Property:GyatsaBioWylie
Jump to navigation
Jump to search
This is a property of type Text.
'
gter ston sum tshogs ni/_rkyang po grags pa dbang phyug_/sum pa byang chub tshul khrims/_'bre shes rab bla ma gsum gyis yer pa se ba lung nas rta mgrin pad+ma dbang chen yang gsang khros pa'i chos skor rnams spyan drangs nas 'bru tshang gi gnyags ston lha 'bar la shog ser steng nas chos rgyun lan gcig tsam las spel ba ma byung bar gter rngur gyis rkyang po la mdze byung /_sum pa 'das/_'bre smyo bas shog ser rnams rta mgrin gyi grub thob zhu ston bya ba'i lag tu byung yang des zhu sa rtsad ma chod pas las 'phro gter brgyud kyi byin rlabs bka' ma nyams pa yongs grags la med par yun ring 'byams/_ring zhig na grub pa'i dbang phyug chen po 'dar phyar ru pa gtsang jo mo nags rgyal na bzhugs dus slob dpon chen po pad+ma 'byung gnas zhang tshes zla grags bya ba'i sngags pa zhig tu sprul nas dbang lung rnams rdzogs par gnang ste sngags kyi oM de hrIHru bsgyur la sgrubs shig gsungs/_de yang gter ston de dag gis gter thon kyang rngur gyis bar chad byung ba'ang khong rnams kyi gter skal ma yin la/_don gyi chos bdag grub chen 'di yin zhing /_de'i phyir slob dpon rin po ches dngos su chos gnang yang /_bstan rgyun la dgongs nas rta nag gi bla ma rgya la gter brgyud bzhugs pa'ang rtsad chod nas gsan par mdzad pas nye ring gnyis ka'i bdag por gyur pa nas bzung da lta'i bar dbang lung gdams ngag gi rgyun rgya cher 'phel ba kho bos kyang rdzogs par nos/_'dar 'phyar chen po 'dis rdo rje phur pa las kyang dngos grub brnyes/_mtshan ma rdzas kyi phur pa la brten nas mu stegs 'phrog byed dga' bo'i rdzu 'phrul rming med du bcom pa'i phur pa nyid da lta se ra byes pa grwa tshang gi nang rten gyi gtso bor bzhugs shing grags che/_drang srong chen pos dngos su phul ba'i rA hu la srung gso'i gdams pa bzhugs pa bdag gis kyang nos/_gong gi gnyag ston lha 'bar gyis kyang gter kha 'ga' zhig phyung bar grags kyang chos kyi rnam grangs mi gsal zhing rgyun byung tshul yang mi snang /_bon gter lung sde lnga bton par bshad cing gong gi gter ston sum tshogs kyis kyang 'bum dang tshad ma dang 'phrul gyi me long dgu skor sogs bon gter mang zhig bton pa'i dpe phal cher deng sang yod par snang ngo /
'brog mi dpal gyi ye shes ni/_gdung rus 'brog mi yin/_yar 'brog sgang du 'khrungs/_lo tsA mkhas par mkhyen pas ma mo'i rgyud sogs mdo sngags mang du bsgyur/_slob dpon chen pos dbang bskur gnang dus me tog bla med he ru ka'i dkyil 'khor la phog ste srid pa ma mo'i bka' babs/_srid pa bde 'gro'i dkyil 'khor mngon sum du gzigs shing snang srid ma mo thams cad bran tu 'khol/_yar stod sham po gangs ri la sgrub gnas mdzad pas/_lha chen sham po'i srog gi bla rdo lha klu mi'i rin po che bco lnga'i rgyu las grub pa drod rta rnga tsam rgyun du yod pa zhig gter du bcol ba phyis so skal ldan rdo rjes bton par grags/_sku'i rten rig sngags 'chang chen po'i tshul du bzhugs pa yin pas gdung dang dbon rgyud kyang sngags 'chang grub brnyes dang lo tsA ba sogs mang du byon cing gdung rigs da lta'ang yod/_sprul pa'i gter ston chen po ra shag chos 'bar du grags pa'ang 'di nyid dang lo chen bai ro zung du 'jug pa'i sprul pa dang /_kha rag bde chen gling pa snga phyi bar gsum gyis mtshon rnam 'phrul ci rigs byon par mngon +
gter ston sum tshogs ni/_rkyang po grags pa dbang phyug_/sum pa byang chub tshul khrims/_'bre shes rab bla ma gsum gyis yer pa se ba lung nas rta mgrin pad+ma dbang chen yang gsang khros pa'i chos skor rnams spyan drangs nas 'bru tshang gi gnyags ston lha 'bar la shog ser steng nas chos rgyun lan gcig tsam las spel ba ma byung bar gter rngur gyis rkyang po la mdze byung /_sum pa 'das/_'bre smyo bas shog ser rnams rta mgrin gyi grub thob zhu ston bya ba'i lag tu byung yang des zhu sa rtsad ma chod pas las 'phro gter brgyud kyi byin rlabs bka' ma nyams pa yongs grags la med par yun ring 'byams/_ring zhig na grub pa'i dbang phyug chen po 'dar phyar ru pa gtsang jo mo nags rgyal na bzhugs dus slob dpon chen po pad+ma 'byung gnas zhang tshes zla grags bya ba'i sngags pa zhig tu sprul nas dbang lung rnams rdzogs par gnang ste sngags kyi oM de hrIHru bsgyur la sgrubs shig gsungs/_de yang gter ston de dag gis gter thon kyang rngur gyis bar chad byung ba'ang khong rnams kyi gter skal ma yin la/_don gyi chos bdag grub chen 'di yin zhing /_de'i phyir slob dpon rin po ches dngos su chos gnang yang /_bstan rgyun la dgongs nas rta nag gi bla ma rgya la gter brgyud bzhugs pa'ang rtsad chod nas gsan par mdzad pas nye ring gnyis ka'i bdag por gyur pa nas bzung da lta'i bar dbang lung gdams ngag gi rgyun rgya cher 'phel ba kho bos kyang rdzogs par nos/_'dar 'phyar chen po 'dis rdo rje phur pa las kyang dngos grub brnyes/_mtshan ma rdzas kyi phur pa la brten nas mu stegs 'phrog byed dga' bo'i rdzu 'phrul rming med du bcom pa'i phur pa nyid da lta se ra byes pa grwa tshang gi nang rten gyi gtso bor bzhugs shing grags che/_drang srong chen pos dngos su phul ba'i rA hu la srung gso'i gdams pa bzhugs pa bdag gis kyang nos/_gong gi gnyag ston lha 'bar gyis kyang gter kha 'ga' zhig phyung bar grags kyang chos kyi rnam grangs mi gsal zhing rgyun byung tshul yang mi snang /_bon gter lung sde lnga bton par bshad cing gong gi gter ston sum tshogs kyis kyang 'bum dang tshad ma dang 'phrul gyi me long dgu skor sogs bon gter mang zhig bton pa'i dpe phal cher deng sang yod par snang ngo /
snga 'gyur lo tsA ba brgya rtsa brgyad kyi ya gyal o rgyan chen po'i zhal slob lo tsA ba rin chen bzang po dang shel dkar bza' zung gi rnam 'phrul 'gro 'dul las 'phro gling pa ni/_gnyal stod du snyi ba'i rigs las yab dpal 'byor rgyal po dang yum bkra shis lha mo gnyis kyi sras su ngo mtshar ba'i ltas dang bcas sku bltams/_dag snang dpag med shar/_khyad par dgung lo bcu drug par zab gter gyi kha byang thog mar babs/_bco brgyad par chos lung ri bo cher mtshungs med nam mkha' rgyal po la gtsug phud phul bas mtshan nam mkha' rdo rjer grags/_'ba' ra bka' brgyud kyi zab khrid gsan cing thugs nyams su bzhes/_khyad par rig 'dzin pad+ma gling pa'i zhabs la gtugs nas thos bsam gyi sgro 'dogs bcad/_gdams khrid zab mos thugs rgyud smin/_rje de nyid kyi thugs sras snying gi bu gsum las/_gnyal lor rdo rje'i mtshan can du ngos bzung zhing sprul pa'i gter ston du lung bstan pa ltar/_dgung lo nyer gcig lon pa'i tshe sngags srung e ka dzA Tis rjes su bskul ba bzhin mon dom tshang rong la byon/_mtsho rgyal phug par rta mgrin gyi tshogs mchod mdzad pas ye shes mkha' 'gros kha byang dngos su bstsal pa ltar zla ba phug tu byon nas ngo mtshar ba'i cho 'phrul dang bcas te zab gter thog mar spyan drangs pa nas brtsam/_spa gro stag tshang /_mkhar chu dpal gyi phug ring/_lho skyer chu'i lha khang /_mkha' 'gro gsang phug_/sbrags yang rdzong /_dpal phug nyi zla 'bar ba'i gsang mdzod/_mkha' 'gro brag gi bya skyibs/_bsam yas mchims phu/_mchod rten dkar po/_sham po gangs/_phra mo brag sogs nas thugs rje chen po don gsal sgron me/_bka' brgyad yang gsang bla med/_zab chos kun bzang thugs tig sogs chos dang drag sngags dam rdzas rten gyi skor sogs mtha' yas pa spyan drangs/_sgrub gnas rnams su bla ma zhi drag_/bka' brgyad/_phur pa sogs kyi sgrub chen/_sman sgrub/_skye bdun ril sgrub/_gtor sgrub sogs mang du mdzad cing gdul bya bsam gyis mi khyab pa smin grol la bkod cing sku tshe dang phrin las mthar phyin/_dbon po lha'i zla ba zhes mkhyen rtogs rmad du byung bas kyang 'gro don dpag med mdzad/_sku'i skye ba'ang 'ga' zhig byon par grags shing khyad par gdung rgyud phyis kyi bar sngags 'chang rdo rje 'dzin pa rim par byon nas chos brgyud 'phel rgyas su gyur na'ang deng sang rgyun yod par ma mngon kyang /_thugs rje chen po'i skor rnams rje bla mar nye brgyud du bka' babs pa ltar bdag gis kyang smin grol rdzogs par nos so/
rgya gar g+ha na ru dang bi na sa'i:_paN+Di ta ni gnyis gsum bod du 'byung:_lha sa'i jo shAka 'di la mchod pa byed:_lho kong byang kong sbas pa'i gter kha 'di:_mi bzhag 'don pa'i rtags de bstan nas 'byung:_o rgyan las 'phro gling pa zhes bya 'byung:_zhes pa'i gter ston las 'phro gling pa'am rig 'dzin 'ja' tshon snying po dang sngags 'chang hU~M nag me 'bar zhes sku gcig la mtshan gsum du grags pa'i dge slong rdo rje 'dzin pa chen po 'di ni/_sngon dpal o rgyan chen po'i zhal slob zag med 'od lus grub pa brgya rtsa brgyad kyi mchog gyur nyang ban ting 'dzin bzang po 'bras bu mthar phyin pa'i thugs rje yas sprul du byon pa ste/_kong yul wa ru gnam tshal du/_yab chos skyong mgon po dang /_yum nam langs bu khrid gnyis kyi sras su shing mo bya lor skar ma rgyal la babs pa'i nyin sku 'khrungs/_sku chung ngu'i dus nas chos kyi bag chags dang ldan zhing /_dgung lo gsum pa'i dus nas yi ge brda' ston tsam gyis mkhyen/_rdo la phyag zhabs kyi rjes kyang mang du byon/_bcu gnyis nas nyi shur ma pheb bar du slob gnyer dang /_khyad par gso rig la sbyangs pas mkhas par mkhyen/_de dag gi dus skabs rnams su dngos nyams dang rmi lam du o rgyan rin po che yang yang mjal bar byung /_thugs nges 'byung dang skyo shas drag pos rgyud bskul nas chos kho na la rtse gcig tu thugs 'dun gtad cing 'khor ba'i gnas grogs thams cad me 'obs lta bur gzigs nas chos kyi rje mi pham bkra shis blo gros kyi drung du chos la bros nas byon pas/_rje de'i mtshan lam du/_slob dpon pad+mas bzhengs pa'i mchod rten rnying pa zhig bud med 'gas gdan drangs nas rab gnas bskyar dgos zer ba la rab gnas mdzad pas 'od du 'bar bar gzigs pas skal ldan du