Property:GyatsaBioWylie
This is a property of type Text.
L
bod 'dir rgyal po'i ming btags brgya rtsa brgyad:_gangs dang seng ge las kyis 'brel ba yis:_'jig rten pa la bde ba skad cig med:_byar gyi brag la sbas pa'i gter kha 'di:_mi bzhag 'don pa'i rtags de bstan nas 'byung:_o rgyan bsam gtan gling pa zhes bya 'byung:_zhes pa'i gter ston bsam gtan bde chen gling pa ni/_'brog mi dpal gyi ye shes dang g.yu sgra snying po zung du 'jug pa'i rnam 'phrul long po 'jim gar steng du 'khrungs/_rten sngags 'chang rdo rje 'dzin pa'i tshul du bzhugs/_kong po nyang kha bde chen gling du grags pa'ang dang po 'dis btab par gsal/_byang smad jo bo brag dkar nas rtsa gsum zab mo kun 'dus kyi skor dang /_gzhan yang bka' brgyad lugs srol chen po dgu'i ya gyal du bgrangs pa'i dregs pa kun 'dul gyi skor/_dpal mgon zhal bzhi pa/_bdud mgon zhing skyong yab yum gyi skor sogs spyan drangs na'ang bar skabs nas chos brgyud rgya cher byung ba med par snang mod/_phyis 'dir rje bla mar bka' brgyad dregs 'dul gyi rgyud lung man ngag yang gter du babs pa kho bos kyang skal bzang du thob bo/_/dus tshod snga phyi gsal bar ma nges kyang lo rgyus gzhan gyi babs la brtags na sangs rgyas gling pa'i sku tshe'i smad tsam la byung bar mngon/_'di nyid phyis su stag sham rdo rje yin par chos rje gling pa sogs kyis bzhed pas don la gnas mod/_'dir dkyus su sngar yongs grags ltar bkod cing gter chen stag sham pa'i rnam thar sa bon tsam 'og tu 'byung ba las shes par bya'o +
lang gro lo tsA ba dkon mchog 'byung gnas kyi rnam 'phrul gter ston rig 'dzin chen po klong gsal snying po ni/_rig 'dzin bdud 'dul rdo rje sogs kyi gter lung las gsal ba ltar/_kaM po gnas dang nye ba'i yul phyogs dbra par grags pa'i bye brag byes pa zhes pa'i sa'i char yab sngags 'chang kun dga' don grub dang yum sgrol ma dkar mos byin gyis brlabs pa'i dkon mchog sgron ma zhes pa'i sras su shing mo glang gi lo la sku bltams/_grub dbang bstan pa rgya mtshor gur drag gi dbang gsan nas mtshan dbang drag rgya mtshor btags/_dgung lo bdun tsam nas yi ge bslab pa brda' bstan pa tsam gyis mkhyen/_chung ngu nas nges 'byung sogs dam pa'i chos kyi bag chags gsal bar sad pas dgung lo nyer gnyis dus kaHthog tu chos bros la byon/_lam bar nas sga rje khams gong dgon du rje chos skyong rgya mtsho las dbang dang gdams khrid mang du gsan/_slar kaHthog tu phebs/_mnyam med dkon mchog rgyal mtshan las rdzogs chen dgongs pa zang thal sogs nyams khrid du ma gsan nas gnas lugs la rang dbang 'byor bar mdzad/_slar yab yul phyogs su phebs te chos lung ri khrod sogs dben pa'i gnas kho nar rje btsun bzhad pa rdo rje'i rnam thar la 'gran bzod pa'i dka' thub kyis sgrub pa'i dam bca' brtan por bzung bas rtsa gsum rgya mtsho'i zhal gzigs/_ye shes dang las las grub pa'i chos srung rnams bran du 'khol zhing lha srin gzhi bdag rnams kyis srog gi snying po phul ba sogs grub pa'i go 'phang mthon por gshegs/_khyad par zab mo gter gyi bka' babs tshul ni/_dgung lo nyer brgyad tsam gyi dus nas gter gyi lung bstan mang du byung yang ji mi snyam du bzhag pa na/_slar yang gter chen bdud 'dul rdo rje'i drung du song zhig pa'i lung bstan byung ba ltar spo bor rig 'dzin chen po de nyid kyi drung du byon pas thugs kyis shin tu btags shing /_zab gter gsar bzhes kyis mtshon dbang khrid gdams pa mang du bstsal/_dngos grub gter gyi bka' babs yod tshul lung bstan gsal bar bstsal nas/_mi ring bar rig 'dzin de nyid kyis bkas bskul te rang yul du phyir phebs/_mkha' klong ri khrod ces par bsnyen sgrub la bzhugs pa'i skabs/_dgung grangs so gnyis su son pa sa pho spre'u lor rnal 'byor ba sku mdog dmar smug rus pa'i rgyan can zhig gis kha byang dngos su bstsal/_de nyid gu ru rin po che'i rnam 'phrul du nges shes rnyed de lo gnyis kyi khongs su gter sgrub tshags su tshud par mdzad nas gter kha thams cad kyi thog ma ni/_sa khyi hor zla dang po'i tshes bcu la khe mi 'gyur rdo rje'i brag nas sku gsum rdo rje snying po dang /_rtsa gsum rdo rje snying po'i skor rnams gsang stabs su bzhes te nyams bzhes mthar phyin par mdzad/_rim par gter kha gnyis pa li thang gnam chen brag dkar nas gur drag ye shes rab 'bar/_gsum pa sgrol ma brag gi mgul nas srong btsan sgam po'i thugs rje chen po snyan brgyud gtsug rgyan nor bu/_bzhi pa ra ri bar gyi brag nas rdzogs pa chen po yang snying kun zab/_lnga pa khe nang gter gnas gsum nas bi ma la'i chos gter man ngag zab pa skor gsum/_drug pa rol pa bde chen khang nas bka' brgyad bde gshegs yongs 'dus/_bdun pa sngo rgya gnas nas gnam lcags kyi rdo rje sogs dang /_brgyad pa sna brag dkar rdo rje'i yang rdzong nas tshe sgrub yang gsang bla med/_dgu pa shing sgo gangs ra nas thugs rje chen po yang gsang bla med/_bcu pa gnas de'i g.yu mtsho nas mkha' 'gro yang gsang bla med/_bcu gcig pa de'i bon gnas nas bon gter/_bcu gnyis pa rdzogs pa chen po sgyu 'phrul gsang ba yang khol/_bcu gsum pa pha waM bon mo nas phyi nang gsang ba'i lung bstan dang bstan srung drag sngags skor/_bcu bzhi pa ngo thi g.yung drung nas zab gter gcig_/bco lnga pa kaHthog dam phug dang nye ba nas dam pa bde gshegs kyis sbas pa'i sgyu 'phrul glegs bam zhig yang gter du spyan drangs pa rnams las/_ngo thi'i gter kha da lta mi gsal bas mi bgrang /_bi ma la'i zab pa skor gsum gter gnas tha dad pas so sor bgrangs pa'i bcu drug tu grags shing /_de rnams dang lhan cig sku'i rigs dang thugs rten phyag mtshan khyad 'phags/_dam rdzas myang grol shin tu mang po spyan drangs/_phal cher chos bka' yongs rdzogs gtan la phabs/_so so'i gter sgrub rtags thon par mdzad/_'ga' zhig yang gter du sbas/_thugs bskyed smon lam rgya che zhing bskyed rdzogs nyams bzhes mthar phyin pa'i dbang gis rje 'di nyid gter phran tsam gyi dbang skal la gter chen gyi dngos grub brnyes shing 'gro don shin tu rlabs che bar gyur/_mtshan gyi rnam grangs kyang o rgyan mdo sngags gling pa/_hU~M nag nam mkha'i rdo rje sogs mang du grags/_brag g.yang gzar po dang mtsho chen gyi dbus su chibs dang bcas te phebs shing chibs pas kyang zhabs rjes lan mang du bzhag pa sogs rdzu 'phrul gyi bkod pa bsam las 'das/snyigs dus kyi 'dre rgod ma rungs pa mang po dngos su srog snying 'phrog nas dam la btags pa dang bskrad cing mnan pa dang /_ar la gtad pa sogs kyis yul ljongs mang po'i 'gro ba rnams la mi 'jigs pa'i sbyin pa bstsal/_sog po'i rgyal po'i mkha' 'gro'ang rdzu 'phrul gyis dad de dgon gnas dang bsnyen bkur phul/_sa skyong sde dge sogs mi chen mang pos bla mar bkur/_mdo smad kyi ljongs phal cher zhabs kyis bcags shing gnas sgo mang po phyes/_sku tshe'i smad la kaHthog rdo rje'i gdan du bzhugs nas chos kyi phrin las bskyangs te bstan pa rmang nas gsos/_gdan sa chen po 'di nyid gtsor gyur pa'i gnas chen rnams su rten bzhengs kyang rgya chen po gnang ba sogs mdzad pa thams cad mthar phyin nas dgung lo drug cu re brgyad pa chu sprel spre'u zla ba'i nyer gsum la ngo mtshar ba'i rtags mtshan du ma dang bcas mkha' spyod pad+ma 'od du gshegs shing sku gdung ring bsrel gyi phung por gyur pas kyang thams cad ngo mtshar gyi gnas la bkod do/_/rgyud 'dzin gtso bo bsod nams lde'u btsan sogs rgyal sras sku mched rnams dang /_dbon bkra shis 'od zer/_kun bzang khyab bdal lhun grub/_ta bla pad+ma nor bu sogs bzang la grangs mang ba byon cing mdo smad kyi phyogs phal cher chos rgyun gyis khyab/_gter chos rnams kyi dbang lung gi rgyun dang rdo rje snying po'i khrid srol bcas dar rgyas su bzhugs shing chos skor gtso bor gyur pa rnams bdag gis kyang thob bo
