Property:GyatsaBioWylie
This is a property of type Text.
A
sangs rgyas snang ba mtha' yas dang gu ru pad+ma dbyer med pa'i rnam 'phrul sa gsum du grags pas khyab pa'i dpal ldan jo bo rje dI paM ka ra ni 'phags bod gnyis na yongs su grags pa'i mkhas grub chen po/_byang chub sems kyi mnga' bdag bod khams la bka' drin lhag par che ba ste/_rnam thar grags che bas 'dir ma bkod cing /_rje btsun sgrol mas lung gis bskul zhing bod kyi rgyal pos spyan drangs pa ltar gangs can du phyags phebs/_sangs rgyas kyi bstan pa'i ga dar mdzad cing nyams pa rmang nas gsos/_lha sar rang bzhin gyi rnal 'byor ma phal pa'i snang ngor smyon mar brdzu ba zhig gis lung bstan te ka ba bum pa can nas 'dom phyed gzhal ba'i sa nas chos rgyal srong btsan sgam po'i bka' chems kyi yi ge chen po/_btsun mo rnams kyis bkod pa'i lo rgyus dar dkar gsal ba/_blon po rnams kyis byas pa'i lo rgyus zla ba'i 'dod 'jo bcas dkar chag shog dril gsum bzhes/_gter srung gnyan pas de nyin rang du rnal 'byor pa sogs mi bzhis zhal bshus/_do nub slar sba dgos pas lhag ma bag tsam lus par bshad/_jo bos rnal 'byor pa chen po la gtad/_des bya yul pa/_des thugs rje chen po'i che ba'i yon tan zhig lha sa'i dkor gnyer la gnang /_mthing shog la gser gyis bris pa'i bu yig gdung rten dang ma phyi glo 'bur gyi rta mgrin lder sku la bcug skad/_gzhan yang jo bo 'dis 'phags yul nas kyang b+he ta pad+ma can gyi lha khang nas gtsug tor sde lnga'i rgyal mtshan 'dzug pa'i cho ga sogs gter nas bzhes pa'ang grags so +
byang gi phyi gong ru ba 'tshub mas khyer:_bod 'dir dam chos bstan pa gsum du gyes:_bka' gter gnyis kyis sangs rgyas bstan pa skyong:_gtsang gi ru mtshams sbas pa'i gter kha 'di:_mi bzhag 'don pa'i rtags de bstan nas 'byung:_a ya bon po lha 'bum zhes bya 'byung:_zhes pa'i gter ston bon po lha 'bum ni/_bai ro tsa na dang dran pa nam mkha' zung du 'jug pa'i rnam 'phrul gtsang rta nag gi phyogs su 'brom ston pa sogs dang dus mnyam du 'khrungs/_rten bon sngags/_mtshan lha 'bum mam bon gyi phyogs su gu ru rnon rtser grags/_'dis gtsang gi ru mtshams dang nye ba'i rta nag dung phor brag nas chos bon sman rtsis kyi skor rgya che'i gter zhal phyes par grags kyang /_rang lugs la mdos phran tsam gyi lung rgyun las gzhan mi bzhugs/_bon phyogs su ma rgyud gsang mchog thugs rje nyi ma'i bskyed rdzogs kyi skor rgya chen po'i dbang lung khrid gsum da lta'i bar dar rgyas dang thugs gtsigs che bar snang /_phyis 'dir rje bla mar bde mchog snying po'i skor gyi bla rdzogs thugs gsum yang gter gyi tshul du bka' babs pa'ang bzhugs +
B
rgya gar nas byon pa'i gter ston badz+ra ma ti zhes pas/_bal yul li shan ti'i gnas nas spyan drangs pa'i rdzogs chen mkha' klong 'od 'phro dang /_de'i las tshogs klu dang sa bdag gi gnyen por gyur pa o rgyan chen po sku mdog mthing ga phag la chibs pa'i sgom bzlas dang /_sman sngags bsdebs nas rims tre tre ho sogs snyigs ma lnga bdo ba'i nad rims rnams srung bcos kyi gdams pa zab mo zhal shes dang bcas pa gdan drangs/_de skabs tshal gung thang pa gzhon nu bsam gtan gyis bal yul du byon pas gter ston dang mjal nas gter chos rnams bod du spyan drangs pa/_bka' babs lung zin ltar bla ma dpal 'byor zhes pa nas brgyud de dar rgyas su gyur na'ang /_deng sang ni drag mthing sgom bzlas kyi lung rgyun tsam las gzhan mi bzhugs so +
bal po a hU~M 'bar ni/_gtsang gi lho rgyud du 'khrungs/_rten sngags 'chang /_sna nam rdo rje bdud 'joms kyi sprul par lung gis gsal ba ltar spa gro'i cal gyi brag dmar nas dzaM nag srog gi 'khor lo chen mo dang glang chen bcas chog sogs gdams ngag zab mo rnams spyan drangs pa dpal dga' ba lung pa nas rim par brgyud/_phyis kyi bar lung dang phyag len sogs yod par snang na'ang deng sang dpe rgyun tsam mjal du med pa'i skabs/_rje bla mar 'khor lo'i dpe rnying mkha' 'gros dngos su bstsal pa dang sgrub thabs las tshogs kyi skor yang gter du gtan la phab pa kho bos kyang legs par nos te yig cha'i zhabs 'degs spel ba'o +
grub pa'i dbang phyug chen po bo dong rtogs ldan sangs rgyas mgon po de nyid kyis ring brgyud bla ma rdo rje gdan pa nas ba ri lo tsA ba las byung ba'i seng gdong ma'i skor gsan nas thugs nyams su bzhes pa la brten/_shangs rta rnar ye shes kyi mkha' 'gro sing ha mas dngos su rjes su bzung zhing dpal o rgyan chen pos sprul pa'i dkyil 'khor du smin grol rdzogs par bstsal pa las/_rjes gnang gi bka' bcu dang bskyed rdzogs las tshogs dang bcas pa'i gzhung glegs bam gcig gi rgyun ma nyams par bzhugs pa rjes gnang rnams kho bos kyang nos shing gter mdzod du bzhugs/_grub brnyes karma chags med kyi seng gdong ma'i skor yang gtso bor gzhung 'di la brten pa yin no/ +
spa gro gnam thang dkar po sog dmag 'joms:_las su dme 'khrugs byed cing lcags cha gyon:_bum thang rtsis lung sbas pa'i gter kha 'di:_mi bzhag 'don pa'i rtags de bstan nas 'byung:_gter ston bon po brag tshal ces bya 'byung:_zhes gter ston 'di gtsang rong zar gyi phyogs su 'khrungs/_rus bon po yin pas der grags/_bai ro dpal seng zung du 'jug pa'i rnam 'phrul/_rten sngags 'chang /_sku gzugs che stobs ldan pa la bla dwags mtshan brag tshal dang /_gsang mtshan rdo rje 'bar du grags/_bum thang rtsis lung ni/_dus gsum sangs rgyas kyi sku li ma bzhugs pa'i lha khang la/_mon pa rnams kyis dkon mchog gsum gyi lha khang zer ba de yin/_gter gnas de nas rdzogs chen gu ru bzhi pa/_gu ru bzhi'i lo rgyus kyis mtshon shrI sing ha'i rdzogs rim bla ma dmar khrid zer ba'i pusti gdan drangs/_'di yi nang na/_sgom ma myong dang bral ma myong/_/mi sgom don dang mi 'bral ba/_zer ba'i man ngag de yod gsungs/_'di byang gter ka dag gi skabs su yang 'byung /_gzhan yang phur pa la sogs pa'i chos skor dang /_shangs kyi skye ka thang shing brag nas bton pa'i rA hu la shi sa bstan pa ru sbal nag po'i ser srung bcas chog ma zab pa'i bka' rgya srog gi rgya can ma'i skor sogs chos mang du yod pa las rA hu la shi sa bstan pa tsam gyi lung da lta'ang snang /_phyis pad+ma 'od gsal mdo sngags gling pa la byin rlabs nye brgyud zab mo'i bka' babs pa'i tshe gur sbrags ma'i gdams zab gter rnying dang mthun pa'i ngo mtshar can bzhugs so +
C
lcang sman don grub dar rgyas kyis gnyal smad brag nag mda' sgro nas dug srung rta ri ma'i skor spyan drangs pa phyis kyi gso dpyad kyi yig cha 'ga' zhig tu'ang bkod 'dug_khams pa 'brug sgom zhig pos rta mgrin nag po'i chos skor gter nas thon cing 'di'i gdung rnams deng sang yang nang chen phyogs la yod par grags +