mkhyen/_der rab tu byung /_ngag dbang chos rgyal dbang por mtshan gsol/_gsang sngags kyi dbang khrid lung sogs gdams pa mtha' yas par gsan cing rtse gcig tu sgrub pa kho nas dus 'da' bar mdzad/_gzhan yang zhabs drung nor bu brgyan pa/_'brug pa thams cad mkhyen pa/_mnyam med lha rtse ba sogs las mdo sngags bka' gter gsar rnying thams cad ma gsan pa med pa lta bur mdzad/_khyad par lha rtse ba las bsnyen rdzogs zhus/_rten dge slong gi dngos po can du bsgrubs/_mi lo bcu bdun du 'dag sbyar kho na mdzad nas sgrub pa'i rgyal mtshan 'dzug par mdzad pa'i dus su/_gter gyi lung bstan mang du byung yang ji mi snyam par bzhag kyang phyag rdor gyi bsnyen pa dung song ba'i tshe chos rje rin po che mi pham bkra shis blo gros kyis bskul nas/_lcags pho sprel lo zla ba dang po'i tshes bcu la gter bzhes pa'i thog mar lcags khro'i bya chung bye'u phrug tsam zhig gi nang nas gter gyi kha byang mtsho rgyal gyi phyag bris ma phyag tu 'byor pa ltar/_brag lung hom 'phrang lcags kyi sgo mo nas yang zab dkon mchog spyi 'dus sogs gsang gter du bzhes nas gter sgrub dang gsang rgya mthar phyin par mdzad/_gzhan yang kong po bu chu dang /_byang 'phreng mdzes zhes ljon pa lung gi gnas sgo dang /_snye mo lha ri/_kong 'phrang dge 'dun gnas/_dbu ru zhwa yi lha khang sogs nas thugs rje chen po dang /_rta phag yid bzhin nor bu/_zhi khro nges don snying po/_tshe sgrub gnam lcags rdo rje/_rdo rje gro lod/_dpal mgon ma ning skor/_gnas kyi lam yig mang po sogs zab gter mang po spyan drangs/_dkon mchog spyi 'dus sogs 'ga' zhig gsang gter las phal cher khrom gter mdzad/_mngon shes dang rdzu 'phrul phyogs med du shar nas lkog gyur sgrib med du gzigs pa dang /_chu dang g.yang sa sogs la'ang thogs med du gshegs te/_khyad par snye mo lha ri'i gter bton pa'i dus/_kong po pra ti ba sogs log pa'i blo can rnams kyis sa bcud nyams kyis dogs nas dmag gis gter gnas bsrungs bar byas pas/_gter ston thugs nyams 'ur te rta la chibs nas brag g.yang chen po bya min pa mi thar ba me long gi ngos 'dra ba zhig la chibs rgyug gnang bas phebs shing brag gi ngos la chibs pa'i zhabs rjes bzhag_/gter de nyid skad cig la spyan drangs nas gshegs pa'i brtul zhugs dang rdzu 'phrul chen po bstan nas dmag mi rnam spa bkong bas thams cad rtab rtab por gyur zhing slar dad pa'i sa la bkod/_stobs dang nus pa bsam gyis mi khyab pas dam sri mnan pa dang mtha' dmag zlog pa sogs bod spyi bye brag gi phan bde spel ba'i phrin las mang du mdzad/_skal ldan mang po rjes su bzung nas bka' gter gsar rnying gi chos tshul mang po'i smin grol gyi bdud rtsi stsol bar mdzad/_rje nyid sku btsun zhing dge slong gi dngos po las mi 'da' bar kun spang gi mdzad pa skyong bzhin du gdul bya rnams kyang tshul der bkri zhing yang dag pa'i lam la gzhol zhing 'babs par mdzad do/_/bang ri 'jog po zhes nyid kyis gnas sgo phyes pa'i gnas khyad 'phags zhig yod pa'i dben zhing mtho ba'i sar sgrub sde btab pa deng sang yang ma nyams par yod la dbon brgyud dang sprul brgyud sogs kyis 'dzin skyong gnang /_chos bdag gi thog ma sgam po zhabs drung nor bu brgyan pas phrin las kyis sgo phye ba nas bzung /_rgyal ba'i dbang po zhwa dmar nag_/rgyal tshab grags pa don grub/_'bri gung pa chos kyi grags pa/_'brug pa dpag bsam dbang po/_rdor brag rig 'dzin ngag gi dbang po/_rtse le sna tshogs rang grol/_lha btsun nam mkha' 'jigs med/_rig 'dzin phrin las lhun grub/_bka' 'gyur ba mgon po bsod nams mchog ldan/_spu bo rba kha sprul sku rig 'dzin chos kyi rgya mtsho/_sde dge grub thob kun dga' rgya mtsho/_gter chen bdud 'dul rdo rje/_ta bla pad+ma ma ti sogs dbus gtsang khams gsum rgya cher 'dus shing dngos dang brgyud nas shar phyogs rgya mtsho'i mtha' tshun chad phrin las rgyas par 'phel ba deng sang yang ma nyams par gnas la/_kho bos kyang zab gter pod drug bka' 'bum dang bcas pa yongs su rdzogs par nos shing /_de dag spyi dang khyad par yang zab dkon mchog spyi 'dus bskyed rdzogs nyams len rgyun gyi rnal 'byor snying por bzung bas byin rlabs kyi mtshan ma'ang thob/_khrid yig dang bsnyen yig chen mo sogs yig cha/_de dag dang zhi khro nges don snying po cha lag bcas par du bkod cing skyabs mgon rdo rje 'chang pad+ma'i zhabs kyi gser gdung chen mo'i mdun tshes bcu'i sgrub mchod kyi rgyun 'dzug par bskul ba sogs phrin las spel ba yin no/_/mdor na sprul pa'i gter ston 'di nyid grub don ltar na/_rten 'brel rab 'bring tha ma yang mtha' bzhir gsungs pa'i phyi ma'i dbang du gyur mod/_thugs bskyed dang sbyangs stobs khyad par 'phags shing /_rang gis zab gter rnams nyams bzhes mthar phyin pa mdzad pa la brten gter chos spyi dang khyad par yang zab bla sgrub gsar rnying ris med du dar ba 'di ltar dang /_chos brgyud las mi dbang bsod nams stobs rgyal kho na'i dus kyang dwags por 'od lus grub pa gnyis sogs snga phyi mang du byung bar snang /_de lta bu'i mdzad pa mthar phyin nas dgung lo bdun cu don gnyis par bang ri 'jog por rtags dang cho 'phrul lkog tu ma gyur pa bstan cing mngon par mkhyen bzhin du dag pa'i zhing khams chen por gshegs pa'i tshul bstan pa yin no/_/spyir las 'phro gling pa'i mtshan gyi cod pan 'dzin pa snga phyi lnga tsam byon pa thams cad kyang gter ston tshad thub kho nar nges kyang /_pad+ma bka' thang du gter gnas kyi nges pa dang bcas par lung bstan pa ni 'di gcig pur yongs su grags so/
rig 'dzin chen po rgod ldem can gyi yang srid dpal ldan 'jam dbyangs bla ma ni/_gtsang nyang stod du sku 'khrungs/_sku gzhon nu nas gnas rnying tshogs pa'i grwa sar bzhugs par mdzad nas mdo sngags thams cad la gsan bsam gyis sgro 'dogs chod par mdzad/_skabs shig nyang stod khro sgang du chos 'khor la phebs pas/_gtsug lag khang gi 'gram gseb zhig tu so phag chen po zhig 'dug pa/_pha gi bcag rgyu byung na dgongs pa zhig byung ste/_grwa pa gzhan med pa'i shul du so phag bcag pa'i nang nas gter gyi kha byang byung ste/_sgrol byed nag po'i mkhar mkha' 'gro gsang mdzod phug nas rus sbal dmar po'i khog pa bton pa'i nang rtsa gsum dril sgrub skor phyi nang gsang ba de kho na nyid bkol byang dang bcas pa/_bka' srung sgrol byed nag po'i skor dang bcas spyan drangs/_gsol 'debs 'di'i grol tshad kyang /_gang zag bye ba dgu khri dang /_'bum phrag lnga rnams gsol 'debs 'di yis grol/_zhes gsungs pa'i zab chos 'di nyid gtsang nyang stod shab/_shangs dang rta nag 'o yug sogs gtsang gi phyogs su 'gro don dang phrin las che zhing chos rgyun ma chad par bzhugs pa las kho bos kyang smin grol gyi gdams pa nos so +
chos rgyal khri srong lde'u btsan dang lang gro lo tsA zung du 'jug pa'i rnam 'phrul gnas gsar ba mkhyen brtse'i dbang phyug mdo sngags gling pa ni/_rtsis gnas gsar ba 'a zha'i gdung rigs yab stong dpon nam mkha' rdo rje dang yum tshe brtan bu 'dren gnyis kyi sras su shing pho spre'u lor gtsang stod bo dong du ngo mtshar ba'i ltas dang bcas sku bltams/_sku chung ngu nas mi 'phrog pa'i mkhyen rab dang dad mos snying rje'i rtsal rgyas shing dam pa'i kun spyod kho na las tha mal ba'i spyod pa gtan nas mi mdzad/_dgung lo gcig par rje btsun sgo rum pas bla ma gsang 'dus kyi zlum po bzhi dbang gnang ba thugs la gsal bar dran cing saMskr-i ta'i skad thol byung du gsung ba dang /_ljags klog ma bzhes pa'i skabs su rnal 'byor dbang phyug bir wa pa la bstod pa'i tshigs bcad thol byung du gsung ba sogs ngo mtshar bsam gyis mi khyab/_'bri klog rig gnas sogs thogs med du mkhyen/_dgung lo brgyad bzhes pa'i skabs rdo rje 'chang kun dga' legs pa'i 'byung gnas las rab tu byung /_mtshan mkhyen brtse'i dbang phyug bstan pa'i rgyal mtshan dpal bzang por gsol/_tshar chen rdo rje 'chang /_sgo rum pa gtso bor gyur pa'i yongs 'dzin rnams las gsan pa rgya mtsho lta bu gnang /_bsnyen sgrub mang po dang /_rdo rje'i rnal 'byor sogs la thugs dam rtse gcig tu mdzad/_dgung lo nyi shu pa la bsnyen rdzogs bzhes te btsun pa'i dper 'os pa'i kun spyod gtsang /_sku mtshams bzhugs pa'i khongs su rgya gar nub phyogs nA ka ko Ti'i rgyal po'i sras ma Ni ka nA tha zhes bya ba 'chi med grub pa'i dzo ki zhig byon pa las o rgyan pad+ma sku gsum gyi sgrub thabs dang/_a b+hi d+hA na las byung ba'i phag mo'i byin rlabs/_b+h+rU rlung gi man ngag sogs gsan/_slob dpon pad+ma'i sku rgyal po lugs blta bas chog mi shes pa zhig thugs dam rten tu bzhugs pa gzigs pas/_o rgyan sgrub thabs ni rat+na gling pa'i gter ma dang don gcig par 'dug cing /_gu ru rgyal po lugs pe har gyis bod du sprul pa yin zer ba'i rdzun phug rdib/_sngar rnying ma la log rtog yod pa der sangs/_skur zhus byas pa la thugs 'gyod chen po skyes nas/_rnying ma bka' gter gyi chos yod do cog gsan bsam dang 'chad spel mdzad cing grub mtha'i rkang bzung ba'i dam bca' mdzad/_de phyin chad dzo ki dang rgya gar gyi spyod pa la thugs dgyes shing na ga ra dang kha che'i yi ge sogs brdol shes su gyur/_rta nag thub bstan du mtshan nyid kyi gsan sbyang mthar phyin par mdzad/_rje tshar chen las sa skya pa'i chos bka' spyi dang khyad par lam 'bras slob bshad sogs snyan brgyud kyi gdams pa rdzogs par gsan nas bstan pa'i bdag por dbang bskur ba thob/_lung bstan ltar grom pa rgyang du gnas gzigs byon/_'dir gter gnas dang gter rtags mthong gsungs pa tsam las gter 'don tshul ma gsungs shing /_mtshan nyid kyi grwa sar bzhugs pa dang dam grib kyi skyon gyis gter kha mang po bzhes ma grub kyang /_thog ser sogs gdams pa ngo mtshar ba pusti gcig tsam bzhes pa'ang bshad/_se bkra bzang ba dang /_mnga' ris rig 'dzin chen po sogs las rnying ma bka' gter mang du gsan nas gsar rnying gnyis ka'i chos kyi phrin las mtha' yas pa spel/_gdan sa chen po zha lu'i chos khrir zhabs bkod nas bu ston thams cad mkhyen pa'i bka' srol nyams pa gso ba sogs bstan pa'i zhabs tog rlabs chen mdzad nas dgung lo bzhi bcu rtsa bzhi par zhing khams gzhan du gshegs/_sku'i dbon dbang phyug rab brtan dang mgon po bsod nams mchog ldan zhes bstan pa'i nyi ma chen po tshar chen rnam 'phrul de nyid nas brtsam/_sprul pa'i rnam rol da lta'i bar rim par byung ba yin la/_'di nyid nas brgyud pa'i b+h+rU rlung gi gdams ngag tsam zhig bdag gis kyang nos so