M
rma rin chen mchog ni/_'khrungs yul dbu ru 'phan yul gyi rma gtso zhes bya bar 'khrungs/_blo rno rab mchog rma ban rin chen mchog_/ces bod yul rab kyi mi dgu'i gras yin/_lha btsan po khri srong lde'u btsan gyi dus/_rab byung gi snga ba sad mi mi bdun gyi nang tshan te/_mkhan rin po che bo d+hi satwa las rab tu byung /_lta ba klu sgrub kyi dgongs pa bzhin rtogs pas ha shang sun phyung bar yang mdzad/_mdo sngags kyi chos rgya mtsho lta bu bsgyur ba'i lo tsA yin/_slob dpon rin po che'i drung du dbang dang gdams pa zhus pas dngos grub brnyes te sra mkhregs kyi rdo yang zan ltar gcod nas gsol ba'i rdzu 'phrul bstan te rig pa 'dzin pa'i sa la bzhugs/_'di nyid sgyu 'phrul bshad sgrub kyi bka' babs chen por yongs su grags shing /_rgyal po'i chad pa'i tshul gyis khams su pheb/_gtsug ru rin chen gzhon nu rjes su bzung /_slar dbus su 'phel ba las sgyu 'phrul khams lugs su grags pa byung /_gter chen klong gsal snying po'ang 'di nyid kyi sprul pa'i bye brag tu gsungs pa dang /_bi ma las gnang ba'i rgyud sde bzhi'i zab gter kyang bzhes par snang ngo +
dbyings phyug man+d+ha ra ba ni/_yab za hor rgyal po gtsug lag 'dzin dang /_yum btsun mo ha'u ki gnyis kyi sras mor pho brang rat+na pu rir ngo mtshar ba'i ltas du ma dang bcas te 'khrungs pa'i snyan grags la brten/_rgya dkar nag gi rgyal po mang pos btsun mor thob sha byas na'ang nges 'byung gi thugs 'dun bzlog tu med pas chos sgor zhugs/_bram ze skye bdun gyi pur rnyed pa yab la phul bas yid bzhin nor bu lta bu'i gces spras su bzung /_'di skabs nas slob dpon chen pos gdul byar gzigs nas rjes su bzung ba la brten/_rigs bslad par dogs te slob dpon chen po rgyal pos gson sreg mdzad pa na/_me phung mtsho ru bsgyur pa'i rdzu 'phrul gyis rgyal blon 'khor bcas g.yo ba med pa'i dad pa la bkod/_rgyal pos kyang rgyal srid lha lcam bcas ltos med du phul nas zab chos zhus par man+d+ha ra ba dang rgyal blon nyer gcig 'khor dang bcas pa la bka' 'dus chos kyi rgya mtsho'i rgyud lung man ngag gi chos kyi char chen po phab/_rgyal blon thams cad rig 'dzin gyi sa la bkod/_lha lcam nyid phyag rgyar bzhes te mA ra ti ka ste 'chi ba mthar byed kyi brag phug tu mgon po tshe dpag med pa'i bskyed rdzogs la brten sgrub pa mdzad pas zhal mngon sum du gzigs te dbang bskur ba las yab yum gnyis kas lam mchog yongs su rdzogs pa'i tshe dbang rig 'dzin zung 'jug rdo rje'i sku brnyes pa'i tshul bstan par mdzad/_de lta bu'i tshul gyis 'phags pa'i yul du dngos dang brgyud nas 'gro ba'i don rlabs chen mdzad cing bod yul du khra 'brug gi chos 'khor chen po'i skabs rdzu 'phrul gyis gshegs te gu ru'i brda' bstod dang zhus len gnang ba sogs pad+ma bka' thang du mang tsam gsal/_rgyas par o rgyan gling pa'i bka' 'dus su rnam thar rkang tshugs pa'ang yod par snang /_phyis kyi lo rgyus 'ga' rer mnga' bdag mar pa'i skabs mi rus kyi rgyan can/_gnyan lo'i skabs ri sul gyi rnal 'byor ma/_ras chung skabs grub pa'i rgyal mo/_gzhan yang mai tri pa'i yum chu shing gi snyem can dang /_mkha' 'gro ni gu ma sogs kyang ye shes kyi mkha' 'gro 'di nyid kyi mtshan dang sku'i rnam 'gyur gzhan du bstan pa tsam du bzhed mod/_thugs rje'i sprul pa dang byin gyis brlabs par ni gdon mi za zhing sku dngos ni 'ja' lus rdo rje'i sku grub pas da lta'ang bzhugs par nges so
mkhar chen dpal gyi dbang phyug gi rnam 'phrul gter ston ma ti rat+na ni/_mdo smad rta shel gnyis kyi mtshams shig tu sku 'khrungs par grags/_shel khog ba thang shing gi gnas sin+d+hU ra'i chu nas bdud 'dul drag mo'i chos skor dang gzhan yang bla sgrub kyi skor sogs spyan drangs/_deng sang yang dgon gnas dang chos brgyud dar ba yod/_gter ston 'di sku tshe snga ma'i rten 'brel zhig gis phyag rdzas bkres po las med par/_gu ru rin po cher gsol ba btab pas/_shar bzhag ra dkar mor gser drel rgyab gcig gter 'don rgyu yod pa'i lung bstan byung /_gter 'don du byon pas la cha'i dre'u chung ngu zhig gi rgyab g.yas g.yon du gser sran 'bru phyed pa tsam re yod pa zhig byung/_de nyid g.yang rten du bzung nas gter sgrub mdzad na gser drel rgyab gcig gi tshod kyi longs spyod dang mnyam par 'byung rgyu la/_gter ston thugs yid chad de log lta cung zad skyes pas rten 'brel 'phyugs te longs spyod ma byung bar sku gshegs zer ba'i ngag sgros snang /_rnam thar dang lo rgyus zhib par ma mjal/_bdud 'dul drag mo'i chos skor ni mdo smad phyogs su dar rgyas che zhing /_'di dang bla ma kun 'dus yid bzhin nor bu'i dbang lung bdag gis kyang nos pa'o +
dbus pa'i 'dun ma gcig 'dril sa hor skrag:_sdig spyod bdud sprul bstan pa rgyas yun ring:_'brin thang ko ro brag gi gter kha 'di:_mi bzhag 'don pa'i rtags de bstan nas 'byung:_gter ston rin chen gling pa zhes bya 'byung:_zhes pa'i gter ston me ban rin chen gling pa ni/_rgya gar mkhas pa shes rab 'byung gnas dang lo chen bai ro zung du 'jug pa'i rnam 'phrul/_lo ro dkar po'i tshe khro khar yab rdo rje rgod rdor 'bum dang yum bal mo g.yang 'bum gyi sras su glang gi lor 'khrungs/_byis pa'i dus sku rtsed mdzad pas pha wang la sku rjes gsal bar byung /_chos sgor zhugs pas mtshan rin chen rgyal po dpal bzang por btags/_rting pa lo tsA ba'i gdan sa dmyal smad bai ro'i chos grwar mtshan nyid phyogs la gsan pa mthar phyin mdzad/_lo ngo drug ring dgon par bla ma zhig las ras chung pa'i gdams pa gsan nas sgrub pa mdzad pas rtags snang dpag med shar/_de nas lha sar gnas bskor byon pa'i nub gcig mnal lam du mi dkar po zhig gis nangs par don grub pa yod zer ba'i sang zhog der/_la stod ding ri nas yin zer ba'i rnal 'byor pa 'theng po byang sems kun dga' zer ba dang mjal/_des dri ba rgyas par byas mthar gter gyi kha byang phyag tu gtad pa ltar/_'brin thang ko ro brag gi sgrub phug nas bse sgrom smug po gdan drangs pa'i nang du re'u mig lnga yod pa'i shar nas khyad par lnga ldan/_lho nas sgrub thabs nor bu skor lnga/_nub nas rten 'brel nor bu skor