lce btsun seng ge dbang phyug ni/_yul nyang ro gnyan tsho'i lce thub pa'i dbang po zhes pa'i sras gzhon nu nas thos pa'i pha rol tu son/_gnas brtan ldang ma lhun rgyal dang mjal te kha rag tu rdzogs chen gyi gdams pa rdzogs par gsan/_slob dpon 'das nas gter dpe rnying pa rnams lang gro 'chad pa stag 'dra dang /_'o yug_/byar gyi phu bcas gter kha gsum du sbas/_gnas 'pho zhing sgom pa'i tshe mnal lam du bi ma mi tras lung bstan pa ltar bsam yas mchims phur byon/_snying thig zab pa pod bzhi gter srung gis phul ba bsnams nas 'o yug phyi gong rdza'i ra bar bzhugs pa'i tshe bi ma mi tra dngos su byon nas zla ba phyed du bzhugs shing dbang khrid gdams ngag rdzogs par gnang /_gnas de nyid du lo bdun bsgoms pas phung po lhag med grub/_sprul sku zhang ston la gdams ngag rdzogs par gnang /_lo brgya dang nyi shu rtsa lnga lon nas nam mkhar 'od phung du gshegs so/_/gter sbas pa'i lo sum cu na rong mnar mda'i lce sgom nag pos 'o yug gi gter phyungs te rang nyams su blangs shing gzhan la'ang bshad/_zhang ston bkra shis rdo rjes byar gyi phu'i brag dkar them pa 'dra ba nas gsang ba bla med kyi skor rnams spyan drangs/_lang gro'i 'chad pa nas shangs pa ras pas gdams ngag 'ga' zhig phyungs nas dar rgyas byung bar bshad/_mdor na bi ma'i man ngag snying thig chen mo bka' ma snyan brgyud thig le gsang skor sbas blo gros dbang phyug nas rim par brgyud pa dang /_gter ma gong smos gter ston lngas bton pa/_rgya che ba rgyud bcu bdun so so'i dgongs 'grel dang bcas pa/_bka' srung nag mo khros ma'i rgyud de bco brgyad/_man ngag gi yi ge brgya dgu bcu/_zab pa pod bzhi bcas sngon dus dar rgyas su byung na'ang deng sang rgyud skor tshang ma dang /_man ngag skor thor bu/_zab pa bod bzhi tsam gyi rgyun snang ba kho bos kyang nos/_khyad par rje bla ma 'od gsal sprul pa'i rdo rje dgung grangs nyer bzhi par mkha' 'gro phyi gong rdza'i ra ba dang nye ba'i gtsang ru mtshams 'o yug shug pa'i gling gi thad du pheb skabs/_sngon lce btsun chen po 'od skur gshegs pa'i skabs kyi gnas dus ston 'khor 'das dus kyi chos 'khor bskor ba bcas kyi ngang tshul shin tu gsal ba ltar rjes dran gyi tshul du gtan la phabs pa'i dus gsum mkhyen pa bi ma la'i zab tig man ngag rgyal po klong lnga'i yi ge dum bu gsum pa zhes zab 'dril ngo mtshar byin rlabs can de nyid/_spyir rgyal dbang theg mchog rdo rje yab sras dang gter chen mchog gyur gling pa sogs skyes chen khyad par can rnams la mnog chos su bstsal cing /_bye brag kho bo cag la'ang thog ma kho nar smin grol gyi gdams pa dmigs su bsal ba'i bka' drin bstsal pa ltar nyams len 'brel 'jog dang smin grol gyi yig cha 'dus gsal gyi zhabs tog dang gzhan la 'chad spel yang ci nus bgyis pa'o/
dpal lha'i sras po dam 'dzin mu rub btsad po ye shes rol pa rtsal gyi rnam 'phrul 'gran zla dang bral ba'i sprul pa'i gter chen mchog gyur bde chen zhig po gling pa ni/_o rgyan dri med kun dga'i gter lung las/_yor stod grwa yi la bar du:_rat+na o rgyan mtshan 'chang ba:_mchog gter chos la longs spyod pa:_chos bdag pad+ma'i thugs sprul 'byung:_zhes pa dang tshig don mtshungs pa rong ston pad+ma bde chen gling pa'i lung las kyang 'byung zhing /_rat+na'i spyi lung ma 'ongs chos bdag nyer lnga'i gras su'ang /_nor bu'i ming can khams kyi lho phyogs 'byung:_zhes gsal bar gsungs pa ltar/_mdo khams lho rgyud yor stod dang 'brel bar sgom sde grwa nang gi sa'i char nang chen ching hu'i blon po a lcags 'bru'i rigs yab sdom pa sngags 'chang pad+ma dbang phyug dang /_yum tshe ring g.yang mtsho gnyis kyi sras su sa mo glang lo chu stod zla ba'i tshes bcu la 'ja' 'od sogs ltas bzang po dang bcas te 'khrungs/_sku chung ngu nas dam pa'i spyod pa ngo mtshar ba bstan cing yi ge 'bri klog kyang tshegs chung ngus mkhyen/_bla dwags kyi mtshan nor bu bstan 'dzin du gsol/_gzhan gyis skul ba po med par thugs dam gyi rim pa'ang mang du mdzad/_lho kun bzang mchog sprul la gtsug phud phul bas mtshan dkon mchog bstan 'dzin du btags/_phyis kyi bar yongs grags kyi mtshan 'di yin pas dkon mchog gi legs sbyar rat+na zhes pa gong gi lung don dang 'byor ba yin no/_/dgung lo bcu gsum par ma Ni kha zhes par rol rtsed du byon skabs o rgyan rin po che dngos su byon nas sa cha sogs la ci ming dri ba ltar mdzad pa la so sor lan zhus pas/_sa la ma Ni ka_/khyod la nor bu bstan 'dzin/_lung pa la ar+Ya nang zer bas khyod la 'jig rten na khyad par 'phags pa zhig 'ong zhes lung bstan nas 'ja' ltar yal/_'di skabs stag lung ma rin po che las dge tshul gyi sdom pa bzhes/_dpa' bo brgyad pa gtsug lag chos kyi rgyal pos bla ma dgongs 'dus thugs sgrub tsha ba dmar thag dang las byang me tog phreng mdzes kyi dpe lung byin rlabs nan du gnang nas 'di la nyams bzhes mdzad na legs par gdams shing don gyis gter brgyud gtad/_snga phyir rgyal dbang kar 'brug yab sras/_'bri gung mchog sprul/_zur mang gdan mkhan slob sogs yongs 'dzin du ma las mdo sngags gsar rnying gi dbang lung man ngag_/bshad rgyun phyag len/_gar thig dbyangs rol sogs mtha' yas pa gsan cing de dag gi don tshegs chung ngus shin tu mkhas pa'i tshul bstan/_dgung lo nyer lnga par gu ru'i lung gis bskul ba ltar dpal spungs kyi gdan sar byon nas chu glang cho 'phrul zla bar si tu rin po che pad+ma nyin byed dbang po mjal/_phur pa dbang chen bzhad pa sogs phul bas dgyes bzhes ngos bar chad sel ba dang /_zhabs pad brtan pa'i rten 'brel 'grigs/_gter sgrub dang gsang rgya mthar phyin pa dgos pa'i bslab ston nang ma bstsal pa ni/_gsang lung las/_de dus chos bdag ji ltar 'byung ba ni:_gser ldan 'babs pa'i g.yon 'gram dpal ri'i spor:_nga yi gsung sprul pad+ma nyin byed ces:_rgyal ba'i gdung 'tshob sgrub pa'i rgyal mtshan btsugs:_dus mtha'i mun rum nang du sgron me 'dzin:_tshe sgrub mthar phyin brgyad cu rtsa lnga thub:_rten 'brel legs 'grigs dgu bcur bstan pa 'dzin:_lha sras nyid kyis nyer lnga'i dus su mjal:_sba gsang med par blo gtad de ru skyol:_de na ma bsgrig lhun grub rten 'brel mang:_zhes gsungs pa ltar rtsa ba'i rten 'brel gyi sna kha ma log pa'o/_/de nas rim par mkhan chen byang chub sems dpa' zla bzang sprul pa'i sku las byang chub tu thugs bskyed pa sogs zab chos 'ga' zhig dang /_kho bo las kyang thugs chen bde gshegs kun 'dus kyis thog drangs sgyu 'phrul zhi khro'i dbang dang bshad bka' gtsor gyur rnying ma bka' ma phal mo che dang /_gter chos mang po gsan/_khyad par rten 'brel mdo chings las/_nam mkha' mdzod du sbas pa'i zab gter rnams:_mi bzhag 'don pa'i skyes bu smon lam can:_lha sras khyod kyi skye ba'i tha ma 'byung:_de dus lo paN rje 'bangs phal cher 'dzom:_khyad par mnga' bdag yab sras mjal nas su:_gcig grogs gcig byed las 'phro rim par sad:_nga yi gdams pa mthar thug rnams dang mjal:_dag pa'i snang ba rang nyid dngos dang 'phrad:_gsang sngags gdams pa'i lag len dmar khrid ston:_rang nyams blangs pas 'bad med grub pa thob:_dngos grub brnyes pa'i slob ma mang du 'byung:_zhes sogs lung byang phyi nang gsang ba mang pos shin tu gsal ba ltar/_lo de'i dbyug pa zla bar gangs can mkhas grub rgya mtsho'i