da ni de dag thams cad las kyang rtsod ldan tha ma'i dus 'dir ngo mtshar ba'i rnam thar du mas khyad par 'phags pa/_mkhas grub gter ston thams cad kyi 'khor los sgyur ba chen po pad+ma 'od gsal mdo sngags gling pa'i rnam thar zhal gsungs nyid rtsa bar bzung ste mdo tsam bkod na/_rje 'di nyid ngo bo slob dpon 'jam dpal bshes gnyen dang /_paN chen bi ma mi tra dbyer med pa'i thugs rje'i rang gzugs su shar ba yin cing /_gdul bya so so'i blo ngor 'phags pa'i yul du grub chen rdo rje dril bu pa/_paN+Di ta sgo mtha' yas pa'i blo gros/_paN chen nags kyi rin chen la sogs pa dang /_bod yul du chos rgyal khri srong lde'u btsan/_gu ru chos dbang /_ras chung rdor grags/_sa skya rje btsun grags rgyal/_grub chen thang rgyal/_lha btsun nam mkha' 'jigs med sogs gsar rnying gi skyes chen dam pa du ma'i rnam par 'phrul par bstan pa rje nyid nas kyang rjes su dran pa dang /_khyad par rgyal sras mchog grub rgyal po nyid gter 'byin rkyang pa'i skye ba bcu gsum du 'byon par gsungs pa'i thog mar sangs rgyas bla ma nas bcu gnyis pa chos rje gling pa'i bar byon zin nas bcu gsum pa rje 'di nyid yin par rdo rje'i lung las gsal bar mtshon pa dang /_gter ston rgyal po lnga la bran brgyas bskor:_zhes gsungs pa'i lnga pa mdo sngags gling pa ni mchog ldan mgon po yin par grags kyang rten 'brel 'chol bas gter kha gang yang phyag tu ma 'byor cing glo bur du mdzad pa brtul pas yin par nges pa'i rgyal po lnga pa ni rje 'di nyid kho nar tshad mas grub la phyis dus byon pa'i gter ston tshad ma thams cad 'di nyid kyi bran du grub pa'ang mngon sum gyis gsal lo/_/de la da lta'i sprul pa'i sgyu 'phrul bstan pa'i yul ni/_mnga' bdag nyang rin po che'i gter lung las/_rtse sgang zhes pa'i ri bo'i mdun:_pha waM klu dbang 'khyil pa'i steng:_mnga' bdag 'jam pa'i dbyangs zhes 'byung:_bcu gsum zab mo'i gter la spyod:_ces dang /_rin chen gling pa/_rdor gling /_mnga' ris paN chen/_bdud 'dul rdo rje sogs gter kha mang po las lung gis gsal bar bstan pa ltar/_mdo khams sde dge'i mnga' ris gter klung gi bye brag rgyab ri rtse sgang zhes pa'i mdun/_brag ri sbrul 'khyil pa'i gzugs su yod pa'i steng /_dil mgo zhes pa'i grong du yab gnyos kyi rigs chos rgyal sde dge'i drung chen lugs gnyis kyi blo gros dpe zlar 'os pa rin chen dbang rgyal dang /_yum dge rab gnyer chen sog mo bza' bsod nams mtsho gnyis kyi sras su rab yid lcags pho 'brug gi lo/_thub pa'i dbang pos chos 'khor thog mar bskor ba'i dus chen chu stod zla ba'i dkar phyogs kyi rdzogs pa dang po la/_dbyar ru khyung chen brag gi nye 'dabs su yod pa'i skabs/_ras dkar gyi lding gur phub pa'i nang du dbu skra nag po sil bur yod pa'i rnam pas sku bltams shing ngo mtshar ba'i ltas mtshan du ma'ang byung /_'di ni gu ru tshe brtan rgyal mtshan gyi gter lung las/_mon bu spyi ring skra yi l+wa ba can:_ri bo khyung chen lding ba'i zhol du 'byung:_zhes 'byung ba dang yang shin tu 'byor ba yin no/_/thugs kyis dran tsam gyi dus ye shes mgon po phyag drug pa dang sngags srung e ka dzA Tis yang yang brtse zhing skyong ba dang /_sngon rabs kyi skye ba mang po 'al 'ol rjes su dran/_sku chung ngu nas theg pa chen po'i rigs sad cing /_khyad par rab tu byung ba'i phyogs kho na thugs la 'dun/_mkhyen rab dang rnam dpyod 'gran zla bral bas 'bri klog sogs tshegs med par mkhyen cing glegs bam phal cher tshar re gzigs pas tshig don thugs la chub/_dgung lo nyer gcig pa la o rgyan smin grol gling gi mkhan rig 'dzin bzang po las bsnyen par rdzogs/_'jam mgon sa skya pa rdo rje rin chen dang /_smin gling khri chen 'gyur med sangs rgyas kun dga' sogs las shing rta gnyis kyi bka' srol dang 'brel ba'i thugs bskyed bzhes/_thar rtse mkhan rin po che mched las bde dgyes/_smin gling khri chen las yang dag so lugs/_rig 'dzin thugs thig_/zhe chen pa kun gzigs 'gyur med mthu stobs rnam rgyal las sgyu 'phrul gsang ba snying po'i dbang bskur gsan pas sngags kyi sdom pa'i rtsa ba btsugs/_skye sprul gyi go sa dang rigs rus stobs 'byor gyi dregs pa rtsad nas bsnyil te dka' chen dang du bzhes/_'bad pa dang brtson 'grus chen pos dbus gtsang khams gsum gyi bla ma rdo rje 'dzin pa/_dge ba'i bshes gnyen/_rig pa'i gnas la mkhas pa sogs yongs 'dzin brgya dang lnga bcu tsam bsten te bzo gso sgra tshad yan lag rig pa'i gnas bcur grags pa rnams dang /_'dul mdzod dbu phar gyis mtshon mtshan nyid phyogs kyi gzhung bshad gsan sbyang mthar phyin par mdzad/_rnying ma bka' gter/_bka' gdams gsar rnying /_sa ngor tshar gsum/_bka' brgyud kaM tshang/_'bri stag 'brug pa/_jo zhal bo dong sogs sngon gyi lugs srol ma nyams par bzhugs pa thams cad kyi smin grol yongs rdzogs/_sgyu 'phrul gsang ba snying po/_dus kyi 'khor lo/_bde dgyes gsang gsum sogs rgyud dang bstan bcos kyi bshad srol gang yod dang /_rgyal ba'i bka' 'gyur rin po che dang /_rnying ma rgyud 'bum/_bstan 'gyur las rgyun gang bzhugs kyi gtsos bod yul grub mtha' ris med kyi bstan bcos yongs bsdoms glegs bam bdun brgya tsam gyi bklags lung gsan pa sogs mdor na mi lo bcu gsum tsam du thos pa kho na btsal/_bshad rgyud 'degs pa'i ka chen bcur grags pa rnams kyi ring lugs phal mo che gsan/_rje 'dis ni glegs bam gzigs pa tsam gyis don mthil phyin pa mkhyen cing nam yang mi bsnyel ba'i gzungs mnga' yang chos la gal chung mi mdzad pa'i rnam thar ston slad gsan pa tsam du ma bzhag par sbyang goms mthar phyin pas grub mtha' so so'i lta spyod dang khas len gyi gnad/_so so'i srol dang de'i ring lugs 'chugs med yin min sogs zhib la ma 'dres par mkhyen pa'i chos spyan rdul med par mnga' ba 'di tsam yang da lta'i gang zag mchog dman sus kyang bsgrun du mi snang ngo /_/mdo rgyud bstan bcos gang gsan pa rnams kyi smin grol rgyab brten dang bcas pa phal mo che zhig ni lan grangs mang du 'chad pa dang /_gang yang tshar re ma 'chad pa mi mnga' ba zang zing med pa'i chos sbyin kho nas dam pa'i skyes bu mchog rnams nas mu to phal pa yan chad don gnyer so so'i re ba tshul bzhin skong bar mdzad/_sku chung ngu'i dus nas gdul bya 'gro don du ming btags pa'i grong chog ldom bu sogs log 'tsho'i dkor sdud gtan nas ma mdzad kyang 'bar ba gsum dang 'du ba gsum gyi yon tan phyir shar bas zang zing gi dngos po 'bad med byung ba thams cad gnas min du chud zos phra mo tsam yang ma btang par/_sku rten gser zangs kho na las grub pa stong phrag gnyis tsam dang /_gsung rten glegs bam pusti bzhi bcu la nye ba'i spar/_bris ma dang spar ma bsdams pa'i pusti ka stong phrag gnyis tsam/_thugs rten lhun grub steng gi mchod sdong chen mo'i gtsos brgya phrag lhag tsam gser zangs las grub pa/_de dag bzhugs gnas lha khang che chung bcu gsum tsam bkod legs par bzhengs shing dus dang rgyun gyi mchod pa btsugs/_gnas gzhi gsar bzhengs rigs dus dbang gis tshul ldan 'byung dka' bas spros pa ma mdzad kyang phyis tshod dus zing dbang gis stod smad 'khrugs long skabs dgon gnas phal mo che nyams gud cher gyur pa rnams la rje nyid nas kyang dgon pa che chung dang bstun pa'i gnang sbyin dngos ja stong phrag gsum lhag pa dang /_rgya bod kyi mi dpon/_chos rgyal sde dge dpon blon rnams la mthun sbyor mdzad gal gnad bkrol gnang ba'i sgo nas sngar gnas sor chud kyi nyams gsos gsar bzhengs dang /_mchod thebs kyi zhal 'debs/_lugs gnas tshul mthun gyi zhal bsgos rnams kyi sgo nas dar rgyas 'phel ba'i bka' drin rlabs po che bstsal/_phan tshun gyi chos sde che chung rnams la lo re bzhin du gzungs sngags bsngo ba'i rten yon sbyar gnang ba snga rjes dngos ja bzhi stong gi rtsa ba phul/_spyir byang chub kyi sems rin po che rnam pa gnyis la brtan pa thob pa dang /_sgos grub mtha' gang la'ang dag snang dang mos gus kyi rtsal rgyas pa ma gtogs phyogs ris dang log rtog gtan nas mi mnga' ba'i don gyis sa skya bka' brgyud rnying ma dge lugs kyi bstan 'dzin skyes mchog yongs su grags pa rnams dang /_dge ba'i bshes gnyen/_ri khrod sgrub pa po/_chos pa nyams chung /_g.yung drung bon lugs 'dzin pa tshun chad kyi ris su ma chad pa'i slob ma grangs las 'das shing /_rgya bod kyi dpon chen mang po'i gtsos nyin re bzhin yang rgyun mi chad pa'i 'dus pa tshad bzung med pa la mos pa dang 'tshams pa'i chos sbyin/_rkyen sel dbang bka' byin rlabs kyi 'brel ba sogs ni ma thob pa med pa lta bur snang/_chos brgyad kyi 'ching ba las grol bas mchog dman gang la'ang ngo srung dang re dogs kyis mtshon/_mi chos kyi spros pa gting nas chod pas tshe blos thong ba'i bya btang rnams kyi rgyal po'i rnam thar bzung /_snga phyi mi lo bcu gsum tsam du rgyud sde gsar rnying gi lhag pa'i lha du ma'i bsnyen sgrub dang /_rje btsun grol mchog gi gsung rab khrid brgya gtso bor gyur pa'i zab khrid rnams re re bzhin nyams bzhes mdzad pas dam tshig zhal bzhes rjes su bsgrub pa 'di kho na'i rnam thar yang sus kyang 'gran zla bral ba ste spang klog bya ba las kyi 'khor lo gsum las btsams pa'i phyi'i rnam thar mdor bsdus pa'o/_/gangs can gyi ljongs su sgrub brgyud kyi shing rta chen po brgyad du grags pa mkhan slob chos gsum gyi bka' drin las byung ba snga 'gyur rnying ma ba/_jo bo rje dpal ldan a ti sha'i bka' srol