lnga/_byang nas drag sngags nor bu skor lnga/_dbus nas kha byang lung bstan skor lnga bcas chos dang dam rdzas kyi gter chen po dang /_gnas de'i brag chos 'byung 'dra ba nas 'jam dpal nA ga rak+sha'i skor spyan drangs/_sgrub pa rtse gcig mdzad pas nyams rtogs 'phel zhing dag pa'i snang ba dpag med shar/_khyad par zangs mdog dpal rir byon nas o rgyan chen pos rjes su bzung ba'i tshul ngo mtshar ba yod/_de nas rim par rgya gar pha wang nag po nas rdzogs chen chig chod kun grol/_zhi khro bde chen kun rdzogs/_sha 'ug ltag sgo'i rdo rje rtse lnga 'dra ba'i brag nas bka' rgya ma rnam gsum zhes sgrub thabs bka' rgya ma rtsa gsum gyi sgrub thabs yi ge lag len dang bcas pa/_rdzogs rim bka' rgya ma rim gcig car gnyis med kyi khrid yig zhal gdams dang bcas pa/_lung bstan bka' rgya ma spyi bye brag khyad par gyi lung bstan dang bcas pa spyan drangs shing /_phyi ma phyi ma'i gter tshab tu snga ma snga ma'i shog ser rnams bcug dgos pa lung gsal ltar mdzad/_gzhan yang tsa ri dang kong po sogs su byon nas zab gter bzhes pa/_sgrub pa mdzad pa/_pad+ma las 'brel rtsal gyi zab chos kyi bdag po gnang ba/_gzhan don phrin las skyong ba sogs rgya cher gnang zhing /_dgung lo brgyad cu'i bar du bzhugs pa sogs sku tshe phrin las mthar phyin/_de'i rnam 'phrul rim par sprul sku gzhon nu lhun grub sngon gyi dbon rgyud du 'khrungs shing zab gter kyang bzhes mod/_gzhon nu nas sku gshegs/_de'i sprul sku rgyal mtshan dpal bzang /_de'i sprul sku chos dbang lhun grub kyi bar gtso bor rnying ma mdzad/_de'i sprul sku skyes chen gtsug lag phreng ba nas bzung /_da lta mchog gi sprul pa'i sku dgu pa gtsug lag nyi ma'i bar sgrub brgyud karma kam tshang gi bstan 'dzin 'gran zla dang bral bar gyur to/_/'di'i zab gter skor sngar 'gro don rgya cher byung bar gsal na'ang da lta ni nA ga rak+sha'i skor gyi dbang lung lag len bcas bzhugs pa dang /_tshe sgrub 'od kyi bum pa dang ras chen dpal 'byor bzang po'i mda' 'phel ma gnyis tshig don zhu dag pher ba ma zad ras chen pas sprul sku rgyal mtshan dpal bzang la rin chen gling pa'i gter kha rnams gsan pas brgyud pa'i chu bo gnyis 'dres su gyur pa dngos su thob nas ring zhig 'das pa na/_rdzogs chen gcig chod kun grol gyi lung bstan las shin tu gsal ba ltar rje bla ma mdo sngags gling pa'i phyag tu dpe rgyun phebs/_gter ston chen pos smin grol bstsal zhing sgrub thabs skor lnga'i bla sgrub dang thugs rje chen po'ang yang gter gyi tshul du gtan la phab ste bdag cag rnams la bka' drin chen pos khyab par mdzad pa yin no
lo chen bai ro dang shud bu dpal gyi seng ge zung du 'jug pa'i rnam rol 'khrul zhig dbang drag rgya mtsho'i yang srid de ma thag pa rig 'dzin mi 'gyur rdo rje ni/_lho rgyud ngom gyi yul du chos rgyal gyi gdung rgyud las sku 'khrungs/_gsung brda' 'phrod tsam nas sngon gnas kyi tshul gsal bar gsungs pa dang /_mkhas grub karma chags med kyi spyan ltas dang bstun/_dgung lo lnga bzhes pa'i dus dpal ri rtser spyan drangs/_ljags klog sogs sbyangs/_btsog grib kyis gos pa la chags med rin po ches sku khrus yang yang mdzad pas sngon gyi gnas gsal bar dran zhing thog mar 'od dpag med dang o rgyan chen po'i zhal gzigs/_sngon gyi skye ba nyis brgya tsam tha ler dran cing gzhan sems mkhyen pa'i mngon shes shar/_dgung lo bcu gnyis pa nas rtsa gsum lhag pa'i lha rab 'byams rnams rim par zhal bstan cing gdams ngag bstsal pa rnams chags med zhabs kyis yi ger bkod pa la gnam chos zhes pa'i mtshan gsol ba pod chung bcu gnyis byon/_dgung lo bcu drug pa nas zab mo dgongs pa'i gter thugs las brdol te yi ger bkod pa pusti gnyis bzhugs/_de dag 'bebs rim bzhin chags med rin po ches nyams bzhes rtags thon par mdzad cing chos bka' so sor nyer mkho'i chog bsgrig dang khrid yig 'dus gsal gyi yig cha mang du bkod/_'di dag gi smin grol las tshogs dang bcas pa la byin rlabs kyi babs gzhan las khyad par du che zhing tha na mdos phran tsam gyis kyang phan thogs shin tu che ba mngon sum gyis grub/_bar skabs su thugs dam bcad rgya'ang lo gsum mdzad cing de'i skabs ya mtshan pa'i ltas yul mi kun gyi mthun snang du grub pa byung /_bza' btung dang ka ca cung dkon par byung ba'i tshe rten 'brel cung zad mdzad pas phongs med du 'byung ba lan mang du mdzad/_chags med nyid kyis mtshams sbyar nas rig 'dzin bdud 'dul rdo rje dang mjal 'dzom thog phan tshun chos 'brel gsan bzhes dang bdud 'dul bas bkur bzos chen po mdzad cing phan tshun thugs yid gcig 'dres su gyur/_nang chen du phebs nas rdza stod skyo brag_/mkha' 'gro 'bum rdzong /_na bun rdzong sogs gnas chen dgu tsam gyi gnas zhal gsar 'byed mdzad/_dgung lo bcu dgu par kaHthog phyogs nas gdan 'dren dang dus babs la brten chibs bskyod nas sa skyong sde dge'i rgyal khab dang dpal kaHthog gi gdan sar phebs/_rim par 'bri rgyud sa ngan dang smar khams sogs su zhabs kyis bcags/_chos kyi 'khor lo mtha' yas pa bskor nas mthong thos dran reg thams cad 'brel tshad don ldan gyi sa la bkod/_rmugs sang gi gnas su gdan phabs ste rgyud 'dzin gyi gtso bo dpal yul rig 'dzin kun bzang shes rab sogs 'dus pa snga phyi stong phrag gnyis re tsam la rang gter gnam chos tshang ma'i dbang lung nyams khrid lan gnyis su mdzad pas mtshon/_bstan 'gro'i don rlabs po che mthar phyin nas dgung lo nyer bzhi pa la/_zhing khams me tog bkod par rgyal ba me tog mya ngan las 'das pa'i rgyal tshab tu 'gro'o gsungs nas nag pa zla ba'i tshes bcu drug la gzugs sku'i bkod pa bsdus shing sprul pa'i rnam rol nyi shu rtsa lnga 'byung bar gsungs/_rje 'dis sa gter brgya rtsa 'don pa'i lung bstan yod kyang rten 'brel gyi gnad 'ga' zhig gis phyag tu ma son pas phyis stag sham rdo rje dang yongs dge mi 'gyur rdo rje rnams la thugs rgyud ye shes chen pos byin gyis brlabs par yang bshad/_rgyud 'dzin gnas mdo dang dpal yul gyi chos rgyun rnams las mdo smad phal cher chos 'di'i phrin las kyis khyab cing kho bos kyang tshang bar nos pa yin no/_/rig 'dzin de nyid kyi rnam 'phrul de ma thag par lung gis zin pa rmog grub nam mkha' chos dbang ste/_rje 'di grub pa'i 'khor los sgyur ba chen por yongs su grags shing /_sa gter chos dang rten dang nor gter mang po gdan drangs na'ang rten 'brel gyi babs shig las chos gter gtan la 'bebs pa sogs ma byung /_dgongs gter mkha' 'gro bka' brgyad du grags pa'i las byang nyung ngu zhig bzhugs pa don du bde 'dus kyi phrin las lam khyer bsdus pa lta bur snang /_rten ngo mtshar ba ci rigs da lta'ang mjal du yod cing /_rdza rgyud kyi gnas a dos nas gser bum pa gang bzhes te kaHthog sku 'bum ring mo'i zhig gso'i cha rkyen mdzad pa mngon gyur tshad mas grub/_de nyid kyi sprul pa'i sku 'jigs bral chos dbyings rdo rje nas bzung rim par byon pas snga 'gyur gyi bstan pa dang 'gro ba'i don mtha' yas pa mdzad pa yongs su grags pa nyid do