gtsug rgyan thub bstan yongs rdzogs kyi mnga' bdag rje bla ma 'jam dbyangs mkhyen brtse'i dbang po mjal bar ched kyis phebs pa na/_rje nyid nas kyang mnga' bdag skyes rabs rim par brgyud pa'i 'brel bar dgongs nas thog ma nyid du phur pa yang gsang spu gri dang phyis mkhon lugs phur pa'i dbang chen bstsal pas phyi nang gsang ba'i bar chad bsal/_yang tig yid bzhin nor bu'i dbang gi skabs bla ma paN chen bi ma dngos su gzigs pa sogs dag pa'i snang ba khyad par can shar cing rig pa rjen par ngo 'phrod/_sngags srung ma'i srog gtad skabs sa g.yo ba lta bu'i zil chen po byung zhing e ka dzA Ti dngos su gzigs/_dpon slob gnyis char la lo gsum gyi mtshams dngos grub chen po sbyin par gsungs pa phyis rdzogs chen sde gsum thon pa'i snga ltas so/_/dgung grangs nyer bdun shing yos dbyug pa zla bar yang dag lha dgu'i dbang chen gnang skabs bla ma he ru ka spyi bo nas thim pa'i nyams shar bas snying kha'i rtsa mdud grol/_de nas brtsam rdo rje'i mgur glu thogs med du brdol/_sngon chad thugs sgrub bar chad kun sel gyi brda' yig ji bzhin ma khrol ba'ang tshegs med par mkhyen te/_rje bla ma'i zab gter thugs sgrub bde gshegs 'dus pa dang don gcig pa ma zad tshig ris phal cher yang mthun par byung bas rnam gnyis lhan rgyas pas ma bu zung bsdebs kyi tshul du bar chad med par gtan la phabs/_gter sgrub kyang lhan cig tu mdzad pas gu ru yab yum gyis dngos su rjes su bzung ba sogs dag pa'i snang ba mtha' yas pa shar/_gter kha du ma'i kha byang phebs pa sogs rten 'brel gyi sgo mang po 'grigs/_gcig la gcig thugs yid ches pas rje bla mas kyang gter gsar gyi smin grol bdud rtsi bzhes shing mnga' gsol bas rtsod med yongs grags kyi gter chen nyi zla ltar gyur/_rje rang gi gsung las/_thog mar bka' drin che ba'i yongs 'dzin bzhi/_zhes gsungs pa ni/_phyi so thar gyi mkhan po stag lung pa ngag dbang bstan pa'i nyi ma/_nang byang sems kyi dge ba'i bshes gnyen zla sprul karma nges don bstan pa rab rgyas/_gsang ba sngags kyi rdo rje slob dpon pad+ma gar dbang blo gros mtha' yas/_mthar thug nges pa don gyi rtsa ba'i bla ma pad+ma 'od gsal mdo sngags gling pa rnams su bzhed pa ste so so la gtan tshig yod par snang /_yar 'khyil dben pa'i gnas su yang zab dkon mchog spyi 'dus kyi bsnyen sgrub la bzhugs pas thog drangs/_gu ru'i lung bzhin 'og min karmar lo gsum gyi bcad rgyar bzhugs pa gtsor gyur pa'i thugs dam gyi rim pa la brtson zhing bskyed rdzogs rdzogs pa chen po'i nyams bzhes mthar phyin par mdzad pas grub pa'i rtags mtshan mtha' yas pa mngon du gyur/_phrin las rnam pa bzhir rang dbang bsgyur pa'i bdag nyid chen por mngon sum tshad mas grub pa'o/_khyad par rdzogs chen sde gsum gyi lung bstan las/_bka' nas bkar brgyud bar ma chad:_zab mo dngos dang dgongs pa'i gter:_yang gter rjes su dran pa'i gter:_dag snang snyan du brgyud pa yi:_bka' babs bdun gyi chu bo ni:_mnga' bdag yab sras skal bar babs:_snyigs dus bstan pa'i btsas chen byed:_zab rgyas nyi 'od lhag par brdal:_zhes sogs mang du 'byung ba ltar yab sras rnam 'phrul gter chen rnam pa gnyis la so sor bka' gter dag snang gsum las phye ba'i zab chos kyi bka' babs bdun dang ldan pa ste/_'dir dang po ni ring brgyud bka' ma deng sang rgyun bzhugs pa phal cher gsan cing mdo sgyu sems gsum gyi 'chad spel yang mang du mdzad par ma zad rje nyid kyi zab gter las mdo dang sgyu 'phrul sogs bka' ma'i gzhung ji lta ba'i chos skad grub mtha' slong nus pa'i sngon med ngo mtshar can byon pa rnams kyang don du bka' ma'i bka' babs pa yin no/_/gnyis pa rang skal sa'i gter ni/_dgung lo bcu gsum par brag dkar rdzong chung nas lha sras thugs dam sgrub thabs nyer bzhi dang dgongs 'dus bka' rtags rdo rje thod pa me long rnams bzhes pa nas brtsam/_dgung grangs so dgu par rje bla mas kha byang dang zhabs bskul phul ba ltar tsi ke nor bu spun gsum nas dam chos nor bu skor bdun/_gu ru'i sku tshab/_seng sgro+og sku rgyan rnams spyan drangs pa'i bar mchog gter sum cu rtsa bdun dang /_sbrags yang rdzong nas zhi byed skor bdun bcas/_de dag gi kha byang yang byang gnad byang snying byang la sogs pa dang rdzas gter phran tshegs ni mang du bzhes pa las/_gtso che ba zla nyin kha la rong sgo nas thugs sgrub bar chad kun sel/_na bun rdzong nas thugs rje chen po pad+ma gtsug tor/_'og min karma'i rgyab phyogs nas thugs dam zab pa skor bdun/_ye rgyal nam mkha' mdzod nas de'i cha lag rgyud lung gi skor rnams dang /_rtsa ba'i thugs sgrub dgongs pa kun 'dus/_sku tshab rnam gnyis sogs/_smad shod dzaM nang pad+ma shel phug nas dam chos rdzogs pa chen po rgya che ba sde gsum/_seng chen gnam brag gi brag ri gong mo 'og ma nas dam chos shog sde drug pa/_mkha' 'gro 'bum rdzong nas thugs rje chen po pad+ma sgyu 'phrul drwa ba dang 'khor ba dong sprugs/_karma'i dpal de'u nas ma mo spyi bsdus/_ke la nor bu spun gsum nas rje bla ma rin po che'i bka' lung bzhin thugs sgrub yid bzhin nor bu/_ye rgyal lho phyogs g.yu 'bal brag nas bka' brgyad bde gshegs kun 'dus/_zab pa rdzogs chen gser zhun/_rong me dkar mo stag tshang nas thugs sgrub rdo rje drag rtsal dang snying po skor lnga/_ru dam gangs khrod nas bde mchog sangs rgyas mnyam sbyor rnams mtshon pa tsam te gter gnas re re nas kyang chos dang dam rdzas sku rten phyag mtshan rnam grangs shin tu mang po byon cing /_de dag phal cher khrom gter du mdzad pas kun gyi dbang po'i spyod yul rtsod pa dang bral bar gyur/_mdor na sku gsung thugs yon tan phrin las kyi gnas gter brgya rtsa/_snying thig brgya rtsa/_myang grol du ma'i bkab babs su lung gis gsal ba ltar dpa' bo dbang chen brag nas mdo khams gnas chen nyer lnga'i mdo byang bzhes te de dag gi rtsa ba dang yan lag tu gyur pa'i gnas zhal du ma gsar du snang bar mdzad/_gu ru'i sku tshab kyi rgyu rim pa gsum tsam gter nas spyan drangs te sku tshab gnyis pa mang du 'phel bar mdzad pa sogs ngo mtshar bsam gyis mi khyab bo/_/gsum pa de las 'phros pa'i yang gter ni/_rje nyid kyi skye ba gong ma gter chen sangs rgyas gling pa'i gur drag hU~M dmar snying thig byin rlabs kyi stobs las bka' babs pa dang /_mkha' 'gro ma kun dga' 'bum pa'i ma rgyud gsang ba lam khyer nye brgyud du bka' babs pa'i smin grol kho bo la bstsal/_bzhi pa zab mo dgongs pa'i gter ni/_rje btsun sgrol mas legs so gsum gyis dbugs dbyung bstsal pa la brten sgrol ma'i zab tig gtan la phabs/_lnga pa de las 'phros pa'i rjes dran ni/_rje nyid gnubs khu lung pa yon tan rgya mtshor 'khrungs pa'i skabs kyi sngon gnas dran pa las gnubs chen 'da' ka'i zhal chems lung rdo rje bkod pa'i gdams pa gnang ba dang /_gnubs kyi kha pho bcas mdo tsam yi ger bkod pa dang /_ru lu'i 'dren stangs dang gar gyi rnam 'gyur mtha' klas pa/_sangs rgyas gling pa'i sngon gnas rjes dran la brten dgongs 'dus rtsal sprugs