lha chos bdun ldan bka' gdams pa/_grub chen bi ru pa'i thugs bcud dpal sa skya pa yab sras las byon pa gdams ngag lam 'bras bu dang bcas pa/_bka' bzhi brgyud pa'i gdams ngag mar mi dwags gsum las brgyud pa bka' brgyud che bzhi chung brgyad/_mkhas grub khyung po'i gser chos dpal ldan shangs pa bka' brgyud/_rgyud thams cad kyi rgyal po dpal dus kyi 'khor lo'i rdzogs rim rdo rje'i rnal 'byor rtsal du bton pa sbyor ba yan lag drug pa/_grub chen dam pa sangs rgyas kyi bka' srol dam chos sdug bsngal zhi byed yan lag gcod yul dang bcas pa/_grub chen o rgyan pa la rdo rje btsun mos dngos su bstsal pa rdo rje gsum gyi bsnyen sgrub rnams brgyud pa'i zam pa ma chad cing sngon gyi lugs srol ma nyams par bzhugs pa rnams la so so nas dad cing mos pa tshad med pas sku ngal khyad du bsad de 'bad brtson drag pos so so'i khungs dang 'brel ba'i yongs 'dzin rnams las smin grol gyi rim pa tshang la ma nor ba rdzogs par gsan cing /_de dag bsam pas sgro 'dogs gcod pa dang /_sgom pas thugs nyams bzhes pa'i skabs rnams su dngos nyams rmi lam ci rigs par/_'phags bod mkhas grub/_yi dam rgyal ba zhi khro/_gnas gsum gyi mkha' 'gro'i tshogs rnams kyis gsang ba gsum gyis byin gyis brlabs pa dang nye brgyud kyi gdams pa bstsal ba sogs skad cig re re la'ang dag pa'i gzigs snang mtha' yas kyang phyogs mtshon tsam las/_zhal gzigs mngon shes sogs mi chos bla ma nam yang sgrog par mi mdzad pas de tsam gyis rtogs par 'gyur ba dang /_gtso bor shing rta brgyad kyi rim pa gnyis kyi tshul thugs su chud pas 'chad rtsod rtsom gsum la chags thogs ma mchis shing 'khrul pa'i dri ma dang bral bas skal ldan rnams rjes su 'dzin par mdzad pa ni nang gi rnam thar sa bon tsam smos pa'o/_khyad par grub chen thang stong rgyal po'i rdo rje'i lung las/_bdag dang gnyis min rnal 'byor pa:_mtshan nyid lnga dang ldan pa zhig:_'di nas bdun brgya'i lo khongs su:_mdo khams bar na 'brug gi lo:_gnyos kyi rig 'dzin sga yi bu:_lcags khams dpa' bo'i mtshan rtags can:_pad+ma rgyal pos byin brlabs pas:_bka' babs bdun ldan mdo sngags gling:_bi ma mi tras byin brlabs pas:_'od gsal sprul pa'i rdo rje ste:_'jam dpal sprul pa mnga' bdag gis:_byin brlabs chos kyi bshes gnyen zhes:_sgyu ma lta bu'i skyes bu 'byung:_zhes dang /_rdzogs chen sde gsum lung byang gong du drangs pa sogs bka' babs bdun la mnga' dbang bsgyur nas bstan 'gro'i don chen mdzad par rdo rje'i lung gis yang yang bsngags pa ltar mngon du gyur pa ste/_dgung lo brgyad bzhes pa'i dus sku khams shin tu bsnyel zhing zug rngu'i tshor bas gdung ba'i skabs gu ru rin po che dang mtsho rgyal yab yum gnyis kyis zhal bstan nas rdo rje phur pa'i dkyil 'khor du dbang bskur cing byin gyis brlabs/_rjes su gdams pa'ang bstsal pas bar chad kyi g.yul las rnam par rgyal bar gyur/_dgung lo bco lnga par dag pa'i snang bar rgya gar rdo rje gdan gyi ke'u tshang rim pa dgu pa'i drung du pheb/_rtsag 'og ma nas rim par steng du phebs pa na/_brgyad pa'i nang slob dpon chen po 'jam dpal bshes gnyen paN+Di ta'i tshul can sku'i g.yas g.yon glegs bam mang po brtsigs pa zhig mjal ba la gus pa chen pos btud cing gsol gdab mdzad pas/_g.yon phyogs nas glegs bam zhig blangs te bstan pa sher phyin sdud pa'i rgya dper 'dug_/de nyid dbur bzhag nas dgongs pa gtad de mtshan nyid kyi chos thams cad kyi bka' lung rdzogs pa yin no gsungs/_g.yas phyogs nas glegs bam zhig blangs nas bstan pa rdzogs pa chen po rdor sems snying gi me long gi rgyud ces bya bar snang/_de nyid dbur bzhag nas dgongs pa gtad de gsang sngags rdo rje theg pa'i tshul spyi dang khyad par rdzogs pa chen po sde gsum gyi tshig don byin rlabs thams cad rdzogs pa yin gsungs/_lung bstan 'ga' zhig kyang mdzad pa'i mthar dgyes pa'i tshul gyis 'od du zhu nas rje nyid la thim pas dar gcig rnam par mi rtog pa'i ting nge 'dzin la 'byams/_de las sad nas phyir phebs pa'i tshe sgo drung du me chen po 'bar zhing 'dug pa'i nang du dbang med du zhugs pas rags pa'i lus phung dngos med bsregs nas bi ma mi tra yin snyam pa'i 'od kyi skur lam mer gyur pa byung /_gzhan yang 'di skabs grub pa'i dbang phyug thang stong rgyal pos mnal lam du zhal bstan zhing byin gyis brlabs/_gdams pa dang rjes su gdams pa bstsal pas bla sgrub tsam yi ger bkod/_phyis bka' rgya grol te rim par gtan la phab pa rdzogs rim drug gi rtsa tshig_/sgrub skor lnga/_khrag 'thung bde gshegs 'dus pa sogs grub thob thugs tig gi skor rnams byon/_'chi med mgon po yab yum gyis zhal bstan zhing byin gyis brlabs pas de dag gi sgrub thabs khyad par can byung ba las tshe yum tsaN+Da lI rtsa ba gtan la phab pa sogs rtsa gsum rab 'byams kyi gzigs snang mtha' yas pa byung yang gsang ba srung ba la thugs shin tu sgam pas gzhan gyis zur tsam yang rtogs par ma gyur/_khyad par lung bstan snga phyi mang du bzhugs par snang na'ang bka' las/_gter ston lung bstan gyis phung /_zhes bya ba yin pas lung bstan zer ba de bris phyin spang blang lag tu lon dgos pa la de ni sus kyang mi lon/_de ma lon pas thog tu mi khel/_smra ba mang po ngag la bdud zhugs pa yin gsungs nas lung bstan mi gnang zhing gzhan la'ang dgyes pa mi mdzad pa 'di la'ang gnad don chen po snang /_dgung grangs bcu drug par sa ga zla ba'i tshes bcu'i tho rangs dag pa'i snang cha la rnga yab pad+ma 'od du pheb/_de'ang brag ri lhun chags pa'i nang du sprin dkar shin tu mdzes pa'i khrod na gu ru mtsho skyes rdo rje mkha' 'gro'i tshogs kyis bskor ba'i bkod pa can mjal/_dgongs pas byin gyis brlabs shing brda'i dbang bskur ba dang bka' babs bdun 'byung ba'i dbugs dbyung rgyas par bstsal pa'i mthar spyan lta stangs dang bcas te/_gzung ba'i yul gyis ma gos shing /_/'dzin pa'i rtog pas ma bslad pa/_/rig stong rjen par bskyang ba ni/_/sangs rgyas kun gyi dgongs ba 'o/_/zhes gsungs te 'khor dang bcas pa rje nyid la thim pas thugs yid dbyer med 'dres pa'i nyams shar te de phyin chad ka dag gi gnas lugs la rang bzhin gyis brtan pa thob par gyur/_de la thugs spro ba brtas te gu ru rin po cher rtse gcig tu gsol btab mdzad pa'i rkyen las mdo rgyud gsar rnying bka' gter smin grol rgyab brten dang bcas pa yongs grags rnams dang rgyun shin tu dkon pa rnams kyang 'bad med du rnyed nas nyams bzhes dang 'chad spel gyis bstan pa'i me ro bslangs pa bka'i bka' babs dang po'o/_/gnyis pa sa gter ni/_dgung lo nyi shu par brag dmar mgrin bzang du phebs skabs ye shes mkha' 'gros gter sgrom dngos su phul ba las thugs rje chen po sems nyid ngal gso'i chos skor dang /_bram ze nyer gcig gi gdung byon pa dang /_'dam shod snying drung nas bla ma sku bzhi'i sgrub thabs kyi skor dang gu ru rin po che'i tshems las sprul pa'i ring bsrel rnams gnyan chen thang lhas spyan drangs te phul ba dang /_si ngu g.yu mtsho nas rtsa gsum sgyu 'phrul drwa ba'i skor/_gter klung pad+ma shel ri nas rtsa gsum spyi 'dus kyi skor mkha' 'gro'i rdzu 'phrul gyis drangs te phul ba sogs mang du bzhugs pa rnams las sngar phan rtsa ba tsam re las gtan la 'bebs par ma gnang zhing thugs sgrub yid bzhin nor bu'i skor dang /_sku tshab dngos grub dpal 'bar bcas rtsi ske nor bu spun gsum du bzhugs pa mchog gyur gling pa la bkas bskul te spyan drangs shing rdzogs par gtan la phab/_spyir bla sgrub skor bzhi ka dang bai ro'i thugs tig rdzogs chen sde gsum sogs kyang rje 'di nyid dang mchog gling lhan rgyas kyi gter kha thun mong bar snang ngo /_/gsum pa de las 'phros pa'i yang gter ni/_don grub sa lug lor gu ru rin po che nyid gter chen sangs rgyas gling pa'i skur snang bas glegs bam bstsal zhing byin gyis brlabs pa'i dag snang khyad par can gyis go phyes te gter ston rnams kyi rnam thar dang gter chos gang bzhugs thugs la gsal zhing de dag bka' babs pa'i bka' lung thob pa ltar/_phal cher sngar gyi gter ston so sos yang gter du sbas pa'i shog ser rnams ye shes mkha' 'gros spyan drangs nas phyag tu phul ba las brda' bsgyur pa dang /_'ga' zhig brda' yig spyan lam du shar ba dang dgongs pa'i klong du rtsol med rang gsal ba nyid gtan la phab cing /_de dag gi skabs su gu ru rin po che dngos dang de nyid gter ston so so'i sku'i rnam par bsgyur nas smin grol chig rdzogs su bstsal ba'i tshul ngo mtshar rmad du byung zhing gnas dus shin tu snyigs kyang zab chos 'di lta bu mjal zhing spyod du yod pa skal pa ches bzang bar shes nas kho bos kyang gzhan gang las kyang gter rnying rgyun chad pa sne re tsam byung na'ang ya mtshan che bas don gnyer chen pos yang nas yang du gsol ba btab pas/_sangs rgyas bla ma'i rtsa gsum dril sgrub/_rgya lo tsA'i bla ma bstan gnyis skor gsum/_nyi ma seng ge'i thugs rje chen po pad+ma zhi khro/_rong zom lo tsA'i mkha' 'gro ma rig byed rtsal/_o rgyan gling pa'i bka' 'dus chos kyi rgya mtsho/_jo mo sman mo'i mkha' 'gro gsang ba kun 'dus/_ra mo shel sman gyi rdo rje bdud rtsi/_dri med kun dga'i bla sgrub dang thugs rje chen po rgyal ba rgya mtsho/_rgya ston pad+ma dbang phyug gi bla ma bde mchog 'khor lo/_lha btsun sngon mo'i zhi byed skor bdun/_bal po a hU~M gi yak+sha dzaM b+ha la rin chen gter spungs/_sngags 'chang las 'phro gling pa'i pad+ma sha ba ri dmar mo/_mnga' bdag mol mi 'khyil gyi rta mgrin gnam lcags 'khor lo/_g.yag phyar sngon mo'i sgrol ljang 'jigs pa kun skyob/_dbu ru ston shAka gi phyag rdor rdo rje me 'bar/_bon po brag tshal gyi tshe gur sbrags ma/_bsam gtan bde chen gling pa'i bka' brgyad dregs 'dul/_mchog ldan mgon po'i gnyen po lha lnga/_mi 'gyur las 'phro gling pa'i pad+ma gtum po/_gar dbang las 'phro gling pa'i phag dkar ye shes gsal byed sogs legs par gtan la phab nas smin grol chig rdzogs su bka' drin