chos log khrims ral dam nyams lung pa gang:_lha mi'i gnas su gtam ngan grags pas khyab:_sha 'ug stag sgor sbas pa'i gter kha 'di:_mi bzhag 'don pa'i rtags de bstan nas 'byung:_o rgyan gter bdag gling pa zhes bya 'byung:_zhes pa'i gter ston gter bdag gling pa'am/_pad+ma gar dbang 'gyur med rdo rje ni/_lo chen bai ro tsa na'i gsung gi rnam par 'phrul pa/_dbus g.yo ru grwa nang dar rgyas chos sdings su mthing ma myos kyi rigs las yab gnubs chen sangs rgyas ye shes kyi rnam 'phrul snga 'gyur bstan pa'i nyi ma chen po rig 'dzin phrin las lhun grub dang /_yum shel dkar rdo rje 'tsho'i skye ba lha 'dzin dbyangs can sgrol ma'i sras su shing pho khyi'i lor mtshan dpe'i pad+mo bzhad/_chung ngu nas dam pa'i rigs sad pa'i ngo mtshar bsam gyis mi khyab/_lnga pa chen por gtsug phud phul ba'i mtshan ngag dbang pad+ma bstan 'dzin zhes pa gsol/_phyi mthar gzigs pa'i rten 'brel dge ba'i dbugs dbyung lhag par bstsal/_yab rje dam pa las sdom pa gsum gyi bka' drin nos/_nyid la mnga' ba'i zab chos phal cher bum pa gang byor bstsal/_gzhan gsung sprul tshul khrims rdo rje/_rgyal dbang lnga pa rin po che gtsos gsar rnying gi yongs 'dzin sum cu lhag pa las chos bka' gsan bzhes mtha' yas pa gsan yig glegs bam gnyis su 'byung ba ltar dang /_bsam yas mchims phu dang rang gi gdan sas mtshon sgrub gnas rnams su thugs dam nyams bzhes mdzad pas dbang bzhi'i rtogs pa gong du 'phel ba'i tshul bstan nas grub pa'i go 'phang mthon por gshegs/_mtha' yas pa'i chos kyi 'khor lo bskor ba dang gangs ri'i khrod kyi pad+ma 'od 'og min o rgyan smin grol gling rten dang brten par bcas pa gsar du bzhengs pa la brten nas snga 'gyur bshad sgrub kyi chu 'go gcig pur gyur/_bye brag zab gter gyi bka' babs tshul ni/_dgung lo bco brgyad par gter kha thams cad kyi thog ma brag dmar g.ya' ma lung nas bla ma rig 'dzin thugs tig gi chos dang dam rdzas gegs med par phyag tu son pa nas bzung rim par ngam shod bying mda'i o dkar brag nas slob dpon rnam gsum gyi snying thig rdzogs chen a ti zab don/_rdor sems thugs kyi sgrub pa/_gu ru drag dmar skor dang gsum/_yar lung shel brag gi byang 'dabs brag rgyal mtshan 'dra bar mkha' lding rgyal po'i brtul zhugs kyis gshegs te 'jam dpal gshin rje dregs pa 'joms byed kyi skor/_khyad par mon sha 'ug stag sgo bde chen ye shes kyi 'khor lo nas zab lam thugs rje chen po bde gshegs kun 'dus kyi chos dang dam rdzas rten gyi gter kha khrom gter du spyan drangs/_de rnams kyi gter sgrub tshul bzhin mdzad pas o rgyan yab yum gyis byin gyis brlabs shing rjes su bzung ba sogs dag pa'i gzigs snang bsam gyis mi khyab pa byung bas bka' rgya grol ba dang bstun smin grol 'chad spel 'byams klas pa dang chog bsgrig mang du gnang nas zab gter phrin las lhag par spel bas/_chos bdag slob ma'i tshogs kyang /_rgyal dbang lnga pa rin po che/_rig 'dzin pad+ma phrin las/_sa skya khri chen kun dga' bkra shis dang rtse gdong zhabs drung khu dbon sogs gdan sa gong 'og gi skyes chen de dag_/kaM tshang gi bstan 'dzin chen po rgyal tshab dang tre ho mchog sprul/_'bri gung dkon mchog phrin las bzang po/_stag lung pa bstan 'dzin srid zhi rnam rgyal/_'brug pa thams cad mkhyen pa/_sgam po mchog sprul dang gdung rgyud/_chab mdo rgyal ba 'phags pa lha dang /_ngag dbang mchog gi sprul sku sogs gangs can na yongs su grags pa'i bla chen phal mo che dang /_khams phyogs nas kyang mdo khams pa ngag dbang kun dga' bstan 'dzin/_tA bla gong 'og_/kaHthog rgyal sras/_rdzogs chen gnyis pas mtshon rnying phyogs kyi bstan 'dzin phal mo ches zhabs la ma btud pa med/_lhag par nyid kyi gcen rgyal sras bstan pa'i nyi mas kyang chos 'brel sne zin tsam gsan kyang sku tshe ring por ma bzhugs/_nang thugs kyi sras gcig pu g.yu sgra'i rnam 'phrul gcung lo chen d+harma shrI/_sku'i sras pad+ma 'gyur med rgya mtsho/_yid bzhin legs grub/_rin chen rnam rgyal mched sogs phun sum tshogs pa'i 'dus pa chen pos bshad sgrub phrin las rgya cher spel ba las da lta'i bar du snga 'gyur bka' gter khungs btsun gyi rgyun thams cad phyogs 'di nas ma brgyud pa med pa lta bur snang /_de lta bu'i gsang ba bsam gyis mi khyab pa'i mdzad pa re zhig mthar phyin nas dgung lo re dgu pa shing rta hor zla gnyis pa'i tshes gnyis kyi nyi dros la ngo mtshar ba'i ltas dang rdzu 'phrul chen po mngon par 'du mdzad nas sa spyod pad+ma 'od kyi zhing khams chen por gshegs pa'i tshul bstan/_skyes chen dam pa 'di ni gsar rnying bstan pa yongs rdzogs la dngos dang brgyud nas bka' drin che ba ma zad/_jo shangs zhi gcod bo dong pa sogs chos rgyun phra ba rnams rang stobs dang gzhan bskul la brten gdams ngag gi srog mthud pa lta bu dang /_yang sgos snga 'gyur rnying ma bka' ma'i bshad sgrub dgun gyi chu bran ltar mi mngon par 'gyur bar nye ba na thugs stobs zhum pa med pa'i 'bad rtsol chen pos btsal nas sgrub dkyil sogs sngon med pa'i legs bshad du ma gsar spel dang /_mdo sgyu sems gsum gyi gtsos ring lugs rmad du byung ba rnams bshad sgrub las gsum gyi sgo nas bstan pa rmang nas gsos te da lta'i bar du rgya che la rgyun mi 'chad pa'i phrin las spel/_gter kha gong 'og gtsos gter rnying khyad par can rnams kyi chog bsgrig sogs gsung 'bum tshad thub kyi bstan bcos glegs bam bcu gsum bzhugs pa ste/_de rnams cha tshang ba'i smin grol lung rgyun kho bos kyang mi phyed pa'i dad pa dang bka' drin rjes su dran pas 'bad pa chen pos nos shing gter gsar skor gyi bsnyen sgrub dang 'chad spel ci nus su bgyis/_yang dag so lugs/_rang gter rdor sems sogs kyi sgrub pa'i rgyun btsugs pas mtshon phyogs 'di'i bstan pa la bya ba cung zad byas shing da dung yang ji srid 'tsho ba'i bar byed par smon no/_/rje 'di'i rnam thar cung zad rgyas par 'god 'os kyang phyi nang gsang ba'i rnam thar gter 'byung dang bcas pa shin du khungs btsun zhal gsal can tu bzhugs pas 'dir yi ges 'jigs te phyogs mthong tsam zhig snying por bsdus pa yin la/_don gyi snying po rje btsun chen po 'di nyid mched zhal gdung rgyud dang bcas pa'i bka' drin la brten gsang sngags rnying ma mtshan don dang mthun pa'i bshad sgrub las gsum 'khrul med tshad thub kyi rgyun ma nyams par gong 'phel du rgyas pa 'di gcig pu'i ngo mtshar dang bka' drin phyag rjes sus kyang 'gran byar ma gyur pas bstan pa la dgongs pa'i rang gzhan skyes chen rnams kyis kyang zab chos su btags pa nyi tshe ba tsam la thugs mi gtod par bstan pa'i sgrom chen po phyogs 'di'i ring lugs rgya cher spel bas snga 'gyur rdo rje theg pa'i bstan pa gzhir bzhengs su mdzad par gsol ba 'debs pa lags
me nyag grags 'byung gis gung thang gtsug lag khang nas thog srung zab mo +
N