rnam dgu'i 'khrul 'khor phyag khrid zhib mor gtan la phab pa sogs bzhugs/_drug pa dag snang ni/_ri bo dbang zhu'i gnas gter gyi sgo 'byed skabs bi ma la'i sgrub phug tu paN chen nyid zhal gzigs te gdams pa bstsal ba bi ma la'i zab tig sogs bzhugs par snang /_bdun pa de mthun snyan brgyud ni/_dag pa'i snang bar zangs mdog dpal rir phebs te o rgyan rin po che las a ti zab don snying thig gi gdams pa gsan pa yi ger bkod pa sogs bka' babs bdun ldan gyi rnam thar mdo tsam bkod pa yin la/_snga phyir rtsa ba gsum gyi zhal gzigs shing lung bstan pa dang /_chos gter srung ma rnams kyis phrin las sgrub pa dang /_rnga yab dpal rir phebs pa'i dag snang rgyas bsdus skor mang yang 'di tsam gyis mtshon par nus so/_rang sgo dang tshogs sgrub gzhan dag gi rdor slob tu phebs pa bcas bsnyen sgrub yan lag bzhi ldan gyi sgrub chen sum cu rtsa gsum tsam mdzad/_bsam yas has po ri dang dpal chu bo ri sogs bod dang mdo khams kyi sa gnad rnams su bka' nan rab brjid dang /_gnas chen byin 'bebs mang pos mtha' dmag sogs rtsub 'gyur zhi zhing rgyal khams la bde legs 'phel ba'i phrin las lung don las 'byung ba rgya cher bsgrubs/_rgyal dbang kar 'brug yab sras/_'bri stag gtsor gyur bka' brgyud dang /_smin gling kaHdpal zhe rdzogs rnams kyi khrir bzhugs gtsor byas rnying ma/_gzhan yang dpal sa skya pa sogs ris su ma chad pa'i bstan 'dzin rnams la dngos dang brgyud pa'i sgo nas zab chos kyi smin grol bstsal cing /_myang grol gyi sbyin pa ni bod khams mtha' dbus thams cad du'ang khyab/_khyad par rtsa ba'i chos bdag rnam bcu phal che ba dang rten 'brel legs par 'grigs pa la brten nas thugs sgrub bar chad kun sel gtso bor gyur pa'i gter chos kyi phrin las kyang rgya cher 'phel/_'og min mtshur phur yang phur sgrub chen gyi rtsa 'chams 'bring po bcas rgyun 'jag gis mtshon dgon khag mang por gter gsar gyi chos bka' che phra'i sgrub mchod sogs je dar du 'gro bar snang /_bod khams bde thabs chos bcu'i nang tshan rten 'brel gyi chos skor gtan la phabs nas de'i don bzhin mkhan slob chos gsum gyi dus ston mdo sngags bstan pa gnyis ldan gyi bshad sgrub las gsum rgyas pa'i cho ga ngo mtshar ba'ang dpal spungs kaHthog rdzogs chen rnams su rim par mdzad/_gdan sa dngos karma ri/_gnas brtan sgang /_rtsi ke 'dus mdo rnams su gtsug lag khang rten dang brten par bcas pa bzhengs/_phyi ma gnyis su dge 'dun sde dang mdo sngags bshad sgrub kyi rgyun yang bkod/_de lta bu'i mdzad pa mthar phyin nas re zhig don che ba gzhan la dgongs nas dgung grangs zhe gnyis bzhes pa lcags pho rta lor sku bsnyun pa'i tshul bstan pa'i skabs sangs rgyas kyi zhing khams rnam par dag par phebs pa'i dag snang shar/_hor zla lnga pa'i tshes gcig la sa g.yo ba dang 'ja' 'od sogs ngo mtshar ba'i cho 'phrul chen po bstan te zhi ba'i dbyings su snyoms par zhugs/_rgyud 'dzin gyi gtso bo gnubs nam snying gi sprul par lung nas zin pa'i thugs sras 'gyur med tshe dbang grags pa sogs kyis gshegs rjes dgongs rdzogs mchod 'bul gyi rim pa rgya chen po bsgrubs/_zangs gser gyi mchod sdong thog tshad chen por longs pa bzhengs pa'i nang du sku gdung ril por bzhugs su gsol ba dang /_rtsi rke nor bu gling du gdan sa'i dbu 'dzug tsam las ma grub pa'ang mthar phyin pa grub par mdzad do/_/gong du smos pas mtshon/_rje bla ma rin po che gtsor gyur pa'i skyes chen du mas zab chos myang grol sogs kyi phrin las spel ba ni mtha' yas shing /_dman pa bdag lta bu la'ang zab chos kyi bka' drin bstsal pa phal mo cher bsnyen sgrub/_sgrub chen/_'chad spel/_dbang bsgrig gi yig cha sogs srid zhu ci nus spel cing /_bod du bgrod skabs kar 'brug yab sras sogs la gter gsar gyi chos bka' thog mar phul/_shel brag tu sgyu 'phrul zhi khro'i sman sgrub gtsor byas gu ru'i sgrub gnas so sor zab bdun gyi sgrub 'brel dang tshogs mchod stong rtsa re sogs bgyis shing mnga' ris dbus gtsang kun tu'ang gter ston gyi mtshan dang gter chos kyi grags pa thog mar gsal ba'i zhabs tog cung zad grub pa yin no/_/gter chen 'di nyid zhi bar gshegs pa'i lo de'i mgo zla ba'i tshes bco lngar gangs can gter ston grub thob yongs kyi 'khor los sgyur ba chen po pad+ma 'od gsal mdo sngags gling pa'i dag pa'i gzigs snang du/_nub phyogs kyi zhing khams pad+mas khebs par gter chen nyid byang chub sems dpa' pad+ma'i myu gu'i skur bzhengs pa dang mjal nas sgrub thabs dang dbang bskur zhal gyi gdams pa'i bdud rtsi lhug par gsan/_zla ba gcig tu gsang ba'i dam tshig gis rgyas btab/_rgyal zla'i tshes bcur tshogs kyi mchod pa dang rjes su 'brel bar gtan la phabs pa'i yi ge pa kho bos zhus pa'i tshe/_sa gzhi'i khyon la drod glo bur du babs pas 'khyags pa rnams chu bo'i rgyun du gyur pa'i dge mtshan yang dbang po'i mngon sum du gyur pa'i byin rlabs kyi mtshan ma'ang mthong bar ma zad/_gdams pa 'di'i skor rjes 'jug rnams la ched du dgongs te 'das rjes zhal gdams snying por dril nas bstsal par 'dug pas gter chen de nyid kyi slob brgyud du gtogs pa rnams kyis nyams bzhes snying por mdzad na shin tu gnad gal che ba yin 'dug pa'ang 'phros don du smos pa'o
nyang smad nyi ma mdo ru rdzong gcig 'byung:_dmag dpon brgya dang bcu drug phya lung tshogs:_g.yas ru gtsang 'gram sbas pa'i gter kha 'di:_mi bzhag 'don pa'i rtags de bstan nas 'byung:_o rgyan mdo sngags gling pa zhes bya 'byung:_zhes pa'i gter ston mdo sngags gling pa mchog ldan mgon po ni/_bai ro'i sprul pa kun skyong gling pa'i yang srid de lho brag ban pa'i nang tshan snabs kyi 'phyong lung zhes par rgya'i rigs kyi yab sum dar rgyas dang /_yum bu chung sman gnyis kyi sras su yi ge d+hI'iHsgra sgrog bzhin du sku bltams/_byis pa'i dus na thugs rgod cing brtul zhugs dang shes rab che/_'bri klog ma bslab par mkhyen/_dbang bskur chos 'chad sgra bsgyur ba sogs kyi tshul mdzad cing rdo la zhabs rjes kyang byon/_dgung lo bdun pa la yum gshegs pas ma yar mos legs par ma bskyangs pas lo shas 'o brgyal bar byung /_re zhig khyung tshang dgon pa'i grwa pa mdzad cing chos rje gtsang pa'i drung du dge bsnyen gyi sdom pa sogs chos mang du gsan/_skye ba mang du dran pas sku skye zhes pa'i mtshan thogs/_sgrob dgon par sku mtshams mdzad pas slob dpon rin po che'i byin rlabs kyis thugs nyams 'ur te pha wang zhig nas kha byang gi shog ser dang byin rten 'ga' zhig bton/_slob dpon rin po ches mkhon grib bsal ba dang dbang bskur cing brda' chos mang du bstan pa byung /_chags byang chub gling nas pad+ma gling pa'i zhal slob gter phran 'dzin pa bsod nams pas kyang kha byang gtad cing zhabs tog phul/_chos kyang mang du gnang /_de skabs bsam yas su dkar chen kun dga' grags pa pheb pas mjal ba na lung bstan gnang /_thugs rje chen po ye shes 'od mchog dang bla ma dgongs 'dus sogs zhus/_sgrub pa gtso bor mdzad/_bar skabs su tsa ri trar byon pas dag snang