo rje la gtsug phud phul bas mtshan karma 'gro don mthar phyin zhes bstsal/_sbrags sngags grwa'i sgrig la bzhugs nas gsan sbyang mdzad/_bla ma mnyan pa dge legs sogs dam pa 'ga' zhig las gsar rnying gi chos bka' mang du gsan/_khyad par rig 'dzin thugs mchog rdo rje'i drung nas rdzogs chen kun bzang snying thig gi smin grol gdams khrid rdzogs par gsan nas thugs nyams su bzhes pas nyams rtogs klong du gyur/_chos kyi tshig don mang po shugs 'byung du mkhyen/_thogs med kyi mngon shes shar/_me long rdo rje/_bde chen gling pa/_bdud 'dul gling pa sogs sku'i skye phreng mang po dran/_mgrin pa'i rtsa mdud grol bas rdo rje'i glu'i mdzod brdol/_nges med kyi dben gnas rnams su sgrub pa'i rgyal mtshan btsugs/_zab gter la dbang ba'i lung bstan yang yang thob/_rig 'dzin thugs mchog rdo rjes chos bdag tu ngos bzung zhing gter gyi bka' babs yod tshul dang bslab bya gnang ba ltar/_sbrags yang rdzong nas 'chi med klong gsal rdo rje'i srog sgrub dang /_bla ma'i thugs sgrub yon tan kun 'byung gi chos skor spyan drangs nas gtan la phab/_zung mkhar rdo'i mchod rten gong ma nas thugs rje chen po'i chos skor byon kyang slar 'dabs gter du sbas/_thams cad mkhyen pa bskal bzang rgya mtshos kyang 'gro don phyogs bral du bskyang chog pa'i bka' tham bstsal/_chos bdag gtso bo g.yu sgra'i rnam 'phrul lcags zam pa bstan 'dzin ye shes lhun grub sogs las brgyud pa'i bka' srol ma nyams par bzhugs shing kho bos kyang tshe sgrub dang thugs sgrub pad+ma rgyal po'i gdams skor tsam thos/_gdung rgyud zung mkhar lha sdings su deng sang yang yod do +
gter ston dri med rnam gsum du grags pa'i nang tshan gnubs chen sangs rgyas ye shes kyi rnam 'phrul dri med kun dga' ni/_grwa phyi'i mda' khang dmar du yab dpal 'byor bzang po dang /_yum dgos dgos 'dzom ma gnyis kyi sras su me mo phag gi tshes bcur ngo mtshar ba'i mtshan rtags dang bcas te 'khrungs/_sngags rigs bzang po'i rgyud las byon cing nyid kyang phyis sngags 'chang rdo rje 'dzin pa chen po'i tshul du bzhugs/_thog mar grwa phyi chu bzang du byon nas 'dul ba la sbyangs/_dgung lo nyer gcig par chu bzang pa chen po las bslab tshigs rim par bzhes te mtshan shes rab rgyal mtshan du gsol/_bla ma mkha' 'gro'i lung gis skabs phyes nas bsam yas mchims phur sgrub pa mdzad pas dbang dang gdams ngag rnams o rgyan dngos kyis gnang /_nyams rtogs tshad med par 'khrungs/_khyad par dgung lo nyer drug pa'i steng mchims phu blon po mgul gyi rtse mor o rgyan chen pos lung bstan/_ye shes mtsho rgyal gyis kha byang dngos su bstsal pa ltar de'i phyi lor mchims phu'i mda' brag sna seng ge'i gdong pa can nas/_bla ma nor bu lam khyer/_rdzogs chen mkha' 'gro yang tig_/thugs rje chen po ye shes 'od mchog bcas bla rdzogs thugs gsum rgyas pa dang snying po'i skor/_gzhan yang bka' brgyad gtsug rgyan nor bu/_tshe sgrub rta mchog rol pa/_mkha' 'gro chen mo/_mgon po 'bar chung sogs chos dang nor gter mang du spyan drangs/_mchims phur gter sgrub mngon rtags thon par mdzad/_bla rdzogs thugs gsum gyi sgo nas dbus gtsang lho mon sogs la 'gro don rgya cher spel/_mthar shar kong po'i yul du byon nas chos kyi char chen po phab/_lhun grags dgon pa zhes sngags 'chang gi sde btab/_de lta bu'i mdzad pa mthar phyin nas ngo mtshar ba'i ltas dang bcas zhing khams gzhan du gshegs/_de'i gdan sar nyid kyi thugs sras kyi thu bo mtshan ldan gzhon nu sangs rgyas bzhugs pa la ye shes mkha' 'gros lung bstan rim par byung ba la brten nyid kyi sku'i chas dang 'dus sde bcas dkar chas su bsgyur pa la brten/_lhun grags dkar po bar grags te phrin las rgya cher 'phel/_gdung rgyud kyang kong po'i phyogs su 'gro don can mang du byung bar grags/_'di'i zab gter thugs rje chen po dang mgon po 'bar chung skor dar rgyas che bar byung na'ang phyis 'dir dpe lung gi rgyun ma mjal/_bla rdzogs thugs gsum snying po'i skor rnams rang nyid kyis thugs