gnubs chen sangs rgyas ye shes kyi rnam 'phrul rtsa gsum gter bdag gling pa'am gar dbang gnam lcags rdo rje zhes grags pa ni/_lho zla nang chen gyi stod gnas chen gze rgyal gyi nye 'dabs su 'gru chen rlangs kyi rigs su ngo mtshar ba'i ltas dang bcas sku 'khrungs/_rngog blo ldan shes rab kyi sprul par grags pa'i dge lugs chos rje zhig las dge bsnyen gyi sdom pa zhus pa'i mtshan bkra shis phun tshogs su gsol/_bslab sbyang ci rigs mdzad/_gter chen stag sham rdo rje nang chen sgar du byon pa las chos 'brel tsam gsan/_phyis 'bri gung du byon nas dkon mchog phrin las bzang po bla mar bsten nas bka' chos ci rigs dang lhag par rlung dzA bir snyan brgyud kyi skor zhib nan tu gsan nas lo gsum tsam bzhugs te sbyang pa mdzad pas nyams rtogs khong nas brdol/_rdzu 'phrul dang mngon shes rtsol med du shar/_lung bstan dus bab bzhin rig pa brtul zhugs kyi spyod pa dang gnas chen mang po thogs med du nyul bas kha byang lung bstan ltar bsam yas mchims phu nas bla ma'i thugs sgrub bde gshegs kun 'dus dang /_bsam pa lhun grub kyi skor thog mar bzhes/_gzho stod ti sgro'i tshogs khang nas yang zab pad+ma khrag 'thung zhes rgyud lung man ngag zab 'dril gyi skor/_spo bo rong pad+ma'i sba tshal nas yi dam bka' brgyad gsang ba zil gnon rgyud lung man ngag rgya che ba glegs bam bdun/_des mtshon gter gnas so so nas yang phur gwa'u dmar nag_/tshe sgrub 'chi bdag zil gnon sogs tshe sgrub skor bzhi/_thugs rje chen po 'khor 'das zil gnon/_rta mgrin nyi ma'i snying po dang khro rgyal stobs 'dus/_rdor sems ye shes 'od drwa/_phyag rdor dregs pa zil gnon/_dbang drag pad+ma yang gsang /_rdo rje gro lod kyi skor/_gshin rje dug ri me 'bar/_gsang ba ye shes yid bzhin nor mchog_/mkha' 'gro bdud 'dul drag mo/_bla ma'i nor sgrub chos skyong mgon po zhing skyong skor sogs rtsa gsum rab 'byams kyi smin grol gdams skor mang du spyan drangs pa shog ser las phabs grub rigs pusti bco brgyad tsam gyi dbang lung gi rgyun da lta'ang ma chad par rdo shul dang /_khyung po/_spo bo sogs su bzhugs par snang /_gdan sa'i mthil spo bo khrom gzigs rngam chen rang du mdzad/_slob tshogs ci rigs par 'dus shing phrin las rgyas par byung na'ang /_dgung lo bzhi bcu rtsa bzhi pa tsam la sku gshegs pas mdzad pa mthar phyin ma byung bar snang /_gshegs rjes kyi bya ba slob tshogs rnams kyis legs par spel zhing /_sku'i sprul pa rong smyon o rgyan rig 'dzin khrom gzigs gdan sar bzhugs/_gsung gi sprul pa kun bzang 'chi med nor bu spu bo dga' ba lung gi phyogs su byung bar grags kyang sprul brgyud mi gsal/_thugs kyi sprul pa rig 'dzin mi 'jigs rdo rje khyung po phyogs la bzhugs pa ste gong 'og gnyis kyi sprul brgyud da lta'i bar yod/_slob ma'i gtso bo thugs sras rig 'dzin thugs mchog rdo rjes zab gter phal cher zung mkhar theg chen gling pa sogs la bstsal nas rgyun 'phel bar byung /_gzhan yang dkon seng paN+Di ta dang /_rje kun dga' blo gros/_ye shes rgyal mtshan sogs bstan pa spel nus pa'i zhal slob kyang 'ga' zhig byung/_'di nyid rig 'dzin gter bdag gling pa dang mtshan gyi zur mthun pas phan tshun mthun min dogs gzhi tsam slong na'ang /_gnyis ka'i lung bstan du ci'ang mi gsal bas rang grib sha zar 'khrul pa'i dper zad/_rgyal dbang zhwa dmar nag zung la mtshur phur gter phud 'bul bar phebs skabs gzim 'gag pa'i rkyen gyis phyag tu 'bul ma thub cing /_gter ston thugs gshis rtsub pas bstun phyogs cher ma mdzad par brten lung don thog tu ma khel rung /_yab sras rnams kyis thugs la mi bab pa'ang ma mdzad pa bcas gter ston tshad ldan du grags pa ltar kho bos kyang pad+ma khrag 'thung don dbang tsam chos 'brel du nos pa yin no
dge slong nam mkha'i snying po ni/_rus gnubs/_'khrungs yul gnyal smad nyang dkar mda' sham bur 'khrungs/_mkhan po las rab tu byung /_rten dge slong /_slob dpon chen pos dbang bskur dus me tog yang dag thugs la phog pas grub pa'i mtshan ma brnyes te nyi zer las gshegs bzhud mdzad/_lo tsA legs par sbyangs nas rgya gar la byon/_slob dpon hU~M ka ra sogs paN grub mang po dang mjal/_dbang dang gdams pa mang po gsan nas bod du byon/_bon blon rnams kyi phra mas/_re zhig lho brag mkhar chur byon/_skabs shig 'khrungs yul gyi nye 'khor/_brag dmar zhes bya ba'i phug par bzhugs pa na/_gcung po 'jig rten 'dzin pa zhig yod pa de/_zhing la 'debs rgyu'i sa bon med de/_slob dpon la zhu bar phyin pas/_khyod 'jig rten pa la sa bon med na/_nga ri khrod 'grim pa la sa bon gang las 'ong /_'on kyang 'di gtor la so nams byed pa bzhin gyis/_mi la ngo tsha gsungs nas rde'u phad bu gang gnang ba de/_gcung pos kyang bka' bzhin byas pas/_yul mi gzhan las lhag pa'i lo thog skyes/_yang lan gcig gnas de nas/_gnyal smad kyi dge ri'i rtser nam mkha' la 'phur nas byon pa na/_lam du phyag phreng zag pa/_nyang smad mkhar thang dkyil du lhung ba/_nam mkha' nas rdzu 'phrul gyi phyag brkyangs nas blangs pas/_sa la phyag sor lnga'i rjes byung bar me tog lnga skyes/_de la mkha' 'gro sde lnga dang /_'byung ba bzhi'i lha mos mchod rten lnga bzhengs pa da lta yang yod/_dgye ri spyang dmar phug par bzhugs skabs/_dgye ri'i 'dab des spe dril gyi gzhon pa mang pos bza' bca' sna tshogs khyer nas ri bltas la phyin pa na/_dge slong dang mjal/_khong tshos tshogs 'khor zhus pas/_'gro khar byin rlabs yin gsungs nas/_mi re la rde'u dmar po 'ga' re gnang bas/_phal cher gyis phos/_gcig gis mda' dong du blugs nas 'ongs/_phyis mda' bton pa na g.yu thon/_sngar slob dpon gyis rde'u gnang ba de dngos grub yin par shes nas/_gzhan tsho la bshad pas/_rde'u phos par 'gyod nas/_slar slob dpon la dngos grub zhu bar phyin pas/_phug pa'i nang na slob dpon ni med par spyang ki dmar po zhig mthong bas/_spyang dmar phug par grags/_sngar gyi g.yu de rnams la thod pa drug dmar/_rtsad po brgyad dkar/_skar ma mig bzhi sogs g.yu ming can 'ga' byung bar grags/_yang lo rgyus gzhan zhig tu/_slob dpon la nang re bzhin bud med zhig gis zho rdzi'u re phul bas skabs shig slob dpon gyis zho snod rde 'us bkang nas gnang bas mos kyang dngos grub yin par shes nas khyim du khyer te zhag 'ga' zhig nas bltas pa rde'u thams cad g.yu ru song 'dug zer ba'ang snang /_lho brag mkhar chur dpal gyi phug ring la sogs par sgrub pa mdzad pas yi dam mang po'i zhal gzigs shing /_phyag rgya chen po'i rig 'dzin brnyes nas/_lus ma spangs par mkha' spyod du gshegs/_'di'i rnam 'phrul mang po byang chub gling pa dpal gyi rgyal mtshan dang /_phyis su rig 'dzin tshe dbang nor bu sogs gter ston ci rigs par byon/_gsang yum mkha' spyod grub pa shel dkar rdo rje mtsho'i rnam thar rgyas pa pad+ma gling pa'i bla ma nor bu rgya mtshor gsal