dang rten 'brel mang du byung /_kong po nga la nas gsang gter zhig kyang bzhes/_dwags phyogs su 'gro don cung zad bskyangs/_rig 'dzin pad+ma gling pa mjal bar phebs pas yab sras 'phrad pa lta bu'i thugs brtses bskyangs shing gter chen rdo rje gling pa'i sprul par thag bcad pas rdor gling gi sprul skur yongs su grags/_chos dang dam rdzas shog ser sogs mang du gnang nas g.yas ru gtsang 'gram gyi zab gter 'don par nan gyis bskul yang nyid kyi gsang yum a lce rdo rjes bshol btab pas ma thon/_'on kyang mnga' ris gung thang rgyal po dang /_dwags po rtse le rig 'dzin bsod nams rnam rgyal sogs kyis stod smad du gdan drangs/_dbus gtsang gi sde dpon phal cher gyis kyang zhabs nas btegs/_lha sar mtha' dmag zlog pa btsugs pas gtor mar me 'bar ba dang nam mkhar song ba'i cho 'phrul bstan pa sogs chos dang zang zing gi phrin las ni shin tu rgyas par byung /_dgung lo so lnga par ban pa'i gzhung du drug ral lha khang dang o rgyan rin po che'i gser sku rgyab mtho nyer bdun pa bzhengs shing bstan pa rgya cher spel ba'i dgongs pa gtad na'ang zab gter bzhes pa'i rten 'brel 'chug pa'i rgyus ban pa khyung tshang pa sogs log pa'i blo can rnams kyi byed pas gzhan rkyen drag pos sku gshegs nas mdzad pa 'phro can tu gyur/_sku'i skye bar mdo sngags gling par grags pas gter kha 'ga' zhig bzhes kyang 'gro don ma byung /_de'i sku skye yang dag rgya mtshos spu bo rba kha gsang sngags chos gling btab/_de'i sprul pa'i sku rig 'dzin chos kyi rgya mtsho 'ja' tshon snying po'i chos bdag karma chags med dang rdzogs chen pad+ma rig 'dzin sogs kyi bla ma 'gro don che zhing /_sprul brgyud da lta'i bar byon par 'dug_/sku'i rgyal sras bstan pa'i 'byung gnas phyis 'phyong rgyas su bzhugs te phrin las rgyas/_mkhas shing dngos grub brnyes/_dag snang rtsa gsum zab mo kun 'dus kyi chos kyi 'gro don rgya cher byung zhing gter bdag gling pa dang rgyal dbang lnga pa rnams kyi bar du dbang lung gi rgyun byung /_de'i skye ba yar 'brog yon po dor byon pa'i sprul sku mdo sngags 'byung gnas te zab gter bzhes pa ma gsal yang 'gro don dpag med byung zhing /_gnas der lha khang thog gsum pa ngo mtshar can rten dang brten par bcas pa bzhengs pa da lta'ang yod/_gter ston de nyid gong du smos pa ltar zab gter gyi rten 'brel dus la yol bas rgyun thob pa'i gnas med kyang /_pad+ma 'od gsal mdo sngags gling par dag snang du bka' babs pa'i rta mgrin gnyen po lha lnga'i gzhung nyung ngu ngo mtshar can snang ba kho bor ched kyis bstsal pa ltar skal pa bzang por shes nas bsnyen sgrub kyi 'brel 'jog dang /_rin chen gter gyi mdzod chen por bzhugs su gsol ba yin no
lha sras mu khri btsad po'i rnam 'phrul rig 'dzin chos rgyal rdo rje ni/_mdo stod dge rgyal gyi 'brog sder sku 'khrungs/_dpal ldan 'brug pa'i bstan sgor zhugs/_'brug chen rin po che sogs yongs 'dzin 'ga' zhig las bka' chos mang du gsan/_khyad par rtogs ldan rnal 'byor gyi dbang phyug lhun grub rab brtan las thabs lam thun mong ma yin pa'i gdams zab nos te nyams bzhes mthar phyin par mdzad/_gnyan rdzong rdo rje khyung phug tu lo grangs mang por dka' spyad kyi sgo nas yongs dge'i pad+ma badz+ra la thugs dam rtse gcig tu dril nas snying po dung phyur bdun ljags bzlas mdzad pas grub pa'i rtags du ma mngon du gyur/_khong mi bzhugs pa'i skabs su'ang shul gyi brag phug tu snying po'i sgra di ri ri grags pa phyis kyi bar kun gyis thos par snang /_zab gter la dbang ba'i lung bstan mang du byung zhing skabs shig dag pa'i snang bar bde chen rgyal mos brag de ka nas/_gter sgrom gyi bum par shog ser bcas phyung nas gsal bar bstan cing brda' dkrol gnang ba ltar thugs la nges pa'i thog bum pa slar sbas/_phyis dus la babs pa'i bskul byang byung ba'i tshe gtan la phabs pa gu ru drag mthing lha lnga'i chos skor zab khyad can bzhugs shing /_'di'i rtsa ba tsam bsam yas mchod rten nag po nas dngos gter bzhes pa yin 'dug_/gzhan yang dzam dkar lha lnga'i g.yang sgrub skor dgongs gter las phyungs shing lang gro lo tsA ba'i ring bsrel dang dam rdzas a rgya ma sogs gter drangs nas 'gro don rgya cher mdzad pa las/_gter chen mchog gyur gling pa dang /_mkhan chen zla bzang rin po che sogs kyis kyang bla mar bkur zhing /_gtso bo grub pa'i dbang phyug tshogs gnyis la gter chos sogs kyi bka' babs shing nyams bzhes mdzad/_kho bos kyang chos bka' rnams gter ston nyid las nos shing rgyud 'dzin gong 'phel du bzhugs so +
mdza' bo nang 'jug tsher mas mtha' mi 'bod:_sa steng g.yo ba'i bdud kyi sprul pa 'byung:_yum bu bla sgang sbas pa'i gter kha 'di:_mi bzhag 'don pa'i rtags de bstan nas 'byung:_o rgyan rog rje gling pa zhes bya 'byung:_zhes pa'i gter ston rog rje gling pa ni/_thang yig 'ga' zhig nas chos rje gling pa dang dbon rje gling pa zhes pa'ang 'byung bar ma zad rje rang nyid kyis kyang zhal gyis bzhes pa'i dwags po chos rje gling pa ni/_rgyal sras lha rje'i gter ston skye ba bcu gnyis pa ste/_rje zla 'od gzhon nu'i gcung lha rje snyi chung nas gdung rabs bar ma chad par byon pa'i rabs bco lnga pa yab rdo rje grags pa'i sras su dwags po klu mkhar gdong du 'khrungs/_mtshan yongs grags chos rje 'dzam gling rdo rje dang bde ba'i rdo rje zhes grags/_rje bzang po rdo rjes zhabs drung rin chen rdo rje'i skye bar bzhed kyang zhwa dmar ye shes snying pos ras chung phug sprul pa'i sku 'chi med dbang po'i skye bar ngos bzung zhing /_zla ba'i dbang po bstan pa'i gsal byed ces mtshan dang dgung lo drug par gdan sar phebs/_gnas brtan 'jam dbyangs grags pa las dge tshul dang dga' ldan khri chen blo bzang dar rgyas las bsnyen par rdzogs/_mtshan ngag gi dbang po blo bzang chos dbyings dpal bzang por gsol/_mdo sngags rgya bod kyi gzhung mang po thugs la btsud cing sbyangs pa sogs dge ba'i bshes gnyen chen por gyur/_rten gong ma rnams dbu ral can du bzhugs pas dge slong gi chas la ral pa yod pas dge slong ral pa can du grags pa ltar sku tshe'i stod la kun spyod gtsang zhing 'dul ba'i phyag len sogs kyang zhib par gnang /_phyis zab gter bzhes nas ring zhig song ba'i sku tshe'i mjug tu sgrub pa mo o rgyan bu khrid kyi skye ba de ma thag pa bde chen phrin las mtsho mo phyag rgyar bzhes pa la 'brug pa rin po che'i yang srid byon pa sogs ngo mtshar can byung yang yun ring ma bzhugs/_gang ltar yang dgung lo nyer lnga'i bar grub thob gtsang smyon chen po'i gdan sa yar lung ras chung phug tu bzhugs shing byang chub gling pa gong ma yon tan rgya mtsho dang /_dge bshes don ldan zhabs sogs las rang lugs kyi dbang lung man ngag phyag bzhes yongs su rdzogs pa dang mdo rgyud kyi chos bka' rig pa'i gnas sogs gsan bsam rgya cher mdzad pas mtshon thos pa'i pha rol tu son/_snga phyir gnas de nyid du thugs sbyong dang sgrub pa mdzad pas rtogs pa klong du gyur pa'i tshul bstan/_rgyal