bstsal ba thob cing /_gter rnying rgyun mi bzhugs pa nyang gter gu ru mtsho skyes rdo rje/_thugs chen 'gro 'dul dbang rgyas pa/_ra shag ma mo sgang shar gyi dbang /_byang gling dpal rgyal mtshan gyi kun bzang thugs gter/_gru gu yang dbang gi rta mgrin dregs pa kun sgrol/_rdor gling bla rdzogs thugs gsum/_rin chen gling pa'i rdzogs pa chen po chig chod kun grol/_'gro 'dul las 'phro gling pa'i thugs rje chen po don gsal sgron me bka' srung bcas/_dbon gsas khyung thog gi tshe sgrub ye shes srog tig_/rog rje gling pa'i tshe sgrub gsang ba rmad byung sogs kyi smin grol stsol bar gsol ba btab pa ltar dgyes bzhin du gnang ba'i bka' drin thob/_da rung yang gter dang nye brgyud kyi chos skor gtan la 'bebs rgyu'i rigs ni mang po zhig bzhugs yod par snang ngo /_/bzhi pa zab mo dgongs pa'i gter ni/_dgung grangs nyer dgu sa sprel lor dbus pheb lam byang 'brog dge rgyal nas tshes bcu'i tshogs 'khor skabs gu ru rin po che dngos zhal bstan nas byin gyis brlabs/_bsam yas su nyang gter mtsho skyes rdo rje'i sku tshab mdun mchod 'bul skabs sku de mtsho skyes rdo rje dngos su gyur nas byin gyis brlabs shing gdams pa gnang ba la brten/_bla sgrub skor gsum gyi gsang sgrub mtsho skyes snying thig gi chos skor byon pa dang /_dgung lo so lnga pa shing stag rgyal zla bar 'chi med yid bzhin 'khor lo'i bsnyen sgrub mdzad pas 'phags ma yi ge bcu pa'i sgra gdangs can dngos su zhal gzigs nas byin gyis brlabs/_slar 'chi med grub pa'i slob dpon rnam gsum gyis kyang byin gyis brlabs pa la brten nas 'phags ma'i snying thig gi chos skor byon cing /_grub thob thugs tig gi skor sngar smos pa sogs yin la 'di dag ni rgyud dang dbyer med pa'i rdo rje'i tshig rkang so skye'i blo las 'das pa dgongs gter gyi mtshan smos rin chog par snang ngo /_/lnga pa de las 'phros pa'i rjes dran ni/_bod yul du pheb skabs gtsang 'u yug gi mdar phebs pa'i tshe sngon lce btsun chen po 'od lus su gshegs pa'i gnas dus ji lta bar rjes su dran nas gtan la phab pa lce btsun snying thig dang /_lang gro dkon 'byung gi sngon gnas rjes su dran pa'i tshe sgrub bai ro'i thugs tig_/seng gdong dkar mo'i bcud len sogs snang bar mdzad do/_/drug pa dag snang ni/_gong smos 'chi med thugs tig gi tshe yum tsaN+Da lI'i gdams skor dang /_klong chen snying thig gi bla sgrub thig le'i rgya can gyi yig cha/_mchog gling bla sgrub sku gsum rigs 'dus kyis mtshon mang du bzhugs par gdon mi za'ang dngos su spel ba ni de tsam las cher ma mjal/_bdun pa de mthun snyan brgyud ni/_rdzong shod bde gshegs 'dus pa'i gnas chen du bzhugs pa'i skabs dag pa'i snang bar mchod rten bde byed brtsegs pa'i drung du pheb/_de'i phyogs mtshams brgyad dbus dang dgur gu ru mtshan brgyad kun 'dus gu ru rin po che bcas kyi sku'i bkod par bzhugs pa rnams kyis sgrub chen bka' brgyad/_sgyu 'phrul zhi khro sogs kyi smin grol snying po snyan brgyud du bstsal pa las/_gshin rje gshed/_yang dag_/phur pa tsam gtan la phab pa kho bos kyang bka' drin du nos so/_/de ltar na de dag ni gsang ba'i rnam par thar pa zur tsam yin la rgyas par ni gter kha re re la'ang lung bstan/_bskul byang /_kha byang sogs babs tshul/_dngos gter bzhes pa dang/_gter sgrub skabs kyi gzigs snang dag dang smin grol gsan tshul/_yun ring por gsang dam mthar phyin par mdzad nas dus la babs nges pa'i tshe lung dang mthun par skal ldan rnams la spel ba'i tshul sogs rgya cher bzhugs pa rnams gter 'byung chen mo slad char stsol bar gsol ba 'debs pa'i phyir 'dir de tsam mo/_/da dung snyigs dus bstan 'gro'i mgon du bgrang bya brgya phrag las lhag par rtag brtan chen por bzhugs par gsol ba 'debs shing /_bi ma'i bla sgrub mdzad skabs ma 'ongs par sku dngos nyid ri bo rtse lngar bi ma la'i thugs kar thim/_de las sprul pa lnga byon nas bstan pa ris med la phan pa sgrub pa'i lung bstan thob ces zhal nas dngos su thos so
paN chen bi ma la dang chos rgyal khri srong rgyal sras lha rje rnams zung du 'jug pa'i rnam 'phrul rig 'dzin chos rje gling pa'i sku'i skye ba de ma thag pa zab mo dgongs pa'i gter gyi bka' babs chen po 'od gsal snying thig gi bstan pa'i shing rta kun mkhyen 'jigs med gling pa ni/_gu ru chos kyi dbang phyug gi gter lung mkha' ri'i zhus lan dang /_sangs rgyas gling pa/_chos gling dang rwa ston yab sras kyi gter lung las gsal ba ltar 'phyong rgyas srong btsan bang so dmar po'i lho phyogs dpal ri dgon pa'i nye 'dabs su/_chos rje 'brug pa'i thugs sras che ba drug gi nang tshan rgya brag pa'i dpon rigs su sa mo bya lo rgyal zla ba'i kun mkhyen chen po'i sku mchod kyi nyin snga dro'i char sku 'khrungs/_chung ngu nas gter chen sangs rgyas bla ma dang chos rje gling pa'i sngon rabs gsal ba sogs dam pa'i rigs sad/_dgung lo drug par rje btsun pra dz+nyA rasmi'i 'khor lo gsum gyi phyag rjes rma med pa'i gnas dpal gyi ri bo'i chos grwar zhugs/_mtsho rgyal sprul sku ngag dbang blo bzang pad+mar gtsug phud phul bas mtshan pad+ma mkhyen brtse'i 'od zer zhes gsol/_phyis gnas gsar ba ngag dbang kun dga' legs pa'i 'byung gnas kyi drung nas dge tshul gyi sdom pa'ang bzhes/_gnas brtan kun bzang 'od zer las grol tig dang bla ma dgongs 'dus sogs kyi dbang lung dang /_khyad par dgung lo bcu gsum par rig 'dzin thugs mchog rdo rje la mjal nas phyag rgya chen po ye shes mthong grol sogs gsan pas thog mar rgyud smin te rtsa ba'i bla ma mchog gcig tu mdzad pa ltar phyis ye shes skus kyang rjes su bzung /_gzhan yang snga phyir gter chen dri med gling pa/_rigs zhang sgom chen d+harma kIrti/_smin gling grub dbang shrI nA tha/_bstan 'dzin ye shes lhun grub/_thang 'brog dbon pad+ma mchog grub/_mon rdza dkar bla ma dar rgyas sogs yongs 'dzin du ma las snga 'gyur bka' ma dang gter kha gong 'og gtso bor gyur pa'i bka' gter 'gang che ba rnams dang /_gsar ma'i smin grol yang ci rigs pa gsan/_zhar byung skar rtsis sogs tha snyad kyi rigs pa'ang cha shas tsam gsan pa las phyag bris kyis mtshon/_mdo sngags gzhung lugs chen mo'i gnad gsang dang snyan 'gyur phun sum tshogs pa'i gsung rtsom sogs dgongs pa'i klong nas rang brdol ba'i tshul gyis skyes thob kyi rtsal las byung ba ma gtogs/_tha snyad la sbyang rtsol ma mdzad par snying po'i sgrub pa la thugs gzhol bas/_dgung lo nyer brgyad pa me glang cho 'phrul chen po nas brtsam/_rang dgon dpal gyi ri'i sgom khang thig le nyag gcig tu lo gsum gyi bcad rgya dam bca' brtan pos/_gtso bor gter chen chos kyi rgyal po 'gro 'dul gling pa'i zab gter rmad du byung ba grol tig dgongs pa rang grol ring brgyud dang nye brgyud kyi tshul du bka' babs pa ltar de'i bskyed rdzogs kho na thugs nyams su bzhes pas drod rtags khyad par can brnyes/_gzhan yang gter kha gong 'og gis mtshon zab gter tshad thub mang po'i lhag pa'i lha rab 'byams kyi bsnyen sgrub mthar phyin pas rnam par smin pa'i rig 'dzin gyi ldangs tshad mngon du gyur/_rtsa rlung thig le'i rnal 'byor la dbang 'byor pas mgrin pa longs spyod kyi 'khor lo rtsa khams yi ge'i sprin du dengs shing snang ba dpe char shar bas tshig don phun sum tshogs pa'i rdo rje'i glu sogs chos kyi mdzod chen po brdol/_bla ma dgongs pa 'dus pa'i bsnyen sgrub skabs spyi gtsug nas rta skad kyi gdangs 'tsher cing o rgyan chen pos dpal pad+ma dbang chen zhes mtshan gyi cod pan dpyangs/_slob dpon 'jam dpal bshes gnyen gyis mngon sum du byin gyis brlabs pa'i mthus mtshon byed dpe yi ye shes ji bzhin pa thugs nyams su bstar bas he ru ka'i chas kyis brjid pa'i brtul zhugs chen po'i spyod pa bskyangs/_khyad par 'od gsal gyi snang char bal yul mchod rten bya rung kha shor ri 'dabs su chos sku ye shes kyi mkha' 'gro mas klong byang mkha' 'gro'i brda' mngon tu bstsal pa la brten nas/_bka' 'dus rdzogs pa chen po klong chen snying gi thig le zhes yongs su grags pa'i chos mdzod chen por dbang bsgyur pa sogs mkhas grub kyi go 'phang mthon por gshegs kyang de tsam gyis kyang thugs ma tshims par 'phags lam gyi ye shes mngon du mdzad pa'i dam bca' brtan pos phyogs de'i lo gsum grol 'phral dpal gyi bsam yas mchims phur byon/_gsang chen me tog phug tu rje btsun bzhad pa rdo rje'i rnam thar la 'gran bzod pa'i dka' spyad kyis lo gsum snying po don gyi sgrub pa la rtse gcig tu gzhol ba'i skabs/_spyir dag pa'i gzigs snang mtha' yas pa dang /_lhag par kun mkhyen chos kyi rgyal po dri med 'od zer klong chen rab 'byams bzang po'i ye shes kyi sku lan gsum du mjal/_sku gsung thugs kyi byin rlabs dngos su 'phos shing gsung gi gnang ba chen po thob pa la brten/_'phags lam don gyi ye shes rdzogs pa chen po'i bden pa mthong /_thugs gter chen mo gtan la 'bebs pa'i skabs su'ang klong chen snying gi thig le zhes mtshan gsol/_gnas der skal ldan gyi slob ma bco lnga la smin grol gyi sgo 'phar dang por dbye ba nas brtsams/_zab don thang mar brdal pas rdzogs pa chen po snying thig gi shing rta gcig pur gyur/_lo gsum gyi dam bca' mthar phyin nas/_chos dbang rin po che'i zab gter mkha' ri'i zhus lan las/_'phyong rgyas nang du nga sprul don byed 'ong:_su yin mi shes gcig car smra ba 'byung:_'phying bar mdo 'am bang so dmar po'i lhor:_lha babs mchod rten dgon sde 'cha' yang srid:_ces rdo rje'i lung gi bden don mngon du gyur cing /_rtse le rgod tshang pa sna tshogs rang grol gyi ye shes kyi skus dgongs pa mngon du gtad/_brda' thabs bstan pa sogs rgyu rkyen rten 'brel du ma la brten nas rang gnas su phebs te/_'phyong rgyas srong btsan bang so'i lho phyogs skung gi ri sul don mkhar lung pa'i phur/_dpal tshe ring ljongs pad+ma 'od gsal theg mchog gling gi ri khrod rten dang brten par bcas pa gsar du btab nas sku tshe de srid du bya