sna nam rdo rje bdud 'joms ni/_gtsang rong gi phyogs zhang blon sna nam gyi rigs su 'khrungs/_gzhon dus chos rgyal khri srong gi chos blon mdzad/_phyis slob dpon chen po la sngags kyi sgor zhugs phyin chad sngags 'chang chen por bzhugs pa la/_rdo rje phur pa'i sgo nas grub pa brnyes pa zhig ste/_has po ri'i yang gong du brag la phur pa btab pa'i rjes da lta yang yod/_bsam yas mkhan slob chos gsum gyis rab gnas skabs su rdo rje bdud 'joms kyi ye shes kyi gzigs pas mgul phur brag la gzir/_rlung sems la dbang 'byor bas brag khung gseng chung ngu zhig nas zang thal gyis don te shar mar bsam yas su phebs shul brag khung gseng ni deng sang yang ngo 'phrod pa yod/_rdzu 'phrul gyis bar snang khams la thogs pa med par gling bzhi skad cig la bskor nus pa sogs ngo mtshar ba'i mdzad pa mtha' yas/_'di'i sgrub gnas brag dmar ke'u tshang zhes pa gtsang rong chen dang yar 'brog mtshams su rong gi brag dmar ke'u tshang zhes yongs grags su yod/_rnam 'phrul gtso bo byang gter rig 'dzin rgod ldem/_'jam dbyangs bla ma/_rig 'dzin legs ldan rje sogs rig 'dzin chen po rim byon dang /_gzhan yang bal po a hU~M sogs da lta'i bar du sbas mngon gyi gter ston 'ga' zhig byon par gsal lo +
de nas thang yig chen mo'i lung bstan go rim mthar chags su mi snang yang gzhung sor bzhag ltar rim par brjod na/_de nyid las/_khams kyi rme mdor bya khyi lha khang 'khrugs:_klong thang sgrol mar sbas pa'i gter kha 'di:_mi bzhag 'don pa'i rtags de bstan nas 'byung:_gter ston sna nam pa zhes bya ba 'byung:_zhes pa'i gter ston sna nam pa ni/_bai ro'i rnam 'phrul/_mdo khams dge rgyal byang rong gi mtshams su/_zhang sna nam pa'i rigs su 'khrungs/_mtshan gzhan 'brog pa sna nam thub pa rgyal por yang grags/_rten sngags dkar dkyus ma/_klong thang sgrol mar phebs/_de'i ka zhu nas chos dang sman dpyad rtsis sogs phan byed mang po gter du bzhes kyang deng sang gto bcos brgya rtsa'i 'khor lo las gzhan mi snang /_phyis 'dir rje bla ma pad+ma 'od gsal mdo sngags gling pa la ye shes mkha' 'gros gter dpe gtad cing o rgyan yab sras kyi byin rlabs gsal snang la brten/_'di'i yang srid snye mo zhu yas kyi rdzogs pa chen po sku gsum nyi zla 'bar ba'i gzhung dang rgyal po mdo bcu'i gdams pa sogs bka' babs par snang +
mnga' bdag mol mi 'khyil ni/_gtsang stod lho rgyud kyi mthar mnga' bdag gi gdung rigs su 'khrungs/_rten lha rigs sngags btsun gyi rnam par bzhugs par gsal/_o rgyan rin po che'i zhal slob mon gyi sgom pa ha mi nA tha'i skye bar lung bstan/_'dis byang pra dun tse'i gtsug lag khang gi ka phog nas rta mgrin dpa' bo gcig sgrub/_rgyal po srog gi 'khor lo/_pe har gnad 'bebs dang dregs pa gnad 'bebs rnams spyan drangs pa las/_bar skabs rgyal po srog gi 'khor lo phyag len dang bcas pa'i rgyun dar bar byung yang phyis 'dir dpe tsam yang mjal du med par song ba na/_rje mdo sngags gling pa'i phyag tu sngar gyi dpe rnying mkha' 'gro gtad rgya'i tshul du babs nas o rgyan yab sras kyi byin rlabs las yang gter du gtan la phabs pa bdag gis kyang bka' drin tu thob bo +
rig 'dzin ngag gi dbang po ni/_rig 'dzin chen po legs ldan rje'i sku'i skye ba de ma thag pa ste/_yab byang bdag dbang po'i sde dang /_yum za hor gyi gdung las lha lcam yid bzhin dbang mo'i sras su lcags pho 'brug gi lo la ngo mtshar ba'i ltas dang bcas te sku bltams/_'bri gung pa chos rgyal phun tshogs la gtsug phud phul bas mtshan ngag dbang rig 'dzin rdo rje chos rgyal bstan pa'i rgyal mtshan dpal bzang por gsol/_byang chub sems kyis thugs rgyud smin par mdzad/_yab rje las chos bka' bum pa gang byor gsan pas rnying ma bka' gter gyi chos kyi rgya mtsho chen por gyur/_rten sdom pa gsum ldan sngags 'chang rdo rje 'dzin pa chen po'i rnam par bzhugs/_shel brag sogs gnas chen mang por thugs dam bsnyen sgrub rtse gcig tu mdzad pas lhag pa'i lha du ma zhal gzigs/_rdo rje'i chos srung rnams bran du 'khol/_bsam yas chos skyong chen po'ang spa bkang pas mtshon mthu stobs nus pa 'gran zla dang bral/_mngon par shes pa'ang rgya chen po mnga'/_sku chung dus yab kyi zhabs phyir lan gcig dang rjes su rje nyid ston 'khor rnams lan gcig bcas lan gnyis la rgya ha ka ling tse yan chad du zhabs bkod nas 'gro don rlabs po che mdzad/_gdan sa'i mthil thub bstan rdo rje brag tu gtan chags te 'khor lo gsum gyi mdzad pa gong 'phel du rgyas/_mthar thugs sras kyi thu bo yol mo sprul sku bstan 'dzin nor bu la gdan sa gnang nas sa yos nag pa zla ba'i tshes bcu'i nyin bsnyun mngon gyur med par gzugs sku'i bkod pa chos dbyings su bsdus/_gdung bzhu ba'i dus 'ja' 'od dkar po 'khyil zhing me tog dkar po khrung khrung gi sgo nga tsam gyi char babs pa sogs ngo mtshar ba'i ltas du ma byung /_gshegs rjes kyi bya ba spyi dang gdung rten bzhengs pa/_sprul pa'i sku pad+ma phrin las rnam sras gling du sku 'khrungs pa'i ngos 'dzin sogs rig 'dzin yol mo ba chen pos mdzad/_'di nyid zab gter gyi 'khor los sgyur bar nges na'ang sha gzugs pa bkra shis rnam rgyal gyi gter 'byung las/_nyid kyis zab gter 'ga' re bzhes na'ang thugs babs dkyel che bas mngon par mi mdzad/_ces snang ba ltar pad+ma bka' thang las/_res 'ga' mi 'byin gter rnying bstan pa skyong:_zhes pa phyag len du btab ste yab chos gter rnying gi bstan pa 'dzin skyong spel ba la 'gran zla dang bral bas gsang sngags rnying ma'i bstan pa'i srog shing gcig pur gyur to
rig 'dzin gter bdag gling pa dang thugs rgyud gcig pa'i dge sbyong blo gsal rgya mtsho'i yang srid de ma thag pa nga phod dge rgan pad+ma dgyes pa zhes/_rje rin chen rnam rgyal sogs kyi thugs sras mang du thos pa'i mthar phyin cing mdo sngags rig gnas dang bcas pa la mkhas pa dang /_rdo rje theg pa'i lam las dngos grub brnyes pa de la'ang dag snang bla sgrub kyi skor bzhugs pa las rtsa ba'i dbang bskur tsam kho bos kyang nos/_'di dang dus mnyam tsam du mang thos tshe dbang mi 'gyur rdo rje zhes gter chen yab sras dang rig 'dzin pad phrin sogs kyi thugs sras mkhas grub chen po de la'ang dag snang bde mchog 'khor lo'i skor tshig don ngo mtshar can bzhugs pa bstan 'dzin ye shes lhun grub sogs la gnang ba'i rgyun phyis kyi bar yod par snang +