dbang ye shes rdo rje dngos su ma mjal yang byin rlabs 'pho ba'i stobs kyis phyag rgya chen po'i gnas lugs mngon sum du gzigs pa dang /_rig 'dzin stag sham rdo rje las nyid kyi zab gter ci rigs pa'i dbang dang yongs rdzogs kyi bka' gtad gsan nas rdzogs pa chen po'i rtogs pa klong du gyur pas 'di gnyis la rtsa ba'i bla mar mdzad/_bye brag tu zab mo gter gyi bka' babs tshul ni/_stag mo gter ston dbon gsas khyung thog tu grags pas lung bstan dang kha byang phul bar ma zad/_mon phyogs su phebs skabs rtags mtshan gsal bas bla ma sku bzhi'i sgrub thabs/_yum bu bla sgang dang srong btsan bang so sogs kyi kha byang /_'u shang rdo nas kyang gter gyi kha byang phyag tu son pa bzhin yum bu bla sgang dang srong btsan bang so dmar po nas zab gter ci rigs bzhes kyang gtan la 'bebs pa sogs thugs rtsol cher ma gnang zhing phal cher yang gter du rgyas btab/slar yang zab gter gyi 'gro don dus la babs par dgongs nas dgung lo nyer lnga par gdan sa sprul pa'i skur rtsis 'bul gnang /_rang nyid kun spong gi spyod pas dpal tsa ri tra sogs su phebs shing thugs dam nyams bzhes lhur blangs pa na/_yang bskyar kha byang lung bstan je cher gsal ba ltar zag med 'ja' tshon phug pa nas 'chi med rtsa gsum dril sgrub dang tshe chu ngo mtshar can sogs spyan drangs/_rim par kha rag mgo dgu'i dug mtsho nas yang phur gnyis/_spu bo bya rgod gshong nas bla sgrub zab lam thugs kyi nor bu/_rma kung lung gi mtsho nas bla ma rig 'dzin/_'dong chu lha khang nas thugs rje chen po sa snying dang dzaM dmar skor/_gzhan yang /_gro lod/_gtum po seng sgrog_/khros nag sogs gter du bzhes shing phal cher gtan la phab/_dag snang gi skor dang sgrub thabs pad+ma rA ga'i phreng ba sogs bka' 'bum bcas deng sang gi bar phal cher lung rgyun bzhugs pa kho bos kyang nos/_kong yul me tog slas steng du lo gsum gyis mtshon thugs dam bsnyen sgrub dang 'gro don phrin las kyang rgyas/_chos bdag zhal slob kyi gtso bo rgyal dbang byang chub rdo rje/_zhwa dmar dpal chen chos kyi don grub/_tre'o chos kyi dbang po/_'bri gung dkon mchog phrin las bzang po/_dwags po zhabs drung sprul pa'i sku lhun grub nges don dbang po/_'brug thams cad mkhyen pa dpag bsam dbang po sogs bla chen dang /_rtsub ri grub chen/_lho ba grub chen/_nang thugs kyi sras gcig pu rwa ston stobs ldan rdo rje sogs mang du byon cing /_rig 'dzin pad+ma phrin las dang smin gling rgyal sras pad+ma 'gyur med rgya mtsho sogs la'ang chos 'brel tsam byung bar snang /_mthar jun gar byung skabs sbas yul chen po pad+ma bkod par gnas sgo 'byed pa'i thugs bzhed kyis zhabs bskyod nas gnas mthil tsam du phebs/_ring min dgung grangs bzhi bcu rtsa bzhi'i dbo zla bar pad+ma 'od kyi zhing khams su gshegs/_sprul pa'i sku kong po dga' chags sde par 'khrungs pa'i 'jig rten dbang phyug sogs yongs grags dang /_sbas tshul ci rigs da lta'i bar du byung bar mngon no/_/rje 'di'i rnam thar rgyas pa rje nyid kyis 'char gzhi rgyas par bkod pa dang /_lam yig le'u tshan/_sgam po pa bzang po rdo rje'i 'das byung gi rnam thar sogs las zhib par gsal bas 'dir sa bon tsam bkod pa yin no/
D
gter ston sum tshogs ni/_rkyang po grags pa dbang phyug_/sum pa byang chub tshul khrims/_'bre shes rab bla ma gsum gyis yer pa se ba lung nas rta mgrin pad+ma dbang chen yang gsang khros pa'i chos skor rnams spyan drangs nas 'bru tshang gi gnyags ston lha 'bar la shog ser steng nas chos rgyun lan gcig tsam las spel ba ma byung bar gter rngur gyis rkyang po la mdze byung /_sum pa 'das/_'bre smyo bas shog ser rnams rta mgrin gyi grub thob zhu ston bya ba'i lag tu byung yang des zhu sa rtsad ma chod pas las 'phro gter brgyud kyi byin rlabs bka' ma nyams pa yongs grags la med par yun ring 'byams/_ring zhig na grub pa'i dbang phyug chen po 'dar phyar ru pa gtsang jo mo nags rgyal na bzhugs dus slob dpon chen po pad+ma 'byung gnas zhang tshes zla grags bya ba'i sngags pa zhig tu sprul nas dbang lung rnams rdzogs par gnang ste sngags kyi oM de hrIHru bsgyur la sgrubs shig gsungs/_de yang gter ston de dag gis gter thon kyang rngur gyis bar chad byung ba'ang khong rnams kyi gter skal ma yin la/_don gyi chos bdag grub chen 'di yin zhing /_de'i phyir slob dpon rin po ches dngos su chos gnang yang /_bstan rgyun la dgongs nas rta nag gi bla ma rgya la gter brgyud bzhugs pa'ang rtsad chod nas gsan par mdzad pas nye ring gnyis ka'i bdag por gyur pa nas bzung da lta'i bar dbang lung gdams ngag gi rgyun rgya cher 'phel ba kho bos kyang rdzogs par nos/_'dar 'phyar chen po 'dis rdo rje phur pa las kyang dngos grub brnyes/_mtshan ma rdzas kyi phur pa la brten nas mu stegs 'phrog byed dga' bo'i rdzu 'phrul rming med du bcom pa'i phur pa nyid da lta se ra byes pa grwa tshang gi nang rten gyi gtso bor bzhugs shing grags che/_drang srong chen pos dngos su phul ba'i rA hu la srung gso'i gdams pa bzhugs pa bdag gis kyang nos/_gong gi gnyag ston lha 'bar gyis kyang gter kha 'ga' zhig phyung bar grags kyang chos kyi rnam grangs mi gsal zhing rgyun byung tshul yang mi snang /_bon gter lung sde lnga bton par bshad cing gong gi gter ston sum tshogs kyis kyang 'bum dang tshad ma dang 'phrul gyi me long dgu skor sogs bon gter mang zhig bton pa'i dpe phal cher deng sang yod par snang ngo /
star sgo'i thang la dbus pa'i tshogs 'du byed:_has po ri rgyud me yar rdzong zhes 'byung:_kha rag phug tu sbas pa'i gter kha 'di:_mi bzhag 'don pa'i rtags de bstan nas 'byung:_o rgyan bde chen gling pa zhes bya 'byung:_zhes pa'i gter ston bde chen gling pa ni/_gru shul tshwa lung zhes pa ri bo khyung chen lding ba'i zhol du/_yab dpal 'byor rgyal mtshan dang /_yum pad+ma mtsho gnyis kyi sras su chu pho khyi'i lo la 'khrungs/_sku rus kher yin te rig 'dzin chen po rat+na gling pa dang yab tshan drung yin zer/_'brog mi dpal gyi ye shes kyi skye bar yongs su grags/_dgung lo bdun pa la ye shes kyi mkha' 'gro sde lnga mngon sum zhal gzigs/_sku rtsed mdzad pas rdo la zhabs rjes shin tu gsal ba zhig byung /_dgung lo bco lnga pa la o rgyan rin po che dang dngos su mjal nas/_dbang bskur byin gyis brlabs/_bka' bsgo bar mdzad pas/_gu ru'i lung bzhin/_chu rta sprel zla'i tshes bcu'i nyin khyung chen brag nas 'jam dpal gshin rje'i sgrub skor rdzas dang phur pa sogs spyan drangs shing /_gzhan yang gter gnas de dang brag ri mo can/_nam snying sgrub phug_/zil chen gsang phug_/gangs bar phug mo che/_mgon po gdong gi brag_/sman chu brag rna ring dmar gyi pha bong /_dom tshang bde mchog phug_/mda' tsha zer gyi phug_/mkho mthing rnam snang sku rgyab/_ban pa glang rong /_ban pa'i chu mig dmar po/_kha rag phug_/lho brag sna bo brag_/lho brag gtam shul brag srin mo sbar rjes can/_srin mo nag po'i brag_/e gzar po'i brag_/e rong khrab la