bral sbas pa'i rnal 'byor gyi tshul gyis bzhugs stan chags/_gangs can mtha' dbus kun dang lho mon rgya gar gyi sa mtshams tshun nas las ldan gyi slob ma mtha' yas pa la/_rnying ma bka' gter tshad thub spyi dang /_gtso bor snying thig gsar rnying gi gdams pa rtsal du bton nas gsungs pas chos kyi phrin las rmad du byung /_chos 'khor rnam pa gsum du khri mchod mang po dang /_'chi nges pa'i srog bslu grangs las 'das pa sogs lan dang rnam par smin pa la re ba med pa'i chos sbyin rlabs po che gnang /_bsam yas chos 'khor chen por gser sbyang gi 'khor lo phul cing rin chen gnyis pa'i rgyal ba ma pham pa'i snang brnyan chen po bzhengs/_rab gnas bskyar ba sogs dang /_lha ma yin gyi brtul zhugs 'dzin pa'i gor+Sha'i dpung chen bod du lhags pa'i skabs dmag zlog rtags thon mdzad pas mtshon bya ba las kyi 'khor lo dang bstan srid bde thabs kyi mdzad pa rmad du byung bas gzhung sa chen po nas kyang mthong bkur phul du byung ba gnang /_khyad par thugs gter chen po klong chen snying thig gzhung rtsa ba gsal byed bcas pa'i glegs bam gnyis dang /_rlangs chen dpal gyi seng ges sprul pa'i dkyil 'khor du dbang bskur cing gdams ngag bstsal pa la brten bka' yi bsdu ba gsar du mdzad pa'i phur pa rgyud lugs kyi glegs bam/_kun mkhyen chen po'i byin rlabs la brten dgongs gter bstan bcos kyi tshul du bstsal pa'i bstan pa yongs rdzogs kyi lam rim yon tan rin po che'i mdzod rtsa 'grel glegs bam gnyis sogs gsung rtsom pod chen drug ste glegs bam dgu sa skyong sde dge'i rgyal khab chen por spar du bzhugs la/_gsung las skyes pa'i slob ma dpal sa skya pa khri chen ngag dbang dpal ldan chos skyong sku mched/_rgyal ba 'bri gung pa'i sprul sku rnam gnyis/_rdo rje brag rig 'dzin mchog gi sprul sku/_lho brag gsung sprul dang thugs sras/_bo dong pa'i bstan 'dzin chen po sbyor ra sprul sku/_ri bo dga' ldan pa'i ring lugs 'dzin pa chen po dga' ldan shar byang rnam gnyis dang /_mon mtsho sna dgon rtse sprul sku sogs bla chen dang /_mi chen dregs pa can rnams nas bzung /_bya bral sgrub btsun gyis mtha' brten pa grangs kyis mi langs pa/_khams phyogs rnying ma'i bla sprul phal cher gyis kyang zhabs la gtugs/_khyad par nang thugs kyi sras gcig pu lha sras mu rub btsad po'i rnam 'phrul grub dbang 'jigs med phrin las 'od zer/_'phags mchog phyag na pad+mo ltar gzhan phan gyi mdzad pa bsam gyis mi khyab pa 'jigs med rgyal ba'i myu gu/_mon mkhas grub 'jigs med kun grol sogs kyi phrin las la brten lho phyogs rgya gar gyi sa mtshams dang shar phyogs rgya sog gi bar chos kyi snang bas khyab pa'i phrin las ni phyi dus 'dir sus kyang 'gran zlar ma gyur pa ma zad/_rje nyid kyis kho bos dben pa'i rir lo bdun du byang chub kyi sems rtse gcig tu bsgoms pas bstan pa dar rgyas su 'byung bar zhal gyis bzhes pa ltar/_deng sang yang snying thig gi smin grol nyams len phyogs thams cad du ma khyab pa med pa lta bus je dar du 'gro bar snang bas lung bstan gyi bden don mngon du gyur pa yin la/_kho bos kyang thugs rje'i gter chen rje bla ma 'gyur med bstan 'dzin 'phel rgyas dang /_kun mkhyen gnyis pa 'jam dbyangs mkhyen brtse'i dbang po'i bka' drin las dgongs gter gyi smin grol dang bka' 'bum bklags lung rdzogs par nos pa yin no/_/de lta bu'i 'khor lo gsum gyi mdzad pa mthar phyin nas dgung lo bdun bcur son pa sa rta dbyug pa zla ba'i tshes gsum la rang gnas tshe ring ljongs kyi thog steng yang dben rnam grol yang rtser bsnyun babs cher med par pad+ma 'od kyi zhing khams chen por rtags dang cho 'phrul mngon par 'du mdzad de gshegs pa na/_snga tshud nas zhal chems rdo rje'i tshig bcad lhug ngo mtshar can zhib mor brtsal pa ltar rjes kyi bya ba rnams dbon 'od zer phrin las sogs kyis thugs dgongs rdzogs pa'i bya ba rgya chen po mthar phyin du mdzad pa yin no/_/sku'i sras gcig pu zhig byung ba 'bri gung gi gdan sar mnga' gsol bas rgyal sras nyin byed 'od zer ram chos kyi rgyal mtshan te skyes bu dam pa'i rnam thar rmad du byung bar bzhugs kyang bstan 'gro'i don rgya cher ma byung bar snang /
'o bran dpal gyi dbang phyug ni/_'o yug mdar/_'o bran dpal gyi 'byung gnas kyi sras su 'khrungs/_slob dpon pad+ma'i thugs sras te/_gsang sngags kyi tshul kun la mkhas shing grub pa'i mtshan ma mngon du brnyes pas chu bo chen po la 'jigs pa med par nya ltar rgyu bar nus/_'o bran lugs la gur drag bka' ma sogs chos tshul mang du yod la phal cher deng sang yang dbang lung gi rgyun ma chad par snang zhing gdung rgyud yang da lta'i bar du byung bar snang ste/_rten khyim pa yin no +
lo chen bai ro'i rnam 'phrul phreng po 'gro 'dul gling pa shes rab 'od zer ni/_byang ngom chen gyi sa'i char khri bsam gnyis kyi cho 'brang las sa pho stag lo chu stod zla ba'i tshes bcur ltas khyad par can dang bcas te sku bltams/_sku chung ngu nas bcos min gyi nges 'byung dang snying rje/_shes rab kyi rtsal che ba sogs theg pa chen po'i rigs sad/_dgung lo brgyad par slob dpon tshul khrims 'od zer ba las dge bsnyen mdzad pa'i mtshan shes rab 'od zer du grags/_gser mdog paN chen slob ma rdor rgyal ba las rab tu byung /_dga' ldan khri chen bstan dar ba bsten nas mtshan nyid kyi gzhung rnams dang 'dus pa sogs lo drug tu sbyangs/_rdor rgyal ba las sa lugs kyi rgyud sde dang dus 'khor la sogs gsan bsam phul du phyin pas mtshan nyid kyi grwa sa rnams su lung rig gi mgrin rnga ldir ba na sus kyang lan ldon par mi nus pas dge bshes chen po'i mtshan du grags/_dgung lo bco brgyad par 'bri gung rin chen phun tshogs mjal bas dad pa dbang med du skyes/_dpon slob gnyis chos kyi 'bel gtam mdzad pas gcig la gcig thugs ches/_'bri gung dang karma bka' brgyud kyi zab chos rnams dang /_gsar rnying gi rgyud 'bum/_mdo sgyu sems gsum bshad pa dang bcas pa/_mkha' 'gro snying tig gtsor gyur rnying ma bka' gter gyi chos phyag len dang bcas pa gsan pa mtha' yas pa mdzad/_bla ma'i bka' bzhin tshogs pa rgya mtsho'i dbus su lnga ldan la rtsa bar byas/_rdo rje'i gsung brgya lnga bcu pa chos tshoms su bcad/_dgongs gcig gi grub mtha'i rkang bzung nas mdo sngags kyi chos 'khor bstan pa yongs rdzogs tshul du bshad pas bla ma'i dgongs pa rdzogs shing 'dus pa rnams snga na med pa'i ngo mtshar gyi gnas su bkod/_sbyangs pa'i yon tan la gnas pas rnam g.yeng 'du 'dzi spangs pa'i dben pa lo brgyad dang khyad par grogs ri rin chen spungs pa'i sgrub phug tu nyams bzhes lo gsum mdzad pas mngon rtags bsam gyis mi khyab pa shar/_ting nge 'dzin gyi sgo mtha' yas pa brnyes/_me mo lug lo chu stod zla ba'i tshes bcur mkha' 'gro mon mo'i chas can zhig gis chang thod phor gang byin pa gsol ba'i rkyen gyis 'od dkar po'i dbus su gu ru pad+ma rgyal po zhal gzigs te bslab bya bstsal pa ltar gter gnas de nyid nas grol tig dgongs pa rang grol gyi chos skor/_sku gsung thugs kyi rten dang bcas pa spyan drangs/_de rjes lha gdan nas kyang de bzhin gshegs pa'i ring bsrel/_myang grol a rgya can sogs rten dang dam rdzas khyad par can gter du bzhes pas mtshon/_snga rjes gter gnas drug nas zab gter ci rigs pa spyan drangs/_'bri gung rin po che dang lhan cig shog ser gtan la phabs/_zing pa stag mgor gter sgrub mdzad pa'i skabs dag pa'i snang bar pad+ma 'od du phebs nas slob dpon yab yum gu ru bde ba chen po'i rnam pas dbang bskur cing zhal gdams bslab bya bstsal/_zla ba gcig tu bzhugs pa'i snang ba byung /_phreng por dgongs 'dus chos bdag nyi ma rgyal mtshan las 'bri gung pa dang lhan cig bla ma dgongs 'dus sogs chos bka' mang du gsan/_phreng po ba rnams kyis gsol ba btab pa ltar de'i gdan sa'ang mdzad/_rdo rje brag tu lo gsum bcad rgyar bzhugs skabs o rgyan rin po ches zhal gzigs te/_deng sang 'di na lta ba ma 'khrul ba'i khyad par 'byed shes pa khyod las mi 'dug pas de'i gnas gsal bar ston cig gsungs pas zhal lung gsal sgron zhes pa don zab la tshig nyung ba'i bstan bcos mdzad/_dus de tsam na mkhas pa dang grub par grags pa thams cad kyis mngon par bsngags shing zab chos kyi bdud rtsi bzhes/_mkha' 'gro snying tig_/dgongs pa yang zab/_grol tig rnams kyi sgrub pa dang dbang khrid mdzad pas grol dbang la mi stong phrag bdun re tshogs pa sha stag dang /_de dag rnams su 'ja' 'od me tog gi char sogs ngo mtshar ba'i ltas mang /_chos kyi spyan mnga' zhing mngon shes la chags thogs med/_hor bsod nams stobs rgyas kyis sbyin bdag zhus nas 'phyong rgyas dpal ri theg chen gling rten dang brten par bcas pa gsar du btab/_dbus gtsang khams gsum du chos kyi phrin las khyab/_dgung lo drug cu rtsa bdun pa chu sprel hor zla drug pa'i tshes bcu'i nyin zhi bar gshegs par bzhed pa la/_sku'i sras karma kun bzang yum sras sogs kyis gsol ba btab pa'i ngor zhag gsum bzhugs nas tshes bcu gsum gyi zhogs par ngo mtshar ba'i ltas dang bcas bde chen shan+ta pu ri'i grong khyer du dpa' bo chen po thod pa'i dum bu rtsal gyi thugs kar sprul pa'i bkod pa bsdus so/_/'di'i rnam thar rgyas pa gter 'byung bcas chos rje kun bzang pas bsgrigs pa'i ngo mtshar ba'i gtam skabs bcu pa zhes pa yod/_grol tig gi smin grol rgyun ma nyams par bzhugs pa kho bos kyang skal bzang du thob bo/
A
byang gi phyi gong ru ba 'tshub mas khyer:_bod 'dir dam chos bstan pa gsum du gyes:_bka' gter gnyis kyis sangs rgyas bstan pa skyong:_gtsang gi ru mtshams sbas pa'i gter kha 'di:_mi bzhag 'don pa'i rtags de bstan nas 'byung:_a ya bon po lha 'bum zhes bya 'byung:_zhes pa'i gter ston bon po lha 'bum ni/_bai ro tsa na dang dran pa nam mkha' zung du 'jug pa'i rnam 'phrul gtsang rta nag gi phyogs su 'brom ston pa sogs dang dus mnyam du 'khrungs/_rten bon sngags/_mtshan lha 'bum mam bon gyi phyogs su gu ru rnon rtser grags/_'dis gtsang gi ru mtshams dang nye ba'i rta nag dung phor brag nas chos bon sman rtsis kyi skor rgya che'i gter zhal phyes par grags kyang /_rang lugs la mdos phran tsam gyi lung rgyun las gzhan mi bzhugs/_bon phyogs su ma rgyud gsang mchog thugs rje nyi ma'i bskyed rdzogs kyi skor rgya chen po'i dbang lung khrid gsum da lta'i bar dar rgyas dang thugs gtsigs che bar snang /_phyis 'dir rje bla mar bde mchog snying po'i skor gyi bla rdzogs thugs gsum yang gter gyi tshul du bka' babs pa'ang bzhugs +