chos rgyal khri srong gi thugs sprul rgyal sras lha rje'i skye ba dgu pa mnga' ris paN chen pad+ma dbang rgyal rdo rje ni/_glo bo ma thang gi sa'i char yab mnga' bdag mar pa'i skye mtha' lha rigs mkhas grub chen po 'jam dbyangs rin chen rgyal mtshan/_yum 'bro lcam khrom pa rgyan gyi sras su me mo lug gi lo la sku bltams/_mtshan pad+ma dbang rgyal du btags/_dgung lo brgyad par rten dge bsnyen tu mdzad/_yab las byang chub tu thugs bskyed de mdo sgyu sems gsum gtso bor gyur pa'i snga 'gyur bka' ma'i skor la gsan sbyong mthar phyin par gnang /_bsnyen sgrub rtags thon pa mang du mdzad/_slob dpon nor bstan bzang po las 'dul ba mdo sde/_bka' gdams pa'i skor sogs gsan/_dgung lo nyi shu pa nas bzung/_dbu tshad phar phyin gtso bor gyur pa'i gzhung lugs chen po brgya phrag gcig khong du chud par mdzad pas na dge ba'i bshes gnyen mtshan don dang mthun par yongs su grags/_nyer gcig par 'jam dbyangs chos skyong dang tshul khrims dpal sogs las gshin rje gshed dmar sogs kyi smin grol gsan nas bsnyen sgrub mdzad pas 'jam dpal drag po'i zhal dngos su gzigs/_khyad par dgung lo nyer gnyis par yab rje dam pa las snga 'gyur bka' gter gyi zhun thar legs par bcad/_bka' brgyad kyi sgrub pa mdzad pa'i tshe yab kyis dag pa'i gzigs snang khyad par can gyis dbugs dbyung zhing gzengs bstod pa ltar phyis nas mngon du gyur/_dgung lo nyer gsum gyi snga phyir glo bo lo tsA las lam 'bras tshar gnyis gsan/_nyer lnga pa'i tshe bsam 'grub gling gi chos grwar 'jam dbyangs sa paN gyi rnam 'phrul glo bo mkhan chen bsod nams lhun grub mkhan slob las bsnyen par rdzogs pa nas brtsam/_kun spangs gdan gcig pa'i brtul zhugs bzung ste dam pa'i chos 'dul ba'i lag len tshul bzhin phyag tu bstar ba la brten/_dus der 'dul ba 'dzin pa thams cad kyi khyu mchog tu gyur/_gzhan yang mkhan chen de nyid dang gu ge paN chen rnam rgyal dpal bzang /_'jam dbyangs blo gros dpal rnams las sgra dang tshad ma/_gsang sngags gsar ma'i dbang rgyud mang du gsan cing sbyangs pas ma hA paN+Di ta zhes pa'i mtshan gyi cod pan 'phyangs/_drang po gter ston shAkya bzang po las kyang byang gter mang du gsan pas mtshon/_mdor na gsang sngags gsar rnying gi dbang rgyud man ngag gi rgyun bzhugs pa phal cher 'bad pas gsan cing bsnyen sgrub mdzad/_ne pA la'i yul du'ang bsnyen nas bal bod kyi bla ma mang du bsten cing /_gnas 'brel dang thugs dam mdzad pas dag pa'i gzigs snang mtha' yas pa shar/_dgung lo so brgyad pa nas bzung gsar rnying ris med pa'i chos kyi char chen po phabs pa'i skabs/_dbus gtsang gi phyogs su gsar rnying gi chos brgyud nyams pa gso ba'i thugs bskyed 'khrungs te yab dang glo bo'i sde bdag kun la gnang ba zhus shing zang zang lha brag sogs brgyud/_gcung legs ldan rdo rje dang lhan cig tu dbus la byon/_lha ldan sprul pa'i gtsug lag khang mjal zhing lung bstan brnyes pa ltar/_gzhung spre zhing du rdog ston bsod nams bstan 'dzin dang /_gra thang ba'i zhwa lu lo chen las rngog dkyil dang gshed dmar skor sogs gsan/_bsam yas su byon pas chos rgyal khri srong gi bag chags mngon du sad/_bar khang du bka' brgyad bde gshegs 'dus pa'i sgrub chen mdzad cing lho brag gu ru ba sogs rjes su bzung /_phreng so o rgyan chos bzang dang kong chen nam mkha' dpal ldan las bla ma dgongs 'dus gsan/_sbrags yang rdzong dang mchims phur thugs dam mdzad pas lha mang po'i zhal gzigs/_chos dbang gi gdung rabs brgyad pas lho brag tu spyan drangs nas chos rgyun nyams pa gso ba sogs bka' drin chen pos khyad par mdzad/_rje nyid kyis kyang bka' brgyad bde 'dus kho na tshar nyer lnga gsan pa'i phyi ma khungs btsun cing yid brtan nus pa de lho brag dgon dkar du 'gran zla dang bral ba'i grub thob chen po rje'u rigs nam mkha'i rnal 'byor las rnyed pas thugs dgongs yongs su rdzogs/_khyad par zab gter bzhes tshul ni dgung lo zhe drug par bsam yas steng khang gi rnam snang mi bzhi rgyab sprod kyi gsang sgrom nas bka' 'dus phyi ma rig 'dzin yongs 'dus kyi chos skor gsol 'debs le'u bdun ma'i sgrub thabs gter nas bzhes shing phal cher gtan la phabs pa da lta'ang dar rgyas che la kho bos kyang rdzogs par nos/_rig 'dzin legs ldan rjes mtshams sbyar nas 'bri gung rin chen phun tshogs gdan drangs te dpon slob gsum kas bsam yas kyi rab gnas bskyar bas bod khams phan bde'i rtsa lag chen por gyur/_des mtshon dbus phyogs su bstan 'gro'i don mtha' yas pa mdzad pa'i mthar/_dgung lo nga drug par 'on smon thang nas zangs mdog dpal gyi ri bo chen por gshegs so/_/spyir skyes bu dam pa 'di mkhas btsun grub gsum gyi rnam thar bsam gyis mi khyab pa'i tshul rje rang gi zhal gsung rnam thar tshigs bcad mar gsal bas 'dir mdor bsdus tsam bkod pa yin no/_/gzhan yang tshig nyung la don shin tu mang ba sdom gsum rnam par nges pa'i bstan bcos mdzad pa gcig pu'i bka' drin kyang bsam gyis mi khyab pas deng sang gi bar du snga 'gyur gyi bstan 'dzin rnams kyi mgrin pa'i rgyan du gyur pas mtshon/_dngos dang brgyud pa'i sgo nas snga 'gyur bka' gter gyi bstan pa gsal ba'i shing rta chen por yongs su grags pa'ang don dang ldan pa nyid do/_/sku'i skye ba de ma thag pa ni byang bdag bkra shis stobs rgyal te rnam thar 'og tu 'byung ngo
dpal karma pa drug pa mthong ba don ldan gnas chen tsa ri trar thugs dam la bzhugs pa'i skabs/_rnga yab gling nas slob dpon chen pos grub chen zla ba pa pho nyar mngags te tshe sgrub zab mo'i gdams pa bstsal pa/_phyis rje dgu pa dbang phyug rdo rjes mngon rtogs zhi phreng gi gral du bkod par mdzad pa'i dbang gi rgyun da lta'ang mchis so +
de nyid kyi thugs sras kyi gtso bo bdag cag gi dpal mgon bla ma dam pa byams mgon tA'i si tu dgu pa rdo rje 'chang pad+ma nyin byed dbang po ste/_yul yid lhung smar khams zhes rigs rus mngon par mtho ba ngag dbang mgon po'i sras su ngo mtshar ba'i ltas dang bcas mtshan dpe'i pad+mo bzhad/_rdo rje gtsug lag dga' bas rje bstan pa'i nyin byed kyi yang srid 'khrul med du lung bstan cing kar 'brug rgyal ba yab sras kyis stangs bcad nas dgung lo lnga par gdan sa chen por mnga' gsol/_bla ma dgongs pa 'dus pa'i lung bstan bka' rgya ma las/_ma 'ongs chos kyi spyan can drug dang pad+ma'i ljags ldan drug 'brel chags su lung bstan pa'i pad+ma'i ljags ldan dang por nges pas rje dpa' bos kyang dag snang du gsal ba ltar pad+ma nyin byed dbang po zhes pa'i mtshan gyi cod pan dpyangs/_gzhan dpal pad+ma dbang chen dang /_rgyal dbang bcu gsum pa las rab byung gsan pa'i skabs/_dpal ldan bstan 'dzin nyin byed phrin las rab rgyas phyogs las rnam par rgyal ba'i sde zhes pa'i mtshan gnang /_rje de nyid dang zhwa dmar mchog gi sprul sku chos grub rgya mtsho/_'bri gung pa don grub chos rgyal/_'brug chen kun gzigs chos kyi snang ba/_gar dbang chos skyong 'gyur med/_'dzi sgar bka' brgyud phrin las rnam rgyal rnams dang /_rje rig 'dzin chen po'i sku'i sras tshe dbang dpal dar las kyang chos 'brel tsam gsan cing /_gtso bor rje bdud 'dul rdo rje rtsa ba'i bla mar 'dzin/_de rnams las bka' brgyud kaM tshang gi smin grol yan lag dang bcas pa'i rgyun gang bzhugs gtsos/_'bri 'brug dang rnying ma'i skor sogs gsan bsam rgya cher mdzad/_sdom pa gsum gyi bcas mtshams las nam yang mi 'da' ba'i sku btsun pa'i mchog tu gyur/_thun mong gi rig gnas ci rigs dang khyad par mdo sngags kyi gzhung la don gyis mkhyen pa rgyas pas mkhas pa'i phul du gyur/_bstan 'gro'i don la gcig tu gzhol ba'i thugs bskyed rlabs po che mnga' bas bzang po'i phrin las mkha' khyab tu brdal/_gtso bor dus dang rgyun du zab