kha/_'ja' tshon brag_/tshe lam dpal ri sogs kyi gter gnas rnams nas/_sku rten sku tshab/_gsung rten gter shog_/thugs rten phyag mtshan/_dam rdzas myong grol/_tshe ril sogs bsam gyis mi khyab pa'i gter bton cing /_'bum gyi rgya dpe tshang ma'ang bton par grags/_gter chos tshe khrid yid bzhin me long /_jo mo kha rag nas gdan drangs pa'i bka' brgyad dregs pa 'joms byed/_zhing skyong skor lnga sogs mtha' yas par spyan drangs tshul gter 'byung du bshad la/_sku tshe'i tshad kyang bdun cu don brgyad bar du bzhugs pa'i lung bstan yod de/_ji skad du/_bdun cu don brgyad tshe yang mthar phyin 'gyur:_de nas shel brag phyogs su mya ngan 'da':_phung po 'di nyid lha sar gter du sbos:_de nas kong po bu chu'i gter zhabs dril:_las lus ma yin dag pa ye shes lus:_zhes sogs gsungs kyang lung bstan dang rjes mthun gyi rten 'brel bsgrig phyogs ma mdzad pa'i rkyen gyis gter lung las gsungs pa dag phyogs gzhan du phul te dgung lo so gcig pa la gzhan dbang gis rkyen lam du gshegs/_slob brgyud kyang lung bstan ltar na chos bdag mang du yod kyang rten 'brel rang dbang du ma gyur pas thams cad ma 'dus kyang /_byang chub gling pa sna tshogs rang grol dang /_dkar po bstan 'dzin nor bu sogs dang mjal/_chos brgyud dang 'gro don sogs kyang cung zad las rgya cher ma 'phel/_de'i sku skye ni kong po bu chur 'khrungs pa bu slob rnams kyis rang gnas su spyan drangs/_rgyal dbang dbang phyug rdo rje la gtsug phud phul/_phreng po gter chen/_zhig gling /_'bri gung pa chos rgyal phun tshogs sogs mang po'i zhabs la gtugs nas gsang sngags gsar rnying bka' gter gyi dbang lung rgya cher gsan sbyang mdzad pas spyir bstan 'dzin gyi skyes bu chen por gyur kyang zab gter 'don pa'i rten 'brel phyag tu bzhes rgyu ma byung bas dgung lo so dgu pa la ngo mtshar ba'i ltas dang bcas te gshegs/_de'i sprul sku mon mel por 'khrungs te sku thog gsum byon par grags/_'di'i zab gter gyi gtso bo ni mkha' 'gro dgongs pa 'dus pa ste gzhung rgyud man ngag gi skor rnams sku phreng gsum gyis rim par bzhes pa la pusti drug yod par grags kyang phyis 'dir smin grol gyi rgyun ma byung bar mngon/_bar skabs tshe khrid yid bzhin me long gi rgyun yod par snang yang da lta ni dpe'ang mjal du mi snang /_gso dpyad bdud rtsi tshe bum tsam gyi lung rgyun thos shing phyis mchog gyur bde chen gling pa'i mkha' 'gro dgongs 'dus snying po thob pa'ang chu bo gcig 'dres su byar rung bar mngon/_lhag par rje bla ma mdo sngags gling par yang gter gyi shog ser dngos su byung ba ltar snying po tsam zhig gtan la phab pas phyogs 'dir yang skal bzang du gyur to/
ldan ma rtse mang ni/_khams ldan gyi yul du 'khrungs pas ldan mar grags te/_mtshan dngos rtse mang ngo /_/yi ge 'bri ba la mkhas pa'i phul du gyur pas lag rgyun ma nyams pa'i khrid srol da lta'ang yod par snang /_lo tsA yang mkhyen te lo tsA che gsum chung gsum du grags pa'i mchan bu'i lo tsA yin/_slob dpon chen po las gsang sngags kyi chos mang po thob ste/_rtogs pa shar bas chos thams cad la mi brjed pa'i gzungs thob/_bka' brgyad bder 'dus sogs gter yig phal cher 'bri ba po yang 'di yin par bshad de/_kho bos kyang bde 'dus kyi gter yig grub chen 'di'i phyag bris lho brag smra bo cog gi gzhis kar bzhugs pa dngos su mjal ba'i skal bzang thob bo +
sil ma la dkar 'jag ma'i mi chung skye:_smon la la kar shel gyi pha wang brdol:_g.ya' ma spa gong sbas pa'i gter kha 'di:_mi bzhag 'don pa'i rtags de bstan nas 'byung:_gter ston do ban/_mtshan rgya mtsho zhes bya 'byung:_zhes pa'i gter ston do ban rgya mtsho ni/_lha sras mchog grub rgyal po'i skye mtha' gter ston rkyang pa'i skye ba bcu gsum pa'i bzhi pa ste/_yar 'brog mtsho gling yon po dor ljags kyi rus las 'khrungs shing rten sngags ban du bzhugs pas do ban/_mtshan rgya mtsho 'od/_zur pak+shi shAka 'od kyi slob mar gsal/_yar 'brog smad mu tig spa ma gong nas bla sgrub dang rdzogs chen/_sbrags yangs rdzong nas drag sngags kyi skor sogs mang du spyan drangs na'ang /_deng sang dpe lung gnyis ka'i rgyun bzhugs pa ma mthong /_phyis 'dir rje bla ma'i yang gter gyi tshul du bla sgrub snying po'i sko+or tsam bzhugs/_'di'i dus rtags sil ma la khar 'ba' ra ba'i slob rgyud rje mon rtse bas sgrub sde btab cing phrin las byung ba dang /_lho brag smon la khar a ro'i lugs kyi sgrub sde zhig byung bar de la dgongs par snang /_rdo rje gling pa'i sku tshe'i stod tsam la byon par 'dug +
o rgyan chen po'i dus su nyid dang dbyer med par byin gyis brlabs pa o rgyan grub pa'i snying po'i rnam 'phrul rdor 'bum chos kyi grags pa ni/_yul mnga' ris su 'khrungs/_yab yum 'byor pa dang ldan pas gser gyi rdo rje gcod pa dang rgyas pa 'bum bzhengs pa'i dus su 'khrungs pas mtshan rdo rje 'bum du btags/_rab tu byung ba'i mtshan chos kyi grags pa/_gter lung las/_'od kor rma bya'i mdongs mtha' can:_zhes gsungs pa ni dpral bar thig le rma bya'i mdongs lta bu yod pas de ltar grags/_'dis byang mtha' 'dul pra dun rtse'i gtsug lag khang gi rta mgrin dregs pa zil gnon gyi thugs ka nas gso dpyad bdud rtsi bum chen gyi skor rtsa ba dang /_byams sprin rdo sku'i 'og nas kha skong zur bkol 'ga' zhig dang /_gur chung mgon po'i thugs ka nas bdud rtsi bum chung gi skor rnams spyan drangs pa'i dbang lung phyag bzhes kyi rgyun ma nyams pa deng sang bar bzhugs pas gangs can phan bde'i rtsa lag bla na med par grub bo +
stong khu yul du phag tshang khyu gcig 'byung:_sa btsan ri 'bos re la rdzong chu re:_la rtsub 'phrang rtsub bkag mang khyu yis 'tsho:_kong po bu chur sbas pa'i gter kha 'di:_mi bzhag 'don pa'i rtags de bstan nas 'byung:_o rgyan rdo rje gling pa zhes bya 'byung:_zhes pa'i bstan don sprul pa'i gter ston rgyal po gsum pa lo chen bai ro dngos byon rdo rje gling pa ni/_dbus kyi gra nang dben rtsa zhes par sngags pa rdo rje 'dzin pa'i rgyud yab khu ston bsod nams rgyal mtshan dang /_yum dkar mo rgyan gnyis kyi sras su me pho khyi lor 'khrungs/_mtshan o rgyan bzang por gsol/_dam pa'i rigs sad pa'i rtags dang ngo mtshar bsam gyis mi khyab/_dgung lo bdun par spang gshong lha ri khar kun mkhyen khrab pa shAkya'i mtshan can las dge tshul gsan/_de nyid dang gzhan yang bla ma rnams las mdo sngags gsar rnying gi gsan pa mthar phyin par mdzad/_dgung lo bcu gsum par o rgyan rin po che'i zhal lan bdun mjal/_gu ru chos dbang gi gter las kha byang byung ba ltar khra 'brug jo mo'i sku rgyab nas gter kha dang po rtsa gsum sgrub thabs dang /_sgrub phran/_kha byang yang byang /_drag sngags/_bcud len rnams la brgya rtsa brgyad re/_sgos lung dang bcas pa byon/_dgung lo bco lnga par bying mda' o dkar brag gi gter sgo phyes pa'i tshe/_sgrub phug shin tu yangs pa'i nang du gu ru rin po che dngos su byon nas dkyil 'khor bkod pa las dbang bskur/_shog ser re re'i dbu nas lung