sangs rgyas snang ba mtha' yas dang gu ru pad+ma dbyer med pa'i rnam 'phrul sa gsum du grags pas khyab pa'i dpal ldan jo bo rje dI paM ka ra ni 'phags bod gnyis na yongs su grags pa'i mkhas grub chen po/_byang chub sems kyi mnga' bdag bod khams la bka' drin lhag par che ba ste/_rnam thar grags che bas 'dir ma bkod cing /_rje btsun sgrol mas lung gis bskul zhing bod kyi rgyal pos spyan drangs pa ltar gangs can du phyags phebs/_sangs rgyas kyi bstan pa'i ga dar mdzad cing nyams pa rmang nas gsos/_lha sar rang bzhin gyi rnal 'byor ma phal pa'i snang ngor smyon mar brdzu ba zhig gis lung bstan te ka ba bum pa can nas 'dom phyed gzhal ba'i sa nas chos rgyal srong btsan sgam po'i bka' chems kyi yi ge chen po/_btsun mo rnams kyis bkod pa'i lo rgyus dar dkar gsal ba/_blon po rnams kyis byas pa'i lo rgyus zla ba'i 'dod 'jo bcas dkar chag shog dril gsum bzhes/_gter srung gnyan pas de nyin rang du rnal 'byor pa sogs mi bzhis zhal bshus/_do nub slar sba dgos pas lhag ma bag tsam lus par bshad/_jo bos rnal 'byor pa chen po la gtad/_des bya yul pa/_des thugs rje chen po'i che ba'i yon tan zhig lha sa'i dkor gnyer la gnang /_mthing shog la gser gyis bris pa'i bu yig gdung rten dang ma phyi glo 'bur gyi rta mgrin lder sku la bcug skad/_gzhan yang jo bo 'dis 'phags yul nas kyang b+he ta pad+ma can gyi lha khang nas gtsug tor sde lnga'i rgyal mtshan 'dzug pa'i cho ga sogs gter nas bzhes pa'ang grags so +
B
rgya gar nas byon pa'i gter ston badz+ra ma ti zhes pas/_bal yul li shan ti'i gnas nas spyan drangs pa'i rdzogs chen mkha' klong 'od 'phro dang /_de'i las tshogs klu dang sa bdag gi gnyen por gyur pa o rgyan chen po sku mdog mthing ga phag la chibs pa'i sgom bzlas dang /_sman sngags bsdebs nas rims tre tre ho sogs snyigs ma lnga bdo ba'i nad rims rnams srung bcos kyi gdams pa zab mo zhal shes dang bcas pa gdan drangs/_de skabs tshal gung thang pa gzhon nu bsam gtan gyis bal yul du byon pas gter ston dang mjal nas gter chos rnams bod du spyan drangs pa/_bka' babs lung zin ltar bla ma dpal 'byor zhes pa nas brgyud de dar rgyas su gyur na'ang /_deng sang ni drag mthing sgom bzlas kyi lung rgyun tsam las gzhan mi bzhugs so +
lo chen bai ro tsa na ni/_gdung pa gor/_'khrungs yul phyogs gnyis snang ste thang yig las snye mor bshad kyang /_bai ro nyid kyi 'dra 'bag las/_nyang chu gtsang chu 'dres pa zhes 'byung bas/_da lta pho brang chen po bsam 'grub rtse'i chu'i shar kha/_zangs dkar zer ba'i grong yod pa de nyid dang nye ba'i thang du 'khrungs par gsal zhing /_gnas de nyid na/_lo chen byis pa'i dus kyi zhabs rjes kyang rdo la gsal bar yod do zer/_yab pa gor rdo rje rgyal po/_pa gor he 'dod khu bo yin par bzhed/_thang yig nas yab yin par gsungs/_yum bran ka bza' sgron skyid kyi sras su 'khrungs/_sku gzhon nu'i dus 'khrungs yul brag po che'i ri phan tshun du 'phur nas rdzu 'phrul gyis gshegs bzhud mdzad/_sad mi mi bdun gyi nang du mkhan po las rab tu byung /_mtshan bai ro tsa na rak+Shita ste rnam par snang mdzad srung ba zhes btags/_sgra skad lo tsA la mkhas pa'i phul du phyin te bsil ldan myu gus dkrigs pa'i ljongs 'di na snga phyir byon pa'i mkhas pa sus kyang 'gran bzod pa med/_chos rgyal khri srong gi bkas bskul te gtsang ban legs grub dang lhan cig rgya gar du byon/_paN chen shrI siM ha sogs nyer lnga mjal zhing gsang sngags kyi zab chos mang du gsan/_khyad par shrI siM ha las rdzogs pa chen po sems klong gtsor gyur mtha' dag nos shing thugs nyams su bzhes pas dgongs pa dbyer med du gyur/_slar rkang mgyogs kyi rdzu 'phrul mthus bod du bde bar byon nas mnga' bdag khri srong rjes su bzung ba'i skabs/_bdud blon rnams kyis dbyen bcos pa dang sngon gyi smon lam la brten rgyal mo tsha rong du gshegs pa'i tshul bstan/_phyogs der sangs rgyas kyi bstan pa nyi ma shar ba ltar mdzad/_khyad par legs grub kyi skye ba de ma thag pa g.yu sgra snying po rjes su bzung bas thugs sras mchog tu gyur/_slar yul dbus su phebs nas bstan pa la bya ba rgya chen po mdzad/_slob dpon rin po che las bka' brgyad kyi dbang gsan pa'i tshe me tog dmod pa drag sngags la phog pas dregs pa'i bka' babs/_bka' brgyad bde gshegs 'dus pa sogs kyi bka'i bsdu ba chen po mdzad/_slob dpon nyid dang dgongs pa mnyam par bsngags/_stobs ldan nag po'i zhal gzigs ye shes kyi spyan dang ldan pa'i dngos grub brnyes/_drag sngags kyi dmod pas bstan pa'i dgra bo bsgral/_khyad par rgyal po'i btsun mo dmar rgyan mar mdze thod rgal btang ba/_slob dpon pad+ma'i thugs rjes gsos pa'i lo rgyus yod la/_de dus bai ros btsun mor rbad rgyu'i klu de deng sang mi 'khog zhugs 'byung yang btsun mo'i grib kyis ngag lkug nas blang dor smra ru med pas mchod pa bzhes lugs la pra brtag byed pa yod/_bai ro yan chad 'di dag la bka' babs mi brgyad dam dgu zhes zer/_de lta bu'i nam mkha'i mtha' dang mnyam pa'i lo tsA ba chen po 'di ni slob dpon rin po che'i thugs sras rje 'bangs grogs gsum zhes rje mnga' bdag rgyal po/_'bangs bai ro tsa na/_grogs ye shes mtsho rgyal zhes grags shing nang thugs kyi sras gcig pur gyur pa la brten nas zab chos phal cher gyi bka' babs pa'i rgyus/_sku'i sprul pa gter chen rdo rje gling pa/_kun skyong gling pa/_mchog ldan mdo sngags gling pa/_phreng po shes rab 'od zer/_gsung gi sprul pa rig 'dzin gter bdag gling pa/_thugs kyi sprul pa rong ston bde chen gling pa sogs gangs can mtha' dbus kun tu yongs su grags pa dang ma grags pa'i sprul pa'i gter ston mtha' yas par sprul nas snga 'gyur bstan pa dang 'gro ba'i don bsam gyis mi khyab pa mdzad pa'i tshul zhib par 'og tu gter 'byung gi skabs su gsal ba ltar ro/
bal po a hU~M 'bar ni/_gtsang gi lho rgyud du 'khrungs/_rten sngags 'chang /_sna nam rdo rje bdud 'joms kyi sprul par lung gis gsal ba ltar spa gro'i cal gyi brag dmar nas dzaM nag srog gi 'khor lo chen mo dang glang chen bcas chog sogs gdams ngag zab mo rnams spyan drangs pa dpal dga' ba lung pa nas rim par brgyud/_phyis kyi bar lung dang phyag len sogs yod par snang na'ang deng sang dpe rgyun tsam mjal du med pa'i skabs/_rje bla mar 'khor lo'i dpe rnying mkha' 'gros dngos su bstsal pa dang sgrub thabs las tshogs kyi skor yang gter du gtan la phab pa kho bos kyang legs par nos te yig cha'i zhabs 'degs spel ba'o +
star sgo'i thang la dbus pa'i tshogs 'du byed:_has po ri rgyud me yar rdzong zhes 'byung:_kha rag phug tu sbas pa'i gter kha 'di:_mi bzhag 'don pa'i rtags de bstan nas 'byung:_o rgyan bde chen gling pa zhes bya 'byung:_zhes pa'i gter ston bde chen gling pa ni/_gru shul tshwa lung zhes pa ri bo khyung chen lding ba'i zhol du/_yab dpal 'byor rgyal mtshan dang /_yum pad+ma mtsho gnyis kyi sras su chu pho khyi'i lo la 'khrungs/_sku rus kher yin te rig 'dzin chen po rat+na gling pa dang yab tshan drung yin zer/_'brog mi dpal gyi ye shes kyi skye bar yongs su grags/_dgung lo bdun pa la ye shes kyi mkha' 'gro sde lnga mngon sum zhal gzigs/_sku rtsed mdzad pas rdo la zhabs rjes shin tu gsal ba zhig byung /_dgung lo bco lnga pa la o rgyan rin po che dang dngos su mjal nas/_dbang bskur byin gyis brlabs/_bka' bsgo bar mdzad pas/_gu ru'i lung bzhin/_chu rta sprel zla'i tshes bcu'i nyin khyung chen brag nas 'jam dpal gshin rje'i sgrub skor rdzas dang phur pa sogs spyan drangs shing /_gzhan yang gter gnas de dang brag ri mo can/_nam snying sgrub phug_/zil chen gsang phug_/gangs bar phug mo che/_mgon po gdong gi brag_/sman chu brag rna ring dmar gyi pha bong /_dom tshang bde mchog phug_/mda' tsha zer gyi phug_/mkho mthing rnam snang sku rgyab/_ban pa glang rong /_ban pa'i chu mig dmar po/_kha rag phug_/lho brag sna bo brag_/lho brag gtam shul brag srin mo sbar rjes can/_srin mo nag po'i brag_/e gzar po'i brag_/e rong khrab la kha/_'ja' tshon brag_/tshe lam dpal ri sogs kyi gter gnas rnams nas/_sku rten sku tshab/_gsung rten gter shog_/thugs rten phyag mtshan/_dam rdzas myong grol/_tshe ril sogs bsam gyis mi khyab pa'i gter bton cing /_'bum gyi rgya dpe tshang ma'ang bton par grags/_gter chos tshe khrid yid bzhin me long /_jo mo kha rag nas gdan drangs pa'i bka' brgyad dregs pa 'joms byed/_zhing skyong skor lnga sogs mtha' yas par spyan drangs tshul gter 'byung du bshad la/_sku tshe'i tshad kyang bdun cu don brgyad bar du bzhugs pa'i lung bstan yod de/_ji skad du/_bdun cu don brgyad tshe yang mthar phyin 'gyur:_de nas shel brag phyogs su mya ngan 'da':_phung po 'di nyid lha sar gter du sbos:_de nas kong po bu chu'i gter zhabs dril:_las lus ma yin dag pa ye shes lus:_zhes sogs gsungs kyang lung bstan dang rjes mthun gyi rten 'brel bsgrig phyogs ma mdzad pa'i rkyen gyis gter lung las gsungs pa dag phyogs gzhan du phul te dgung lo so gcig pa la gzhan dbang gis rkyen lam du gshegs/_slob brgyud kyang lung bstan ltar na chos bdag mang du yod kyang rten 'brel rang dbang du ma gyur pas thams cad ma 'dus kyang /_byang chub gling pa sna tshogs rang grol dang /_dkar po bstan 'dzin nor bu sogs dang mjal/_chos brgyud dang 'gro don sogs kyang cung zad las rgya cher ma 'phel/_de'i sku skye ni kong po bu chur 'khrungs pa bu slob rnams kyis rang gnas su spyan drangs/_rgyal dbang dbang phyug rdo rje la gtsug phud phul/_phreng po gter chen/_zhig gling /_'bri gung pa chos rgyal phun tshogs sogs mang po'i zhabs la gtugs nas gsang sngags gsar rnying bka' gter gyi dbang lung rgya cher gsan sbyang mdzad pas spyir bstan 'dzin gyi skyes bu chen por gyur kyang zab gter 'don pa'i rten 'brel phyag tu bzhes rgyu ma byung bas dgung lo so dgu pa la ngo mtshar ba'i ltas dang bcas te gshegs/_de'i sprul sku mon mel por 'khrungs te sku thog gsum byon par grags/_'di'i zab gter gyi gtso bo ni mkha' 'gro dgongs pa 'dus pa ste gzhung rgyud man ngag gi skor rnams sku phreng gsum gyis rim par bzhes pa la pusti drug yod par grags kyang phyis 'dir smin grol gyi rgyun ma byung bar mngon/_bar skabs tshe khrid yid bzhin me long gi rgyun yod par snang yang da lta ni dpe'ang mjal du mi snang /_gso dpyad bdud rtsi tshe bum tsam gyi lung rgyun thos shing phyis mchog gyur bde chen gling pa'i mkha' 'gro dgongs 'dus snying po thob pa'ang chu bo gcig 'dres su byar rung bar mngon/_lhag par rje bla ma mdo sngags gling par yang gter gyi shog ser dngos su byung ba ltar snying po tsam zhig gtan la phab pas phyogs 'dir yang skal bzang du gyur to/