nyams su bzhes pa las 'chad spel ma mdzad cing ma 'ongs pa'i dus la dgongs te shog ser rnams brag dmar mgrin pa bzang por yang gter du rgyas btab pa/_phyis 'dir zab gter rgya mtsho'i bka' babs pad+ma 'od gsal mdo sngags gling pas thugs rje chen po sems nyid ngal gso'i skor dang lhan cig spyan drangs shing yun ring du gsang ba srung ba nyid gnas dus kyi rten 'brel khyad par can 'grigs pa'i skabs bla ma mkha' 'gro'i lung gis bskul ba ltar gtan la phab cing kho bo la'ang smin grol tshang sprugs su bstsal/_bla ma yid bzhin nor bu dang thugs rje chen po rgyal ba rgya mtsho'i bsnyen sgrub sgrub chen bcas yang yang bgyis pas byin rlabs kyi mtshan ma'ang thob pas snying gi nor bur bcang bar bya ba yin la/_nyer mkho'i yig cha'i zhabs tog kyang 'ga' zhig spel ba'o
a tsa ra sa le'i skye ba dri med lhun po ni/_kong po 'or shong du yab phyag rdor dang /_yum pad+ma mtsho gnyis kyi sras su chu pho 'brug lo dpyid zla ra ba'i bco lngar ngo mtshar ba'i ltas du ma dang bcas te sku 'khrungs/_bla ma g.ya' bzang pas 'gro mgon rgyal ba'i sras su lung bstan nas mtshan rnam par snang mdzad 'od du btags/_lo de'i dbyar zla ra ba'i tshes gcig la gter gyi kha byang phyag tu babs/_dgung lo gsum bzhes pa nas mngon shes phyogs med du shar/_drang nges chos rnams thogs med du gsungs/_o rgyan yab yum dngos su zhal bstan nas dbang dang byin rlabs zhal gdams gnang /_dgung lo bcu gsum pa la mchims kyi gad pa skya bor mchod rten byin rlabs rang babs nas bstan pa thams cad kyi dgongs pa 'dus pa dang /_ring bsrel dam rdzas/_gter kha sum cu rtsa gcig gi kha byang sogs spyan drangs/_mkhan po chos kyi blo gros las rab byung dang /_sa skya dpal ldan bla ma las bsnyen rdzogs bsgrubs/_rig pa'i gnas lnga sogs bslab shes kyi yon tan phul du phyin cing rdzogs pa chen po sogs gsan pa'ang rgya cher mdzad/_zab gter brgya dang sum cu'i kha byang phyag tu son pa phal cher zhig gter nas bzhes pa la 'dus pa skor dgu dang/_don tig 'gro ba kun sgrol/_mchog tig ye shes rnam grol/_zab tig dgongs pa rang grol sogs grags che zhing /_'ga' zhig yang gter du'ang sbas/_rgyal po'i bla dpe mkhan slob chos gsum shangs mtshal gyis bris pa'i rgyas pa 'bum gyi glegs bam 'bum dmar mar grags pa dang /_sku rten ngo mtshar can dang nor gter khyad par can mang po sogs gter kha bsam las 'das pa bzhes/_gter chen sangs rgyas gling pa dang lhan cig tu bstan pa'i spyi rim chen mo'ang mdzad/_lo re bzhin du dpyid rar mchod pa chen po dang /_dbyar rar mchod sbyin stong rtsa/_ston rar swats+tsha 'bum ther/_dgun rar tshogs 'khor brgya rtsa rnams rgyun mi 'chad par mdzad/_rgyal dbang rol pa'i rdo rje la chos bdag gi rten 'brel bsgrigs pas thugs dgyes pa'i rtser son/_ngo mtshar ba'i ltas dang cho 'phrul ni skye bo kun gyi mthun snang du grub pa dus rgyun du byung /_phyogs bcu'i sangs rgyas rnams kyis zhal bstan cing phyag spyi bor bzhag nas/_ma 'ongs pa na steng phyogs lhun grub yon tan dpag tu med pa'i zhing khams su/_de bzhin gshegs pa dri med lhun grub dpal brtsegs rgyal po zhes bya bar 'gyur ba'i lung bstan thob/_de lta bu'i 'gro don mthar phyin nas pad+ma 'od kyi zhing khams su gshegs pa'i gdung rten dang /_mchod rten dkar po 'gul shes sogs tsa gong gi dgon par da lta'ang bzhugs par 'dug_/'di'i zab gter gyi gtso bor don tig 'gro ba kun sgrol du grags pa ngo mtshar can gyi smin grol rnams rdzogs par thob/_khams gsum 'khrugs byed las kyi rlung dmar skor drag sngags mkhan po rnams kyi phyag char deng sang gi bar rgyun yod par snang yang sngar ma thos/_de las gzhan pa'i dpe lung gi rgyun mi bzhugs par mngon
dpal 'bri gung pa zhabs drung dkon mchog rin chen zhes rgyal dbang bsod nams rgya mtsho'i yang srid du grags pa de nyid la thugs rje chen po sogs rtsa gsum gyi dag snang skor pusti zhig bzhugs pa dbang lung gi rgyun bar skabs su yod na'ang da lta bzhugs par ma mngon +