dang gter rdzas rnams gnang /_de'ang sku tshab/_bla dpe pusti bzhi/_shog dril brgya tham pa/_tshe chu bum pa bzhi/_dam rdzas kyi gwa'u sogs spyan drangs pa las/_chos sde rnam thar thang yig le'u brgya pa/_rdzogs chen pha rgyud lta ba klong yangs/_ma rgyud klong gsal nyi ma dang mkha' 'gro yang tig nyi zla kha sbyor/_bu rgyud snying thig skor bcu/_'dus pa skor bzhi/_zur pa brgyad rnams byon/_de nas rim par mu tig shel gyi spa ma gong nas/_nyams len khrid skor bcu sogs spyan drangs pa nas bzung /_bum thang byams pa lha khang gi tshe chu phug tu ye shes mtsho rgyal dngos su byon nas tshe chu/_yang le shod du bsgrubs pa'i chos sman/_chos rgyal dang mtsho rgyal nyid kyi bla g.yu/_nor bu bsam 'phel/_chos skor dang drag sngags mang po gnang ba'i bar gter gnas so so nas gter kha chen po bzhi bcu rtsa gsum/_phra mo dang nang gses gter gnas kyi dbye bas brgya dang brgyad bzhes/_mchims phu'i gter bzhes pa'i skabs o rgyan dang lan bcu gsum mjal/_chu bo rir sku'i sprul pa gnyis mdzad nas phyogs gnyis nas khrom gter blangs shing zhabs rjes khru gang ba bzhag_/zab lung me tshor gnyan gyi phug par thang lha dang gangs dkar sha med gnyis kyis sbyin bdag byas/_gangs can gyi lha 'dre che dgu rnams 'dus nas bka' brgyad kyi sgrub chen btsugs/_de thams cad la dbang bskur/_/dur khrod chen po brgyad du sprul pas byon nas rig 'dzin brgyad dang mjal te gding brgyad kyi gdams pa gsan/_gter kha rnams spyan drangs pa'i tshe gu ru rin po che dang mtsho rgyal bai ro sogs dngos su byon nas dbang dang gdams pa bstsal ba dang /_rdzu 'phrul gyi bkod pa ngo mtshar ba bstan pas thams cad the tshom gyi sgrog bkrol nas phyir mi ldog pa'i dad pa la bkod/_sku dang phyag zhabs kyi rjes kyang mang du bzhag_/zab lung /_mkhar chu/_gzho stod gter sgrom rnams su/_dbang /_rab gnas/_skong bshags/_sbyin sreg_/mnan pa bcas brgya rtsa brgyad res mtshon bod khams bde thabs kyi rim gro rlabs chen mdzad/_chos gter bla rdzogs thugs gsum gtso bor gyur pa'i zab cing rgya che la mtha' yas pa rnams dang /_phung po ri bo che nas rdo rje sems dpa'i sku/_lha sa'i ka ba bum pa can nas bcu gcig zhal dang tsan+dan gyi sgrol ma sogs sku rten ngo mtshar can/_skye bdun dang chos sman sogs dam rdzas/_yid bzhin nor bu sogs nor gter/_rdzogs chen gser thur dang ta pi hri tsa'i snyan brgyud che 'bring chung gsum sogs bon sde/_gzhan yang gso rig dang rtsis skor sogs rgya cher spyan drangs shing phrin las kyang rgyas/_sku'i sras gnubs chen rnam 'phrul chos dbyings pa sogs las deng sang bar du mon phyogs su gdung rgyud mang du yod par snang /_rgyal dbang bzhi pa rol pa'i rdo rje la'ang gshed skor dang dzaM lha rigs lnga'i skor rnams phul bar bshad/_gdan sa'i mthil gling mo khar mdzad cing /_gzhan yang lho brag_/mon spa gro gzad 'ug rnyed dgon sogs bzung nas 'gro don rgya cher bskyangs/_yongs su grags pa'i mtshan rdo rje gling pa/_pad+ma gling pa/_kun skyong gling pa/_g.yung drung gling pa/_'jam dpal chos kyi bshes gnyen tu grags pa de nyid kyis bstan 'gro'i don mthar phyin nas dgung lo drug cu pa la zhal chems lung bstan chen mo stsal te ngo mtshar ba'i ltas dang bcas brag long du gshegs pa'i tshul bstan/_pur lo gsum gyi bar du bzhugs nas skabs su gsung 'byon pa dang bsngo ba tshig bzhi re gnang nas 'gro don mdzad mthar gdung zhugs 'bul byas pas lha sku ring bsrel du ma byon/_zhabs g.yas thugs sras bkra shis 'byung gnas dang /_g.yon thogs med rgya gar ba gnyis kyi rten skal du pur khang nas me'i sgra dang bcas te byon pa las ring bsrel mang du 'phel ba phyis tshod bar du bzhugs par bshad/_sngar lho brag dang mon gyi phyogs su chos rgyun rgya cher dar na'ang deng sang rgyun shin tu dkon pa las/_rdzogs chen pha rgyud lta ba klong yangs/_ma rgyud klong gsal nyi ma/_gnyis med rgyud kyi gras hU~M skor snying thig_/'dus pa skor bzhi'i nang tshan bla ma dang yi dam bka' 'dus/_thugs rje chen po ngan song kun skyob/_rgyal ba rgya mtsho/_snyan brgyud gur drag rnams rje bla mar ring brgyud dang nye brgyud kyi tshul du bka' babs pa sogs 'bad pa chen pos btsal te legs par thob pas skal pa bzang por gyur to/_/sprul pa'i gter ston chen po 'di nyid 'byon pa'i dus rtags dang gter gnas sogs kyis bka' thang lung gsal de yin min dpyad gzhir mdzad kyang gter ston rgyal po lnga'i gsum pa gling chen bcu gnyis kyi nang tshan de ni 'di las gzhan par bsnyon du med do
g.yu sgra snying po'i rnam 'phrul gter ston rdo rje thogs med dam bstan 'dzin zla 'od rdo rje ni/_kong po brag gsum gyi nang tshan mtsho chu dar ma brag gi phyogs su dwags rgyud grub chen 'jam dbyangs zhes pa'i sras su 'khrungs/_sku na phra mo nas bsnyen sgrub kho na mdzad cing bzhugs pa la bla ma mkha' 'gros lung bstan pa ltar mtsho phu nor bu bkod pa'i gnas sgo phyes/_zab gter 'ga' zhig phyag tu son kyang rten 'brel dbang gis 'dabs gter du sbas/_phyis su sgam po sprul sku mjal nas rten 'brel sor chud de spu bo 'dong chu'i lha khang nas kha byang phyag tu son pa ltar/_pu lung btsan dmar srog gi spu gri'i brag nas tshe sgrub 'od kyi drwa ba'i skor rnams spyan drangs/_gzhan yang gter kha 'ga' zhig khrom gter du mdzad par grags/_pad+ma bkod kyi byang gling btsan phyugs zhes pa'i sar ri khrod btab nas bzhugs/_thugs dam mthar phyin te sku gshegs/_yum zla 'od dbang mo zhes 'ja' lus 'grub par nye ba'i rnal 'byor dbang mo des rgyun bzung bas deng sang yang tshe sgrub kyi skor bzhugs par 'dug_/kho bos kyang snying po tsam zhig rje bla ma'i bka' drin las nos so/ +
dus ni lo re lo res ngan du 'gro:_mkhan po byas nas grong du tshogs dbang bskur:_lkog tu bu smad khyi phag tsam pa 'byung:_sde 'khrug nang dme rgyab brten dug la re:_bu tshal gser khang sbas pa'i gter kha 'di:_mi bzhag 'don pa'i rtags de bstan nas 'byung:_gra sgom chos kyi rdo rje zhes bya 'byung:_zhes pa'i gter ston gra sgom chos rdor ni/_rgyal sras lha rje'i skye mtha' lnga pa khyung nag shAkya dar te 'dis kyang chos dang sman dang khyad par rtsis kyi skor sogs ci rigs spyan drangs pa'i gter ston no/_/de'i yang srid drug pa 'di nyid gra nang du 'khrungs/_rten sngags par bzhugs pas sgom pa dang mtshan dngos chos kyi rdo rje/_'dis bu tshal gser khang nas gnyan po stobs kyi lha gu ru drag po'i skor dang pe dkar las rgyud sgrub thabs ar gtad sogs 'jig rten mchod bstod kyi skor mang du spyan drangs na'ang deng sang dpe lung gi rgyun mi bzhugs/_gur drag kI la ya'i man ngag rim pa gsum pa rje bla mar yang gter gyi tshul du bka' babs par snang /_yang mdo khams sgom sde nang du snga mo zhig byung ba gra sgom chos kyi rdo rjer grags pas gter kha ci rigs bzhes/_bar skabs su phrin las kyang cung zad byung /_'on kyang da lta de'i gter chos sogs mi bzhugs zhes rig 'dzin mchog gyur gling pas gsungs pa thos +