'brog ban khye'u chung lo tsA'i skye mtha' gter ston rig 'dzin chen po bdud 'dul rdo rje ni/_sngon gyi gter rnying bcu gsum tsam nas lung bstan shin tu gsal ba ltar/_mdo khams sde dge chos rgyal chen po'i rgyal khab dang nye ba'i dngul phu nang du grags pa'i srib phyogs su yab gling gi rigs 'tsho byed mkhas pa klu skyabs dang /_yum bo lu ma zhes pa'i sras su shing mo yos kyi lo la 'khrungs/_yab las yi ge 'bri klog dang gso dpyad sogs sbyong bdar mdzad/_dgung lo drug pa nas dag pa'i snang ba mang po shar/_chung ngu'i dus nas dpal lhun grub steng gi chos grwar zhugs/_rig 'dzin rgod ldem can gyi rnam 'phrul sde dge grub thob kun dga' rgya mtsho la gtsug phud phul/_mtshan kun dga' bsod nams chos 'phags su gsol/_pha wang zhig la zhabs rjes byon pa da lta'ang 'du khang chen mo'i shar sgo'i rgyab tu yod/_dpal sa skya pa'i gzhung la bslab sbyang gsan bsam ci rigs mdzad pa'i skabs snying po ye shes kyi don tshol ba la skom pa chu 'dod pa ltar gyur pas rmugs sangs kyi sgrub gnas su byon/_'dren pa dkon mchog rgyal mtshan las rdzogs pa chen po sogs zab chos mang du gsan cing thugs nyams su bzhes pas rtogs pa'i klong brdol/_de nas dbus phyogs su phebs/_nyang por grub chen bkra shis tshe brtan dang mjal/_smin grol gyi gdams pa mang du gsan/_brag dkar lha chur khams zas spangs te bcud len kho nas zab lam rtsa rlung thig le'i rnal 'byor mthar phyin par mdzad/_dang po'i chos sgor zhugs pa'i rten 'brel gyis gtsang sa ngor man du byon nas gsung ngag lam 'bras sog gsan/_slar phyir byon skabs bang rir rig 'dzin chen po 'ja' tshon snying po'i zhabs la gtugs nas dbang khrid man ngag rdzogs par gsan/_lhag par 'di'i skabs su gter gyi skal pa can du lung bstan pa ltar/_spu bor byon te pho brang g.yu mtshor rad gling phur pa yang gsang bla med kyi sgrub pa la brtson pa'i tshe mnal lam du zangs mdog dpal rir mkha' 'gro rnams kyis gdan drangs nas zhag nyer brgyad bzhugs pa'i thugs nyams dang /_gu ru rin po che las smin grol rdzogs par gsan cing gter gyi lung bstan bstsal pa sogs rje rang gi gsung dag snang dbang gi rgyal por gsal/_dpal o rgyan bstan 'dzin mjal du byon pas mtshan lam la dpag ste thugs shin tu dgyes pas bsnyen bkur phun sum tshogs pa dang bcas rdo rje slob dpon du mnga' gsol ba gnang /_rten sngags 'chang rdo rje 'dzin pa chen po'i tshul du bzhugs/_zab gter gyi thog ma kha byang phyag tu byung ba dang bstun/_dgung lo nyer dgu par rigs ldan pad+ma skyid las rgyar bsten nas g.yu mtsho rin chen brag nas kha byang dang /_spu bo 'dong chu bde chen gsang ba phug nas dam chos dgongs pa yongs 'dus kyi skor rnams spyan drangs shing nyid kyi zab gter gyi gtso bo yin pas/_phyis su bzhes pa thams cad de'i yan lag yin par gsungs/_de nas rim bzhin/_tsha ba sgro brag nas dam chos sprul sku'i snying thig bka' srung zhing skyong dang bcas pa/_spu ri dwags rdzong phug nas/_zab don gsang ba snying thig_/dpal bde mchog_/bka' srung phyag bzhi pa'i skor dang bcas pa/_spu ri shel gyi yang sgrom nas snying thig tshe yang phur gsum dril sgrub sgos sgrub dang bcas pa/_srung ma e ka dzA Ti dang rang byung rgyal mo'i skor/_spu bo 'dong chu'i byang ngos kyi brag nas sbas yul pad+mo bkod pa'i gnas yig_/mdo khams sde dge'i sa gnas khro ri zil khrom dkar yag nas yi dam dmar nag 'jigs gsum gyi skor rnams spyan drangs pa las/_'jam dpal zhi sgrub kyi skor rnams zhal bshus pa las gzhan gtan la phabs pa mi snang /_bya bu lcags phur can nas dpal mgon gdong bzhi pa'i skor dang lha chen sgrub skor/_bsam yas dbu rtse steng khang nas bla ma rig 'dzin 'dus pa/_tshe sgrub tsha ba dmar thag_/bka' srung zhang blon dang spom ra'i skor/_ra sa 'phrul snang glo 'bur nub kyi steng khang nas snyan brgyud gtsug rgyan yid bzhin nor bu'i skor rnams spyan drangs na'ang gtan la 'bebs par ma mdzad par mngon/_spu bo'i bdud ri gnam lcags 'bar ba nas sgyu 'phrul zhi khro dang bka' brgyad skor bka' srung bcas/_ra tsag rdo'i mchod rten nas dpal mgon stag zhon skor rnal 'byor pa dung phreng can gyis bton nas phyag tu phul ba dang /_gzhan yang g.yu mtsho gshin rje'i dong kha/_rig 'dzin gsang phug_/bse rag cog_/na bun rdzong /_rta shod dkyil 'khor thang sogs nas snga phyir zab gter mang du spyan drangs pa gter 'byung las gsal/_sbas yul pad+mo bkod pa gtsos mtha' dbus kyi gnas chen mang po'i zhal phyes/_gong gi gter kha rnams dang lhan du sku tshab dang phyag mtshan dam rdzas kyi rigs bsam gyis mi khyab pa spyan drangs/_mdor na gnas gter brgya rtsa/_myang grol stong rtsa sogs kyi bka' bab tu gsungs pa ltar phal cher mngon du gyur/_dgung lo zhe gnyis par sde dge bla ma byams pa phun tshogs khu dbon gyis gdan drangs/_rje nyid sngar bzhugs kyi grwa khang du bdud 'dul lha khang du grags pa bzhengs nas bstan srid la phan pa'i lung don bsgrub/_kaHthog rdo rje gdan yan snga 'gyur rnying ma'i gdan sa rnams su zhabs bkod nas skal ldan gyi slob ma mang po rjes su bzung /_'dzing rnam rgyal dang nye ba'i nobs kyi phu stag phu brag ring du rgyun ring tsam bzhugs shing thugs dam mdzad pa'i gzims spyil da lta'ang yod/_gling tshang du phyag phebs nas gling dpon po dang mchod yon rten 'brel legs par 'grigs/_thugs rje chen po nam mkha'i rgyal po'i bum sgrub mdzad skabs rtags mtshan ngo mtshar bsam las 'das pa byung ba'i sgrub rgyun da lta'ang mchis/_bar khams/_sga stod/_bar ma lha steng /_ri bo che sogs su rim par gdan drangs pa ltar phebs/_bstan 'gro'i don mtha' yas pa mdzad/_khyad par spor ne brag tu gnam chos mi 'gyur rdo rje dang mjal 'dzom chos gsan res sogs rten 'brel legs par 'grigs/_de dag gi mtshams sbyor grub chen karma chags med kyis mdzad nas bsngags brjod kyi me tog 'thor/_chos bdag gi gtso bo lha btsun chen po nam mkha' 'jigs med/_rig 'dzin klong gsal snying po/_rba kha sprul sku chos kyi rgya mtsho/_rdzogs chen pad+ma rig 'dzin/_kun bzang khyab bdal lhun grub dang /_grub chen pad+ma nor bu sogs ta'u'i phyogs kyi rdo rje 'dzin pa mang pos mtshon mtha' yas shing /_khyad par sku'i gdung rgyud rgyal sras nor bu yongs grags sogs rim par byon pas chos brgyud dang phrin las ma nyams shing bdag cag gis kyang yongs su rdzogs par nos so/_/de lta bu'i mdzad pa mthar phyin nas sbas yul pad+mo bkod pa'i gnas sgo rags rim tsam gsal bar mdzad pa'i rjes/_dgung lo nga brgyad pa chu pho byi ba'i lor pad+ma 'od kyi pho brang chen por gshegs pa'i skabs sgra dang 'od dang me tog gi char sogs ngo mtshar ba'i cho 'phrul mtha' yas shing/_khyad par sku gdung yang cung zad tsam ma gtogs 'od du yal ba'i lhag ma khru gang tsam lus pa phyis zhugs su phul bas gdung chen lnga dang ring bsrel du ma'i phung por gyur to/_/rje 'di nyid kyi sprul pa'i rnam rol 'ga' zhig byon par grags pa las yongs su grags pa rig 'dzin klong gsal snying po'i rgyal sras bsod nams lde btsan gyi sprul rgyud rim byon dpal kaHthog rdo rje gdan gyi seng ge'i khrir bzhugs bzhin pa'o/
mdo khams 'ba' tser gter ston pad+ma chos rgyal gyis kyang zab gter mang du bzhes pa kun gyi mthong snang du grub/_byin rlabs nus mthu che bar grags/_da lta'ang gdan sa ma stong tsam dang chos brgyud thor bu yod par snang /_rig 'dzin tshe dbang nor bu sku chung ngu'i dus mjal zhing chos 'brel cung zad gsan par snang /_kho bos kyang brgyud pa gsum ldan gyi khyung dmar tsam zhig nyer mkhor nos so +
dam tshig sgrol ma mon mo bkra shis khye'u 'dren ni/_mon tsha 'og tu 'khrungs/_chung ngu nas chos kyi rigs sad pa dang mnal lam du mkha' 'gro'i brdas bskul nas lho brag phyogs su byon/_thog mar ye shes mtsho rgyal gyis rjes su bzung zhing smin par mdzad/_slar la yag mon mkhar steng du o rgyan rin po che mjal/_zab mo'i gdams pa snying por dril nas gsungs pas dngos grub brnyes/_phrin las kyi gzungs mar bzhes/_spa gro stag tshang du slob dpon chen po rdo rje gro lod kyi skur bzhengs pa'i skabs sku lus 'dod rgur bsgyur bas stag mo'i tshul du sprul nas chibs kyi rnam par mdzad/_yab yum gnyis kyis bod khams kyi dregs pa can thams cad slar yang dam la bzhag_/zab gter mtha' yas pa sba bar mdzad pa sogs kyi bdag po'i rkyen du gyur pas ma gcig mtsho rgyal gyi rjes nas bod khams 'dir mkha' 'gro 'di bka' drin che bar khums/_mthar sku lus ma spangs par zangs mdog dpal gyi ri bor gshegs te da lta'ang bzhugs so +