mo'i rnal 'byor la gzhol bas grub pa'i go 'phang mthon por gshegs par nges kyang bka' gdams pa'i bshes gnyen chen po'i rnam thar ltar rang gi yon tan bum nang gi mar me ltar sbed cing gsang ba srung ba la thugs sgam pas sus kyang gting mtha' mi dpog mod/_thag ring nas phyag nas zang thal du phebs pa dang /_sra mkhregs kyi rdo la zhabs kyi rjes byon pa dang /_zhabs sa la mi reg pa sogs shugs mi thub pa'i tshul gyis thun mong gi spyod yul du bstan/_gzhan sems mkhyen pa'i mngon shes dang /_sprul pa'i sku ngos 'dzin gnang ba rnams bstan pa la phan pa kho nar byung bas 'khrul pa'i dri ma phra mo tsam yang bral/_dbus phyogs su lan gsum chibs bskyod kyis mtshon/_rang gi gdan sa dang khams kyi 'brog sde stod smad rnams su'ang phebs nas chos kyi 'khor lo rgyun mi chad par bskor ba'i grub 'bras/_thugs sras kyi gtso bo dpal karma pa bcu bzhi pa khyab bdag theg mchog rdo rje/_'brug chen chos kyi snang ba gong 'og_/dpa' bo gtsug lag chos rgyal sogs kar 'brug gi skyes chen rnams kyis gtsos/_nang thugs kyi sras zla sprul rin po che karma nges don bstan pa rab rgyas dang /_rang dgon gyi dbon sprul gong 'og_/dpal yul gdan sa pa karma 'gyur med sogs kar rnying gi bstan 'dzin skyes chen phal cher rjes su bzung zhing mos gus gsol 'debs tsam lhur byed pa'i bdag lta bus mtha' brten pa'i slob tshogs kyi phreng ba brjod pa'i yul las 'das/_bdag cag gi bla ma dam pa kun gzigs mkhyen brtse'i dbang pos kyang phyag chen chos drug sogs smin grol ci rigs pa gsan cing rje nyid nas kyang thugs gtad shin tu che bas don brgyud byin gyis brlabs par zhal gyis bzhes shing gter rnying skor sogs 'chad spel dang phyogs bsdu byung na legs zhes rin chen gter mdzod chen mo'i bka'i gnang ba'ang don gyis bstsal bas 'chad spel gyi thugs sras mchog tu mngon par ma zad/_phyis nas dpal karma pa dang mchog gi sprul pa'i skus kyang zab chos gsan cing bdag cag dpon slob kyis rin chen gter mdzod chen mo'i bka'i bsdu ba mthar phyin pas lung don mngon du gyur pa yin no/_/gsung rtsom chog bsgrig sogs sngar yod las gsar spros rigs la thugs dgyes pa cher med kyang rgyal dbang rin po ches gtsos mchog phal gyi gdul bya rnams kyis nan tan du gsol ba btab pa'i ngor/_sgrub dkyil dbang chog khrid yig zhal gdams sogs glegs bam gsum tsam bzhugs pa kho bos kyang ljags lung rags rim gdams gtad byin rlabs zab mo thob cing gzhan la 'chad cing spel ba rjes su gnang ba'i skal bzang yang thob pa yin/_gzhan yang rje 'di nyid byang chub sems dpa'i spyod pa bsdu ba bzhi dang gtong ba la mchog tu goms pas/_stod mnga' ris nas 'jang yul rgya mtshams yan gyi kar 'brug gi dgon sde che phra mtha' dag la dngul 'gyed lan gsum gnang ba dngul srang khri phrag gsum lhag gis mtshon rten gsum dang mchod rdzas sgrub pa'i rgyun sogs mtha' yas pa 'dzug par mdzad/_dpal spungs kyi gdan sar gser gdung chen mo rten dang brten par bcas pa dpe bral du bzhengs/_chos gos dang yo byad sogs ma 'ongs bstan pa'i mig rgyan du 'gyur ba gnang bas mtshon/_bya ba las kyi 'khor lo bsam brjod kyi yul las 'das shing /_dgung grangs drug cu rtsa gcig nas gzugs sku ma gshegs kyi bar lo ngo bco brgyad la sgrub khang chen mor thems mi 'da' ba'i tshul gyis spong ba bsam gtan gyi 'khor lor rtse gcig tu bzhugs pa yin no/_/de lta bu'i rgyal bstan 'dzin skyong spel ba'i 'khor lo gsum gyi mdzad pa mthar phyin nas dgung grangs brgyad cu bzhes pa'i lcags glang snron zla ba'i tshes bdun gyi nam phyed tsam du bsnyun cher med par mngon par shes bzhin du re zhig zhing khams gzhan du gshegs pa'i tshul bstan pa na dgongs pa mngon du gyur pa'i rtags su nam mkha' la sprin med cing ser bu tsam yang mi ldang ba dang /_thams cad kyis tshor ba'i sa g.yo ba sogs rtags dang cho 'phrul mang po mngon par 'du mdzad/_sku gdung rin po che zhugs la phul bas ngo mtshar can gyi rten mang du byon cing gdung gi cha shas tsam dad ldan 'ga' re'i lag tu son pa las ring bsrel mang du 'phel bar snang /_gshegs rjes kyi bya ba dgongs pa rdzogs pa'i thabs kyang /_sku mchod chen mor/_tshogs chen du mar lugs dgyes rdor lha dgu/_gsang 'dus mi bskyod pa/_ma hA mA ya lha lnga'i sgrub mchod rgyun 'dzug sogs phul du phyin par grub/_mchog gi sprul sku dpal karma pas lung bstan cing mtshan pad+ma kun bzang chos kyi rgyal por gnang ba pad+ma'i ljags ldan gnyis par grub bo/_/de lta bu'i rje bla ma 'di nyid kyis zhal gzigs lung bstan lta ci/_mnal lam tsam gyi 'phros kyang gzhan la mi gnang bas dag snang dgongs gter sogs bzhugs min ma nges kyang /_grub brnyes bla ma kaM tshang nor bus nan tan du gsol ba btab pa'i ngor o rgyan rin po che rje 'bangs nyer lngas bskor ba'i bla sgrub zab mo dgongs gter bstan bcos kyi tshul du bstsal cing yang zab dkon mchog spyi 'dus kyi dbang bzhi dang zung du 'brel ba'i rgyun bdag cag gis kyang 'bad pas zhus shing rin chen gter mdzod chen mo'i snying por bzhugs su gsol ba yin no
bangs rigs nyer lnga las/_gnubs sangs rgyas ye shes rin po che ni/_gnubs rong yul du 'khrungs/_o rgyan chen pos bka' brgyad kyi dbang bskur ba'i skabs/_me tog sku gshin rjer phog_/sbrags kyi yang rdzong du sgrub pa mdzad pas lha tshogs thams cad kyi zhal gzigs/_brag la phur pa btab pa dang /_nyi zla gdan du bting ba sogs grub pa'i rtags mtshan mngon snang du ston par nus/_rgya gar dang bal yul du lan bdun byon/_mdo sgyu sems gsum gyi bka' babs/_bal po ba su d+ha ra las mngon spyod kyi las mang du zhus shing drag po'i phrin las mang du mdzad/_khyad par du rgyal po glang dar mas sangs rgyas kyi bstan pa bshigs pa'i dus slob dpon 'dis rgyal po sdig can skrag par mdzad de/_rgyal pos khyod la nus pa ci yod zer bas ngas sngags tsam bzlas pa'i nus pa 'di la gzigs shig ces sdigs mdzub gnam du phyar bas sdigs mdzub kyi steng na lcags kyi sdig pa nag po g.yag tsam dgu brtsegs su 'dug pa mthong bas rgyal po skrag ste dkon mchog sngags pa'i sku la mi bsdo'o chos mdzod cig zer/da rung nus pa 'di la gzigs shig zer nas sdigs mdzub kyis thog phab ste pha ri'i brag la bsnun pas tshal par song /_der rgyal po 'jigs shing skrag nas khyed 'khor bcas la gnod pa mi byed do zer nas btang ste sngags 'chang gos dkar lcang lo can rnams la gnod pa ma byung ba khong gi drin du mngon te sangs rgyas kyi bstan pa spyi la'ang phan pa cher byung ngo /_/tshe'i rig 'dzin brnyes pas mnga' bdag dpal 'khor btsan gyi bar du bzhugs par grags/_mthar thugs sras yon tan rgya mtsho dang /_dge ba'i mched bco lnga sogs smin par mdzad nas lcang lo can du gshegs/_snga 'gyur bka' ma'i babs so chen po'i srol 'dzin pa'i shing rta chen po'o/_/'di'i rnam 'phrul gter ston dum pa rgya zhang khrom rdo rje 'od 'bar dang /_o rgyan dri med kun dga' sogs snga phyir mang du byung ngo +